ជាតិ
កាំកុងត្រូល៖ ម្ចាស់ស្ថានីយ/ដេប៉ូ ប្រេង ប្រឈមផ្លូវច្បាប់ បើរកឃើញភាពមិនត្រឹមត្រូវជាលើកទីពីរ
×![]()
ភ្នំពេញ៖ កាំកុងត្រូល នឹងការព្យួរអាជ្ញាប័ណ្ណផ្អាកអាជីវកម្មបណ្តោះអាសន្ន និងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ទៅលើស្ថានីយ ឬដេប៉ូប្រេងឥន្ទនៈដដែល មានភាពមិនត្រឹមត្រូវជាលើកទីពីរ ក្រោយពីមានណែនាំជាលើកទីមួយរួច។ នេះជាការឆ្លើយតបរបស់អគ្គនាយកដ្ឋានកាំកុងត្រូលទៅលោក ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដែលសំដែងការងឿងឆ្ងល់ទាក់ទងនឹងចំណាត់ការរបស់មន្ត្រីកាំកុងត្រូលលើអ្នកដែលគៃបំបាត់ប្រេងពីអ្នកទិញ។
តាមរយៈហ្វេសប៊ុករបស់ខ្លួន លោក ណៅ ធួក បានសរសេបែបងឿងឆ្ងល់ថា អ្នកគៃប្រេងរាប់ម៉ឺនលីត្រ បែរជាអត់មានការផាកពិន័យ ឬផ្តន្ទាទោស។ លោកកត់សម្គាល់ថា ចោរលួចកង់ ម៉ូតូ ត្រូវជាប់គុក ប៉ុន្តែអ្នកលួចប្រេងអស់វាល់ម៉ឺនរាប់សែនដុល្លារ គ្រាន់តែឲ្យធ្វើកិច្ចសន្យាបញ្ឈប់។
អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានបកស្រាយទៅលោករដ្ឋលេខាធិការកសិកម្មថា ស្ថាប័នជំនាញនេះ ដាក់ចេញនូវវិធានការពីរដើម្បីអនុវត្តលើការត្រួតពិនិត្យប្រេងឥន្ធនៈនៅតាមបណ្តាស្ថានីយ ឬដេប៉ូចែកចាយប្រេងនានា។
«វិធានការទី១. ភាពមិនប្រក្រតីដែលត្រូវបាន រកឃើញលើកទីមួយ ដែលមានកម្រិតលំអៀងលើបរិមាណប្រេងលក់ចេញ និងកម្រិតគុណភាពអុកតាន (Octane) តម្រូវឱ្យម្ចាស់ស្ថានីយ ឬដេប៉ូ ធ្វើកិច្ចសន្យាកែតម្រូវភាពមិនប្រក្រតីឡើងវិញ ។ ទន្ទឹមនេះ នឹងមានផ្សព្វផ្សាយ ឈ្មោះស្ថានីយ ឬដេប៉ូប្រេងឥន្ធន:ដែលមិនប្រក្រតីនោះ តាមបណ្តាញទូរទស្សន៍ និងប្រព័ន្ធផ្សព្វផ្សាយផ្សេងៗទៀត។ វិធានការទី២. ក្នុងករណីស្ថានីយ ឬដេប៉ូដដែល មានភាពមិនប្រក្រតីជាលើកទីពីរ អគ្គនាយកដ្ឋានកាំកុងត្រូល នឹងស្នើសុំក្រសួង ពាណិជ្ជកម្ម ធ្វើការព្យួរអាជ្ញាប័ណ្ណផ្អាកអាជីវកម្មជាបណ្តោះអាសន្ន និងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី» ។ នេះជាការឆ្លើយតបរបស់អគ្គនាយកដ្ឋានកាំកុងត្រូល។
ស្ថាប័នមួយនេះ បានអះអាងប្រាប់លោក ណៅ ធួក បន្ថែមថា ចំពោះនីតិវិធីត្រួតពិនិត្យ គឺមិនទុកឱកាសយូរដល់ស្ថានីយ ឬដេប៉ូ ដែលមានភាពមិនប្រក្រតីនោះទេ ហើយក៏មិនឱ្យម្ចាស់ស្ថានីឬដេប៉ូដឹងមុនដែរ៕
Tag:
ប្រេង
កាំកុងត្រូល
តុលាការ
ណៅ ធួក
© រក្សាសិទ្ធិដោយ thmeythmey.com
