UCL៖ ក្រុមពីអេស្ប៉ាញ អាល្លឺម៉ង់ និងអ៊ីតាលីសុទ្ធតែឈ្នះ ខណៈក្រុមអង់គ្លេសចាញ់ទាំងពីរ

កីឡាអន្តរជាតិ

អន្តរជាតិ

UCL៖ ក្រុមពីអេស្ប៉ាញ អាល្លឺម៉ង់ និងអ៊ីតាលីសុទ្ធតែឈ្នះ ខណៈក្រុមអង់គ្លេសចាញ់ទាំងពីរ

04, Oct 2018 , 11:08 am

រូបភាព

ដោយ: រួបរួម

Tottenham Hotspur និង Liverpool សុទ្ធតែរងបរាជ័យនាការប្រកួតសប្តាហ៍ទីពីរវគ្គ Group Stage នៃក្របខណ្ឌ UEFA Champions League កាលពីរាត្រីថ្ងៃពុធ។ ចំណែកឯក Messi, Neymar, Griezmann, Reys និង Nainggolan សុទ្ធតែបានស៊ុតបាល់បញ្ចូលទីសម្រាប់ជ័យជម្នះរបស់ក្រុមរៀងៗខ្លួន។

អត្ថបទទាក់ទង

UCL៖ Real ចាញ់ ខណៈ Bayern និង Man United បានត្រឹមស្មើនៅក្នុងដី

នៅក្នុងពូល A ក្រុម Borussia Dortmund និង Atletico Madrid សុទ្ធតែដណ្តើមបាន៣ពិន្ទុបន្ថែមទៀតនៅក្នុងទឹកដី។ Jacob Bruun Larsen, Francisco Alcacer និង Marco Reus បានស៊ុតបាល់បញ្ចូលទីម្នាក់១គ្រាប់ក្នុងជ័យជម្នះ ៣-០ របស់ Dortmund លើ Monaco។

ជាមួយគ្នានេះ Antoine Griezmann រកបាន២គ្រាប់ និង Koko បន្ថែម១គ្រាប់ ខណៈ Atletico Madrid ឈ្នះ Club Brugge របស់បែលហ្ស៊ិក ៣-១ ។ មួយគ្រាប់របស់ Brugge រកបានដោយ Arnaut Groeneveld។

សម្រាប់ពូល B ក្រុម Barcelona និង Inter Milan ក៏រកបាន៣ពិន្ទុបន្ថែមទៀតផងដែរនៅក្រៅដី។ Lionel Messi ស៊ុតបាល់បញ្ចូលទី២គ្រាប់ក្នុងជ័យជម្នះរបស់ Barcelona ៤-២ លើម្ចាស់ផ្ទះ Tottenham Hotspur ដោយ២គ្រាប់ដំបូងសម្រេចបាននៅតង់ទីមួយ ដោយ Philippe Coutinho និង Ivan Rakitic ខណៈ Harry Kane និង Erik Lamela ជាអ្នកដែលរកគ្រាប់បញ្ចូលទីឲ្យ Spurs។

នៅទឹកដី PSV Eindhoven កីឡាករ Radja Nainggolan និង Maura Icardi របស់ Inter Milan បានស៊ុតបាល់បញ្ចូលទីជាបន្តបន្ទាប់ដើម្បីវាយបកតាមពីក្រោយការនាំមុខរបស់ Pablo Rosario នៃក្រុមម្ចាស់ផ្ទះ ដោយបញ្ចប់ក្នុងលទ្ធផល ២-១ ។

ចំណែកពូល C ក្លិប Paris Saint Germain ស្តារការខកចិត្តរបស់ខ្លួនកាលពីជើងទីមួយ តាមរយៈជ័យជម្នះ ៦-១ លើក្រុមភ្ញៀវ FK Crvena Zvezda ពីស៊ែប៊ី។ Neymar រកបាន៣គ្រាប់ Edinson Cavani, Angel Di Maria និង Kylian Mbappe បន្ថែមម្នាក់១គ្រាប់ ខណៈ១គ្រាប់របស់ភ្ញៀវ សម្រេចបានដោយ Marko Marin។

ជាមួយគ្នានេះ Napoli ឡើងទៅឈរលេខ១បណ្តោះអាសន្នក្នុងពូល ដោយ Lorenzo Insigne រកបានគ្រាប់បាល់បញ្ចូលទីចុងម៉ោង ដើម្បីដណ្តើមបានបីពិន្ទុពីភ្ញៀវ Liverpool ជាមួយនឹងលទ្ធផល ១-០ ។

ដោយឡែកនៅក្នុងពូល D ក្រុម FC Porto និង Schalke 04 សុទ្ធតែទទួលបានជ័យជម្នះ ១-០ នាការប្រកួតសប្តាហ៍ទីពីរ។ នៅទឹកដីរុស្ស៊ីរបស់ក្រុម Lokomotiv Moscow កីឡាករ Weston McKennie បានស៊ុតបាល់បញ្ចូលទីនៅ២នាទីចុងក្រោយមុនបញ្ចប់ការប្រកួតដើម្បីនាំជ័យជម្នះសម្រាប់ Schalke 04។

រីឯនៅទឹកដី FC Porto វិញ កីឡាករ Moussa Marega បានស៊ុតបាល់បញ្ចូលទីនៅដើមតង់ទីពីរ ដើម្បីនាំឲ្យ Porto ដណ្តើមបាន៣ពិន្ទុពីភ្ញៀវតួកគី Galatasaray៕