ជាតិ
ព្រះមហាក្សត្រ៖ លោក ជិន ដាយក្វាង ជាថ្នាក់ដឹកនាំល្អប្រពៃមួយរូបនៃប្រជាជនវៀតណាម
× ភ្នំពេញ៖ ព្រះមហាក្សត្រសម្ដេចព្រះបរមនាថ នរោត្តម សីហមុនី បានផ្ញើសាររំលែកទុក្ខជាមួយប្រជាជនវៀតណាម ដែលបានបាត់បង់ប្រធានាធិបតី លោក ជិន ដាយក្វាង។
សម្ដេចព្រះបរមនាថ នរោត្តម សីហមុនី បានបញ្ជាក់នៅក្នុងសារលិខិតរំលែកទុក្ខថា មរណភាពរបស់លោក ជិន ដាយក្វាង (Trần Đại Quang) គឺជាការបាត់បង់ថ្នាក់ដឹកនាំដ៏ឆ្នើម និងល្អប្រពៃមួយរូប នៃប្រជាជនវៀតណាម ដែលបានចូលរួមចែករំលែកយ៉ាងសកម្មក្នុងការកសាង និងអភិវឌ្ឍន៍សាធារណរដ្ឋសង្គមវៀតណាម។
ប្រធានាធិបតីវៀតណាមលោក Tran Dai Quang ទទួលមរណភាពនៅថ្ងៃ ២១ ខែកញ្ញានេះដោយសារមានជំងឺធ្ងន់ធ្ងរ។ប្រមុខរដ្ឋវៀតណាមរូបនេះស្ថិតក្នុងស្ថានភាពធ្ងន់ធ្ងរយូរហើយ ហើយលោកក៏បានទទួលការព្យាបាលពីគ្រូពេទ្យជំនាញទាំងក្នុងស្រុក និងបរទេសដែរ មុនទទួលមរណភាពនេះ។ ប៉ុន្តែមិនមានការបញ្ជាក់ពីខាងមន្ទីរពេទ្យឡើយជុំវិញប្រភេទជំងឺរបស់ប្រធានាធិបតីរូបនេះ។
លោក Dai Quang បានស្បថចូលកាន់តំណែងជាប្រធានាធិបតីវៀតណាមនៅក្នុងខែមេសា ឆ្នាំ ២០១៦ ដោយជំនួសតំណែងលោក Truong Tan Sang។ លោកក៏ជាប្រមុខរដ្ឋវៀតណាមដំបូងគេដែលបានស្លាប់ក្នុងតំណែង៕
Tag:
សង្គម
កម្ពុជាវៀតណាម
© រក្សាសិទ្ធិដោយ thmeythmey.com