មួយរយៈចុងក្រោយ បណ្តាប្រទេសក្នុងតំបន់អាស៊ាន បានប្រឈមអាកាសធាតុក៏ក្ដៅ ដោយមានសីតុណ្ហភាពដល់ ៤៤អង្សា។ ថៃក៏ជាប្រទេសមួយរងកម្តៅដ៏ខ្លាំងផងដែរ ដោយសីតុណ្ហភាពនៅខេត្តភាគខាងជើង Lampang មានប្រមាណ ៤៤,២អង្សា។ 

 

ពាក់ព័ន្ធនឹងអាកាសធាតុដ៏អាក្រក់បែបនេះ មនុស្សជាច្រើនបានបាត់បង់ជីវិត បើទោះកន្លងមកអាជ្ញាធរ បានចេញសេចក្តីណែនាំឱ្យពលរដ្ឋមានការប្រុងប្រយ័ត្ន និងកាត់បន្ថយការចេញទៅក្រៅក្តី។

 

«ក្រសួងសុខាភិបាល បានបញ្ជាក់នៅថ្ងៃទី១០ ខែឧសភាថា មនុស្សចំនួន ៦១នាក់ បានស្លាប់ ដោយសារកម្តៅនៅក្នុងខ្លួនខ្លាំង ចាប់តាំងពីដើមឆ្នាំ២០២៤មក បើធៀបនឹង ៣៧ករណី នៅក្នុងឆ្នាំ២០២៣»។ ទីភ្នាក់ងារព័ត៌មាន AFP បានស្រង់សេចក្តីប្រកាសរបស់ក្រសួងសុខាភិបាលថៃបែបនេះ។​

 

ក្នុងពេលមានសីតុណ្ហភាពដ៏ខ្ពស់បែបនេះ តំបន់ភាគខាងជើង ដែលទទួលរងកម្តៅក្តៅខ្លាំង មានអ្នកស្លាប់ច្រើនជាងគេ។ 

 

ទន្ទឹមនេះ លោក Apichart Vachiraphan នាយករងនៃនាយកដ្ឋានគ្រប់គ្រងជំងឺឆ្លង បានព្រមានប្រជាជន ដែលមានជំងឺចេញទៅខាងក្រៅច្រើន ដើម្បីការពារខ្លួនពីអាកាសធាតុក្តៅខ្លាំង និងបង្ការផលប៉ះពាល់ដល់សុខភាព។ 

 

កន្លងមក អង្គការអាកាសធាតុពិភពលោករបស់អង្គការសហប្រជាជាតិ ធ្លាប់បានព្រមានថា បាតុភូតEl Nino នឹងធ្វើឱ្យមានអាកាសធាតុក្តៅប្លែកពីឆ្នាំមុនៗ ដោយតំបន់អាស៊ីរងគ្រោះជាងតំបន់ផ្សេង៕