Ronaldo ថាកីឡាករវ័យស្របាលខ្លួនទៅលេងនៅចិន និងកាតាអស់ហើយ

កីឡាអន្តរជាតិ

អន្តរជាតិ

Ronaldo ថាកីឡាករវ័យស្របាលខ្លួនទៅលេងនៅចិន និងកាតាអស់ហើយ

17, Jul 2018 , 4:03 pm

រូបភាព

រូបភាពពីផេកហ្វេសប៊ុកផ្លូវការ Juventus

ដោយ: ទេព ពិទូរ្យ

តារាឆ្នើម Cristiano Ronaldo បានបង្ហាញការដឹងគុណចំពោះក្លិប Juventus ដែលផ្តល់ឱកាសឲ្យខ្លួន បើទោះបីជាអាយុរច្រើនបន្តិចទៅហើយក្តី។ បុរសវ័យ៣៣ឆ្នាំលើកឡើងថា កីឡាករភាគច្រើនដែលមានអាយុរប្រហែលៗនេះ «ភាគច្រើនតែងតែទៅប្រកបអាជីពក្នុងប្រទេសកាតា ឬចិនអស់ហើយ»។ នេះបើតាមការផ្សាយរបស់ BBC។

អត្ថបទទាក់ទង

ផ្លូវការ! Ronaldo ចុះកិច្ចសន្យា៤ឆ្នាំជាមួយសេះបង្កង់ Juventus

ខ្សែប្រយុទ្ធសញ្ជាតិព័រទុយហ្គាល់ បានទៅចូលរួមជាមួយក្រុមម្ចាស់ជើងឯកអ៊ីតាលី Serie A ក្នុងតម្លៃ ៩៩,២ លានផោន (១១៧លានដុល្លារអាមេរិក) ដោយចុះកិច្ចសន្យារយៈពេល ៤ឆ្នាំ បន្ទាប់ពីរួមរស់ជាមួយ Real Madrid ជិត១០រដូវកាល។

«ខ្ញុំសប្បាយចិត្តខ្លាំងណាស់ ដែលបានមកកាន់ក្លិបនេះ ដែលជាដំណាក់កាលមួយទៀតនៃអាជីពរបស់ខ្ញុំ»។ Ronaldo និយាយដូច្នេះនៅពេលបង្ហាញខ្លួននៅឯក្លិបសេះបង្កង់លើកដំបូង។

អតីតសមាជិក Manchester United រូបនេះសង្ឃឹមថាខ្លួននឹងក្លាយជា «តារាមានសំណាង» របស់ក្រុមពីលីគកីឡាបាល់ទាត់អ៊ីតាលីមួយនេះដើម្បីឈ្នះពានរង្វាន់ UEFA Champions League។

ជុំវិញការផ្លាស់ពីទឹកដី Santiago Bernabéu ទៅកាន់ Allianz Stadium នេះ ម្ចាស់ពាន Ballon d'Or ៥សម័យ រៀបរាប់ថាមិនមានក្លិបណាទាក់ទងរូបគេទេ គឺមានតែ Juventus មួយគត់។

Ronaldo បានចាកចេញពីបិសាចក្រហមទៅចូលរួមជាមួយក្រុមស្តេចស ក្នុងតម្លៃខ្លួនជាកំណត់ត្រាពិភពលោក ៨០លានផោន (១០៦លានដុល្លារ) កាលពីឆ្នាំ២០០៩ និងរកគ្រាប់បាល់ស៊ុតបញ្ចូលទីបាន ៤៥១ គ្រាប់។ ខ្សែប្រយុទ្ធរហស្សនាម CR7 បានជួយ Real លើកពាន Champions Leagues ៤ដង និង La Liga ២លើក ក្រៅពីនោះ ក៏បាននាំជម្រើសជាតិព័រទុយហ្គាល់លើកពាន Euro 2016 ១លើកផងដែរ៕