ជាតិ
សង្គមជាតិ
សេដ្ឋកិច្ច
អាជ្ញាធរក្រុងភ្នំពេញថាលិចផ្លូវមួយចំនួន ព្រោះសំរាម ខ្វះអណ្តូងលូ និងការបិតមាត់អណ្តូងលូរបស់ពលរដ្ឋ
× ភ្នំពេញ៖ ភ្លៀវធ្លាក់ខ្លាំង ដែលបង្កឲ្យលិចផ្លូវមួយចំនួននៅក្រុងភ្នំពេញ២ថ្ងៃមកនេះ បានបង្កផលលំបាក និងខាតពេលយ៉ាងច្រើនរបស់ប្រជាពលរដ្ឋ ព្រមទាំងខាតបង់សេដ្ឋកិច្ចអស់ច្រើនគួរសមផងដែរ ដោយសារអាជីវកម្មនៅតំបន់លិចទឹកត្រូវផ្អាក។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ តាមរយៈសារព័ត៌មានថ្មីៗថា បានពន្យល់មូលហេតុដែលបណ្តាលឲ្យមានជំនន់ទឹកភ្លៀងនៅតំបន់មួយចំនួន ក្នុងក្រុងភ្នំពេញថាដោយសារសំរាម ការខ្វះអណ្តូងលូ និងការបិតមាត់អណ្តូងលូឲ្យនៅតូចរបស់ប្រជាពលរដ្ឋ។
ទោះយ៉ាងនេះក៏ដោយ មន្ត្រីរូបនេះ បានអះអាងថាទោះជាលិចលង់ខ្លាំងពិតមែន ប៉ុន្តែតំបន់មួយចំនួនដូចជា ផ្សារកណ្តាលដែលទឹកលិចត្រឹមទ្រូងមនុស្សចាស់នោះ បានស្រកអស់វិញ ត្រឹមតែជាង១ម៉ោងក្រោយពេលភ្លៀង។ បើធៀបនឹងឆ្នាំទៅ ទឹកលិចកម្ពស់ដូចគ្នានេះ ត្រូវចំណាយពេលជិត៦ម៉ោងឯណោះ ទម្រាំវាហូរចូលលូអស់។ នេះបើតាមអ្នកនាំពាក្យដដែល ដោយបន្តពន្យល់ដូច្នេះ៖«ការស្រកលឿននេះ ដោយសារមានការរៀបចំប្រព័ន្ធលូបានច្រើន ដែលមានស្តារប្រព័ន្ធប្រឡាយលូជាង៤០០គីឡូម៉ែត្រ ជុំវិញក្រុងភ្នំពេញ»។
បើតាមលោក ម៉េត មាសភក្តី ម្តុំផ្សារបឹងត្របែក និងផ្សារដេប៉ូជាដើម ជាតំបន់ដែលទឹកស្រកយឺតជាងគេ ដោយសារតែសំរាមអណ្តែតនៅលើផ្លូវបានហូរទៅបិទមុខអណ្តូងលូ។ យ៉ាងណាក៏ដោយដើម្បីបញ្ចៀសការស្ទះលូនេះ រដ្ឋបាលរាជធានីភ្នំពេញ នៅថ្ងៃទី២៧មិថុនា បានកាយសំរាមចេញពីប្រឡាយបឹងត្របែក ដើម្បីឲ្យមានលំហូរទឹកលឿនជាងមុន៕
Tag:
ភ្លៀង
ទឹកលិចផ្លូវ
ម៉េត មាសភក្តី
សំរាមភ្នំពេញ
អាកាសធាតុ
© រក្សាសិទ្ធិដោយ thmeythmey.com