លោក រ៉ុង ឈុន នឹងតវ៉ាក្រសួងអប់រំ ដែលសម្រេចលុបឈ្មោះខ្លួន ចេញពីក្របខណ្ឌ

ជាតិ

លោក រ៉ុង ឈុន នឹងតវ៉ាក្រសួងអប់រំ ដែលសម្រេចលុបឈ្មោះខ្លួន ចេញពីក្របខណ្ឌ

06, Feb 2018 , 10:19 pm

រូបភាព

លោក រ៉ុង ឈុន ត្រូវបានលុបឈ្មោះចេញពីក្រសួងអប់រំ

ដោយ: រំដួល ចិត្រា (Romdoul Chetra)

ភ្នំពេញ៖ លោក រ៉ុង ឈុន ដែលជាអតីតសមាជិកគណៈកម្មាធិការជាតិរៀបចំការបោះឆ្នោត ចាត់ទុកការសម្រេចរបស់ក្រសួងអប់រំ យុវជននិងកីឡា ជាការរើសអើង និងអយុត្តិធម៌។ ការលើកឡើងរបស់លោក រ៉ុង ឈុន បែបនេះ ក្រោយពីក្រសួងអប់រំ សម្រេចលុបឈ្មោះខ្លួន ចេញពីក្របខណ្ឌក្រសួង ។

រដ្ឋមន្ត្រីក្រសួងអប់រំលោក ហង់ ជួន ណារ៉ុន បានលុបឈ្មោះលោក រ៉ុង ឈុន ដែលបម្រើការងារនៅក្នុងនាយកដ្ឋានស្រាវជ្រាវ វិទ្យាសាស្ត្រ ចេញពីក្របខណ្ឌ ក្រោមហេតុផលថា លោក រ៉ុង ឈុន អវត្តមានដោយគ្មានច្បាប់អនុញ្ញាត តាំងពីថ្ងៃទី១ ខែមករា ឆ្នាំ២០១៨មកម្ល៉េះ។

ត្រង់ចំណុចនេះលោក រ៉ុង ឈុន បាននិយាយថា លោកបានដាក់ពាក្យសុំបម្រើការងារវិញ នៅថ្ងៃទី៣ មករាឆ្នាំ២០១៨ ហើយសុំចាប់ផ្ដើមបំពេញកាតព្វកិច្ច នៅដើមខែកុម្ភៈនេះ ។ ប៉ុន្តែក្រសួងបែជាសម្រេចលុបឈ្មោះលោក រ៉ុង ឈុន ចេញពីក្របខណ្ឌទៅវិញ។ លោក រ៉ុង ឈុន ដែលបានបាត់បង់តួនាទីពីក្របខណ្ឌអប់រំនេះ បានដាក់ចម្ងល់លើនីតិវិធីក្រសួងថា ជាការរើសអើងសមាគមគ្រូបង្រៀនឯករាជ្យ ឬជាការរើសអើងផ្នែកនយោបាយ ។

ថ្លែងប្រាប់សារព័ត៌មានថ្មីៗ អតីតសមាជិកគជប និងជាអតីតប្រធានសមាគមគ្រូបង្រៀនឯករាជ្យរូបនេះ បានអត្ថាធិប្បាយយ៉ាងដូច្នេះថា៖«ការសម្រេចរបស់ក្រសួងអប់រំ ជាការរំលោភសិទ្ធិសហលក្ខន្តិកមន្ត្រីរាជការស៊ីវិល ។ វាជារឿងដែលគួរឲ្យអស់សំណើចណាស់ ព្រោះខ្ញុំបានដាក់ពាក្យសុំបម្រើការងារនៅថ្ងៃទី៣មករា និងសុំអនុវត្តបម្រើការងារនៅខែកុម្ភៈ ប៉ុន្តែក្រសួងបែជាសម្រេចលុបឈ្មោះខ្ញុំចេញ ដោយថា មិនបម្រើការងារតាំងពីថ្ងៃទី១មករា ដល់ថ្ងៃទី៣០មករា»។

សារពត៌មានថ្មីៗ មិនអាចទាក់ទងលោក រស់ សាលីន អ្នកនាំពាក្យក្រសួងអប់រំ ដើម្បីសុំការបកស្រាយតបនឹងការលើកឡើងរបស់លោក រ៉ុង ឈុន ឡើយ។

អត្ថបទទាក់ទង

លុបឈ្មោះ លោក រ៉ុង ឈុន ពីក្របខណ្ឌ, រដ្ឋមន្ត្រីបន្ទោសប្រធាននាយកដ្ឋានលើការគ្រប់គ្រងវត្តមានមន្ត្រី

តែបើតាមការចុះផ្សាយរបស់សារព័ត៌មាន Fresh News លោក រស់ សាលីន បានពន្យល់ថា ការសម្រេចលុបឈ្មោះ លោក រ៉ុង ឈុន ចេញពីក្របខណ្ឌនេះ ដោយសារតែ លោក រ៉ុង ឈុន បានដាក់ពាក្យចូលបម្រើការវិញ ហួសពេលកំណត់នៃច្បាប់ (មិនឲ្យលើសពី១៥ថ្ងៃ) ។ លោក រស់ សាលីន បានបញ្ជាក់ថា៖ «ពាក់ព័ន្ធ លោក រ៉ុង ឈុន តាមគោលការណ៍ នៅពេលដែលគាត់ចប់ ភារកិច្ច និងតួនាទីគាត់ នៅពេលលាលែង ពីគ.ជ.ប គឺត្រូវមកដាក់ពាក្យយ៉ាងយូរត្រឹមថ្ងៃទី២៧ ខែធ្នូ ឆ្នាំ២០១៧ ដោយឡែកសាមីខ្លួន បានដាក់ពាក្យនៅខែមករា»។

សម្រាប់លោក រ៉ុង ឈុន ការសម្រេចបែបនេះ ជាការបំពានសិទ្ធិមន្ត្រីរាជការ។ លោកថា ក្រសួងអប់រំ គួរតែហៅរូបលោកសួរនាំដេញដោលផ្ទាល់មាត់ ឬក៏ប្រាប់ដំណឹងសិន មុននឹងសម្រេចបែបនេះ។លោក រ៉ុង ឈុន នឹងតវ៉ាលើករណីនេះ ដើម្បីរកភាពយុត្តិធម៌វិញ។

«ខ្ញុំឃើញក្រសួងបកស្រាយថាឲ្យខ្ញុំដាក់ពាក្យនៅត្រឹមថ្ងៃទី២៧ ធ្នូ ២០១៧ ប៉ុន្តែខ្ញុំមិនបានឃើញការបញ្ជាក់បែបនេះទេ ។ ទើបខ្ញុំដាក់ពាក្យនៅថ្ងៃទី៣ មករា ឆ្នាំ២០១៨នេះ វាខុសត្រូវគ្នា៦ថ្ងៃ ដោយសារខ្ញុំចាំរដ្ឋសភាប្រកាសលុបឈ្មោះខ្ញុំចេញពីគជបសិន ។ ហើយមុនលុបឈ្មោះនេះក្រសួងគួរតែហៅសួរនាំថាខ្ញុំនៅបម្រើការងារនេះទៀតទេ ឬស្តីបន្ទោសខ្ញុំជាលាយលក្ខអក្សសិន មិនគួរសម្រេចលុបឈ្មោះទេ»។ នេះជាការលើកឡើងរបស់លោក រ៉ុង ឈុន ។

ទាក់ទងនឹងបញ្ហាខាងលើនេះរដ្ឋមន្ត្រីក្រសួងអប់រំ យុវជន និងកីឡា ស្តីបន្ទោសមន្ត្រីនាយកដ្ឋានស្រាវជ្រាវវិទ្យាសាស្ត្រ ដែលមិនបានគ្រប់គ្រងបុគ្គលិកក្រោមឱវាទ និងបុគ្គលិកអប់រំ២០នាក់ ដែលខកខានមកបំពេញកាតព្វកិច្ចការងារជាប់លាប់ ចាប់ពីថ្ងៃទី៤ មករា ដល់ថ្ងៃទី៣០មករា ។ ក្នុងករណីនេះរដ្ឋមន្ត្រីក្រសួងអប់រំ បានដាក់លក្ខខណ្ឌជាលាយលក្ខណ៍អក្សរដូច្នេះថា៖«សាមីជនប្រការ១ (ប្រធាននាយកដ្ឋាន) ត្រូវគ្រប់គ្រងបុគ្គលិកក្រោមឱវាទ ឲ្យស្របតាមច្បាប់ជាធរមាន។ ចំពោះសាមីជនដែលមានឈ្មោះក្នុងប្រការ២ (បុគ្គលិក) ត្រូវមកបំពេញកាតព្វកិច្ចការងារឲ្យបានជាប់លាប់។ ក្នុងករណីដែលបន្តអវត្តមានទៀត ក្រសួងនឹងចាត់វិធានការតាមច្បាប់ដែលនៅជាធរមាន»៕