ជាតិ
ករណីលោក កឹម សុខា៖ ក្រសួងយុត្តិធម៌ ចាត់ទុកសម្តីទូតអាមេរិកជាការទម្លាក់កំហុសអសុទ្ធិចិត្តលើស្ថាប័នច្បាប់
×![]()
ភ្នំពេញ៖ ស្ថានទូតអាមេរិកប្រចាំកម្ពុជា ដែលចាត់ទុកករណីឃុំខ្លួនលោក កឹម សុខា អតីតប្រធានគណបក្សសង្គ្រោះជាតិ ជារឿងអយុត្តិធម៌នោះ គឺជាកាយវិការមិនគោរពអធិបតេយ្យភាព និងឯករាជ្យកម្ពុជា ដោយទម្លាក់កំហុសលើស្ថាប័នអនុវត្តច្បាប់ ។ នេះជាការឆ្លើយតបរបស់ក្រសួងយុត្តិធម៌ ទៅស្ថានទូតអាមេរិក។
ក្រសួងយុត្តិធម៌ ដែលមិនពេញចិត្តការបកស្រាយរបស់ស្ថានទូតអាមេរិក ចាត់ទុកសម្តីបែបនេះថា ជាចេតនាបំភ្លៃ និងបំភ័ន្តសាធារណមតិជាតិ និងអន្តរជាតិ ឲ្យមានការយល់ច្រឡំចំពោះការអនុវត្តនីតិវិធី និងការអនុវត្តច្បាប់ ដោយតុលាការកម្ពុជា ដែលជាស្ថាប័នឯករាជ្យ ពាក់ព័ន្ធនឹងសំណុំរឿងព្រហ្មទណ្ឌរបស់លោក កឹម សុខា។
សេចក្តីថ្លែងការណ៍ ២ទំព័ររបស់ក្រសួងយុត្តិធម៌ ឆ្លើយតបទៅស្ថានទូតអាមេរិក យ៉ាងដូច្នេះថា៖«សម្ដែងនូវការសោកស្ដាយជាខ្លាំងចំពោះការផ្សព្វផ្សាយព័ត៌មាន ដោយគ្មានមូលដ្ឋានច្បាប់របស់ស្ថានទូតសហរដ្ឋអាមេរិកនៅភ្នំពេញ ដែលមានចរិកជាការបំភ្លៃ និងការបំភ័ន្តការយល់ដឹងរបស់សាធារណមតិចំពោះករណីសំណុំរឿងព្រហ្មទណ្ឌដែលមានជនត្រូវចោទឈ្មោះ កឹម សុខា ហើយទម្លាក់កំហុស ដោយអសុទ្ធចិត្តលើស្ថាប័នអនុវត្តច្បាប់កម្ពុជា ដែលបានអនុវត្តតួនាទីសមត្ថកិច្ចរបស់ខ្លួនដោយឯករាជ្យត្រឹមត្រូវតាមច្បាប់ និងនីតិវិធីជាធរមានរបស់ព្រះរាជាណាចក្រកម្ពុជា»។
កាលពីពេលថ្មីៗនេះ ស្ថានទូតអាមេរិក បានសរសេរលើហ្វេសប៊ុកខ្លួនថា៖«តើអ្នកមានដឹងទេថា លោក កឹម សុខា បានជាប់ក្នុងការឃុំឃាំងជិត១៨ខែមកហើយ? វាមានរយៈពេល៥៣០ថ្ងៃនៃការជាប់ឃុំ។គាត់ [លោក កឹម សុខា] ជាមនុស្សស្អាតស្អំ ដែលត្រូវបានឃុំខ្លួនដោយអយុត្តិធម៌ ក្រោមការចោទប្រកាន់មិនពិត។ មិនមានភស្តុតាងណាមួយប្រឆាំងនឹងគាត់ឡើយ ហើយក៏មិនទាន់ការកំណត់បើកសវនាការកាត់ទោសគាត់ដែរ។ គ្មានភស្តុតាង គ្មានសវនាការកាត់ទោស គ្មានយុត្តិធម៌…»។
ដោយសារការលើកឡើងបែបនេះហើយ ទើបក្រសួងយុត្តិធម៌ ចេញមុខបកស្រាយ តាមរយៈសេចក្តីថ្លែងការណ៍ខ្លួនដដែល ដោយលើកយកទឡ្ហីករណ៍៤ចំណុចពន្យល់ថា អាជ្ញាធរបានរកឃើញភស្តុតាងរឹងមាំជាច្រើនគ្រប់គ្រាន់ ដែលបង្ហាញថាលោក កឹម សុខា មានជាប់ពាក់ព័ន្ធនឹងផែនការសម្ងាត់ ដោយឃុបឃិតគ្នាជាមួយបរទេសក្នុងការផ្តួលរំលំរដ្ឋអំណាចស្របច្បាប់នៅកម្ពុជា តាមបែបបដិវត្តពណ៌។ បន្ថែមពីនេះក្រសួងយុត្តិធម៌ អះអាងការពារចំណាត់ការតុលាការ ដោយបកស្រាយប្រាប់អាមេរិកទៀតថា សំណុំរឿងព្រហ្មទណ្ឌរបស់លោក កឹម សុខា កំពុងស្ថិតនៅក្នុងសមត្ថកិច្ចរបស់ចៅក្រមស៊ើបសួរ ដែលកំពុងអនុវត្តនីតិវិធីនានាស្របតាមក្រមព្រហ្មទណ្ឌរបស់កម្ពុជា ដោយមិនខុសពីការអនុវត្តច្បាប់របស់ប្រទេសដទៃកន្លងមកនោះទេ។
ត្រង់ចំណុចនេះក្រសួងយុត្តិធម៌ បកស្រាយផ្នែកច្បាប់កម្ពុជាទៅស្ថានទូតអាមេរិកថា ចំណាត់ការបន្តរបស់តុលាការនោះ គឺចៅក្រមស៊ើបសួរត្រូវបានផ្ដល់ពេលវេលាចាំបាច់នានា សម្រាប់ការស៊ើបសួរ និងការស្រាវជ្រាវប្រមូលភស្តុតាងឲ្យបានគ្រប់គ្រាន់ មុននឹងសម្រេចដោយឆន្ទានុសិទ្ធិ និងដោយឯករាជ្យក្នុងការបិទ្ធបញ្ចប់ការស៊ើបសួររបស់ខ្លួន ដែលអាចជាការសម្រេចលើកលែងការចោទប្រកាន់ ឬការសម្រេចបញ្ជូនរឿងទៅជំនុំជម្រះនៅក្នុងដំណាក់កាលនីតិវិធីបន្ទាប់។ ដូច្នេះតាមច្បាប់របស់កម្ពុជា ស្ថាប័នដែលមានសមត្ថកិច្ចក្នុងការសម្រេចថា លោក កឹម សុខា ជាមនុស្សស្អាតស្អំ ឬពិតជាមានកំហុសទាក់ទងនឹងការចោទប្រកាន់អំពើឃុបឃិតជាមួយបរទេស ដើម្បីផ្តួលរំលំរដ្ឋអំណាចស្របច្បាប់នោះ គឺមានតែស្ថាប័នតុលាការប៉ុណ្ណោះ។
«សូមអំពាវនាវដ៏ទទូចដល់ស្ថានទូតសហរដ្ឋអាមេរិកនៅភ្នំពេញ សូមបញ្ឈប់ការបកស្រាយដោយបំភ័ន្ត និងលាបពណ៌នយោបាយទៅលើការអនុវត្តច្បាប់របស់ស្ថាប័នមានសមត្ថកិច្ច និងតុលាការ ដោយសូមទុកកិច្ចការនេះ ជូនស្ថាប័នតុលាការកម្ពុជា ចាត់ការតាមច្បាប់របស់កម្ពុជាក្នុងឋានៈជារដ្ឋអធិបតេយ្យ»។ នេះជាការលើកឡើងរបស់ក្រសួងយុត្តិធម៌។
មិនមែនតែក្រសួងយុត្តិធម៌ទេ ដែលប្រតិកម្មតបនឹងស្ថានទូតអាមេរិក សូម្បីតែក្រសួងការបរទេសកម្ពុជា ក៏បានចេញមុខការពារចំណាត់ការនានារបស់រដ្ឋាភិបាល និងស្ថាប័នរដ្ឋកម្ពុជា ជុំវិញករណីលោក កឹម សុខានេះ ។ ដ្បិតមិននិយាយចំៗ ប៉ុន្តែក្រសួងការបរទេសកម្ពុជា បានក្រើនរម្លឹកដល់ស្ថានទូតអាមេរិក អំពីការផ្សារភ្ជាប់ចំណងការទូតរវាងប្រទេសទាំងពីរ អំពីមាត្រា៤១នៃអនុសញ្ញាទីក្រុងវីយែនឆ្នាំ១៩៦១ ដែលជាពិសេសតម្រូវឱ្យស្ថានទូតសហរដ្ឋអាមេរិក គោរពច្បាប់និងបទប្បញ្ញត្តិនានា និងមិនត្រូវជ្រៀតជ្រែកចូលកិច្ចការផ្ទៃក្នុងរបស់កម្ពុជាឡើយ៕
Tag:
កឹម សុខា
អាមេរិក
ច្បាប់
© រក្សាសិទ្ធិដោយ thmeythmey.com
