ក្រោយ FFC ទទួលបានកញ្ចប់ជំនួយពី AFF ការរចនា និងដំឡើងកៅអីមានបង្អែកនៅពហុកីឡដ្ឋានជាតិអូឡាំពិក ដែលអាចផ្ទុកទស្សនិកជនសរុបចំនួន ៣០,០០០នាក់ បានបញ្ចប់ជាស្ថាពរ ជាមួយរូបរាងថ្មីតាមរចនាបថខ្មែរ។
 

ដំណើរការបំពាក់កៅអីមានបង្អែកនៅពហុកីឡដ្ឋានជាតិអូឡាំពិក ធ្វើឡើងបន្ទាប់ពី AFC និង FIFA តម្រូវឱ្យ FFC ដកកៅអីចាស់ដែលទើបបំពាក់អំឡុងស៊ីហ្គេម ដើម្បីអាចរៀបចំប្រកួតកម្រិតអន្តរជាតិ។ ពេលនោះ FFC បានប្រកាសរកអ្នកចង់បញ្ចេញស្នាដៃ រចនាប្លង់កៅអីពហុកីឡដ្ឋានជាតិអូឡាំពិក ហើយទីបំផុតក៏រកបានជ័យលាភីលោក ហោ មណីឬទ្ធិ ដែលជ្រើសរើសយករចនាបថក្បាច់ផ្កាចន្ទន៍។
  

នៅថ្ងៃទី១ ខែមេសា តាមរយៈផេកហ្វេសប៊ុកផ្លូវការរបស់ខ្លួន FFC បានប្រកាសពីការរួចរាល់ទាំងស្រុង លើការបំពាក់កៅអីមានបង្អែកចំនួន២៥០០០កៅអី ស្របតាមគោលការណ៍ FIFA និង AFC​។ រួចរាល់ បានន័យថា ពហុកីឡដ្ឋានជាតិអូឡាំពិក អាចទទួលដឹកនាំការប្រកួតជាអន្តរជាតិ ជាមួយកៅអីអង្គុយសរុប៣ម៉ឺនកៅអីជាផ្លូវការ។ កន្លងមក កីឡដ្ឋាននេះមានត្រឹមកៅអីអត់បង្អែក តែអាចទទួលរៀបចំស៊ីហ្គេម និងការប្រកួតអន្តរជាតិមួយចំនួន ក៏ដោយសារ FFC ទទួលបានការអនុគ្រោះពី AFC ប៉ុណ្ណោះ។ 
 

FFC បានបង្ហាញការអរគុណចំពោះ AFF ដែលបានផ្តល់ជំនួយជាកញ្ចប់ថវិកា ដើម្បីឲ្យគម្រោងតម្លើងកៅអីមានបង្អែកថ្មីនេះសម្រេចបាន១០០ភាគរយ។ ការចំណាយលើការបំពាក់កៅអីចំនួន ២៥០០០ កៅអីនេះ ប្រហែលជិត៥០ម៉ឺនដុល្លារ៕