អ្នកចម្រៀងរ៉េបសាំង សុខសេរី ថានាងក្លាហានខ្លាំងក្រោយបានហាត់ក្បាច់គុន

ONE Championship

កីឡាជាតិ

ជាតិ

អ្នកចម្រៀងរ៉េបសាំង សុខសេរី ថានាងក្លាហានខ្លាំងក្រោយបានហាត់ក្បាច់គុន

12, Jan 2019 , 7:59 am

រូបភាព

ដោយ: សារព័ត៌មានថ្មីៗ

នៅពេលដែលអ្នកចម្រៀងរ៉េបខ្មែរ សាំង សុខសេរី ឡើងឆាកតន្ត្រីម្តងៗ នាងមានភាពក្លាហាន និងទំនុកចិត្តខ្ពស់ដោយសារធ្លាប់ប្រឡូកក្នុងការសម្តែងជាយូរឆ្នាំ ហើយមូលហេតុមួយទៀតគឺមកពីនាងបានហាត់ក្បាច់គុននៅក្លិប Cambodian Top Team (CTT)។

ក្នុងរយៈពេលពីរទៅបីខែនេះ តារាចម្រៀងដ៏ស្រសស្អាចវ័យ ២៦ឆ្នាំនេះ បានចូលហាត់ក្បាច់គុននៅក្លិបប្រដាល់កំពុងតែមានឈ្មោះល្បីនៅភ្នំពេញ ដែលមានជើងខ្លាំងអាជីពល្បីៗជាច្រើនរូបប្រចាំ ONE Championship

ដូចជា រិន សារត្ន័ និងនៅ ស្រីពៅ ជាដើមកំពុងហ្វឹកហាត់ប្រចាំការនៅទីនោះ។

កាលពីក្មេង សុខសេរី ធ្លាប់ត្រូវគេធ្វើបាប ដូច្នេះនាងមិនសូវជាហ៊ានជាមួយគេទេ នាងមានអារម្មណ៍ថាចាប់តាំងពីនាងបានហាត់ក្បាច់គុនមក វាបានផ្តល់ភាពវិជ្ជមានច្រើនដល់ផ្នែកស្មារតី និងរាងកាយរបស់នាង។

សុខសេរី ប្រាប់ថា៖ «ហាត់ក្បាច់គុនបានផ្លាស់ប្តូរខ្ញុំខ្លាំងមែនទែន។ កាលនៅក្មេងខ្ញុំខ្សោយណាស់ អ៊ីចឹងក្មេងដ៏ទៃគេធ្វើបាបខ្ញុំ។ តែឥឡូវ គ្មានអ្នកណាហ៊ានទេ!»

ចាប់តាំងពីក្លិបកីឡារ CTT បើកទ្វារស្វាគមន៍ Tiny Toones ដែលអង្គការក្រៅរដ្ឋាភិបាលមួយធ្វើការយ៉ាងសកម្មក្នុងការជួយកុមារទទួលរងហានិភ័យខ្ពស់ ខណៈដែលកញ្ញា សុខសេរី ក៏មានចំណែកដើរតួយ៉ាងសំខាន់នៅក្នុងកម្មវិធីនោះដែរ។

Tiny Toones ប្រើប្រាស់តន្ត្រី និងការរាំ ជាការបំផុសគំនិត និងការអប់រំសម្រាប់ក្មេងៗដែលបានចុះឈ្មោះចូលកម្មវិធី ជាមួយការជួយជ្រមជ្រែងពីក្លិប CTT ផង ឥឡូវគេបានដាក់បញ្ចូលក្បាច់ការពារខ្លួនក្នុងវគ្គសិក្សាផងដែរ។

សុខសេរី និយាយថា៖ «វាល្អត្រង់ថាយើងអាចប្រាប់ពួកគាត់ពីរបៀបប្រើក្បាច់ខុសៗគ្នា និងបង្រៀនគាត់ពីរបៀបការពារខ្លួន។ ដូច្នេះពេលគាត់ជួបអ្នកធ្វើបាប គាត់ចេះដោះខ្លួនបាន»។

Tiny Toones នៅតែជាកន្លែងមួយដែលពិសេសដក់ជាប់បេះដូងនាង ហើយនាងនឹងព្យាយាមត្រលប់មកជួយកន្លែងនេះតាមលទ្ធភាពដែលអាចធ្វើបាន។

នាងចែករំលែកពីប្រវត្តិផ្ទាល់ថា៖ «ខ្ញុំធ្លាប់ជាសិស្សនៅទីនោះ។ ពេលខ្ញុំរៀនចប់ ខ្ញុំបានជួយដើរប្រមូលថវិការឲ្យពួកគាត់»។

«ពីមុន ខ្ញុំមកធ្វើការស្ម័គ្រចិត្តជួយប្រមែប្រមូលក្មេងៗក្រីក្រពីសហគមន៍នានាដើម្បីឲ្យពួកគាត់មករៀននៅ Tiny Toones»។

អ្នកចំរៀងរ៉េបស្រីរូបនេះ កំពុងមានប្រជាប្រិយភាពខ្ពស់ក្នុងវិស័យសិល្បៈនៅកម្ពុជា ដោយសារនាងមានវត្តមានសម្តែងសឹងគ្រប់ទីកន្លែង។ តែទោះយ៉ាងណាក្តី នាងមិនដែលភ្លេចថាជោគជ័យដល់សព្វថ្ងៃនេះ គឺមានប្រភពមកពីណាឡើយ។

«ខ្ញុំចេះក្បាច់ហ៊ីបហប និងច្រៀងរ៉េបពីក្រុម Tiny Toones។ តាមពិតទៅខ្ញុំចាប់រៀនរាំ Breakdance មុន បន្ទាប់មកបានរៀនច្រៀងរ៉េបតាមក្រោយ។ សព្វថ្ងៃខ្ញុំសរសេរបទភ្លេងដោយខ្លួនឯងតែម្តង។»

ទន្ទឹមនឹងមានភាពល្បីល្បាញខ្លាំង នាងរំលឹកថាក្បាច់គុនបានជួយបង្កើនជំនឿចិត្តនាងច្រើន ហើយនាងចង់ណែនាំមិត្តនារីៗទាំងឡាយឲ្យហាត់រៀនដូចគ្នា។

«ខ្ញុំមានអារម្មណ៍ថាខ្លាំងជាងមុន ហើយខ្ញុំចេះស្នៀតការពារខ្លួនទៀត អ៊ីចឹងវាធ្វើឲ្យខ្ញុំមានជំនឿចិត្តខ្ពស់។ ជាធម្មតាយើងដូចជាអត់ត្រូវប្រើកម្លាំងច្រើនទេ ប៉ុន្តែត្រូវចេះប្រើស្នៀតដើម្បីការពារខ្លួនយើងពេលយើងស្លន់ស្លោ!»

ប៉ុន្មានខែចុងក្រោយនេះ យើងសង្កេតឃើញថាមានស្ត្រីខ្មែរជាច្រើនរូបចាប់ផ្តើមមានឈ្មោះបោះសំឡេងក្នុងវិស័យកីឡា ក្នុងនោះមានកញ្ញា ឯម សុវណ្ណារី ដែលបានបញ្ចេញថ្វីដៃកក្រើកសង្វៀន ONE Championship ក៏ដូចជាកីឡាការិនី នៅ ស្រីពៅ ដែលថ្មីៗនេះទើបបានពានរង្វាន់ «អ្នកប្រដាល់ស្រីប្រចាំឆ្នាំ» ពីកម្មវិធី Lethwei World Championship ជាដើម។

សុខសេរី ជឿជាក់ថាក្បាច់គុនដើរតួយ៉ាងសំខាន់ដើម្បីជួយលើកតម្កើងនារីៗទៅថ្ងៃមុខ។

នាងបន្ថែមថា៖ «ខ្ញុំគិតថាក្បាច់គុនគឺល្អណាស់ ពីព្រោះស្រីៗខ្លះពូកែភ័យខ្លាចច្រើន ដូច្នេះក្បាច់គុនអាចជួយឲ្យគាត់ហ៊ាន និងបាត់ភ័យខ្លាច»។

«ហោចណាស់យើងចេះការពារខ្លួនឯង នោះហើយជាការជំរុញទឹកចិត្តដ៏ល្អមួយ!»៕

អត្ថបទ៖ Matias Andres