២៤ឆ្នាំ គន្ធបុប្ផាបានចំណាយ៥៦៣លានដុល្លារជួយជីវិតកុមារខ្មែរ

ជាតិ

២៤ឆ្នាំ គន្ធបុប្ផាបានចំណាយ៥៦៣លានដុល្លារជួយជីវិតកុមារខ្មែរ

31, Mar 2017 , 8:19 am

រូបភាព

ដោយ: ថ្មីៗ

មន្ទីរពេទ្យគន្ធបុប្ជា បានចំណាយថវិកាអស់ចំនួន៥៦៣លានដុល្លារហើយ ក្នុងបេសកកម្មសង្គ្រោះជីវិតកុមារក្រីក្ររបស់កម្ពុជា ចាប់តាំងពីឆ្នាំ១៩៩២មក ពោលគឺរយៈពេល២៤ឆ្នាំមកហើយ។ តួលេខចំណាយនេះ ត្រូវបានបង្ហាញនៅក្នុងរបាយការណ៍មួយដែលផ្សព្វផ្សាយនៅក្នុងហេ្វសប៊ុកផ្ទាល់ខ្លួនរបស់លោកវេជ្ជបណ្ឌិត Beat Richner(បេអាត រីច្នឺ) ប្រធាន និងស្ថាបនិកនៃមន្ទីរពេទ្យគន្ធបុប្ផា។

បើតាម លោក បេអាត រីច្នឺ ក្នុងចំណោមថវិកាទាំង៥៦៣លានដុល្លារនោះ ៨៦,៤ភាគរយ គឺជាវិភាគទានសប្បុរសជនដែលភាគច្រើនមកពីប្រជាជនរស់នៅក្នុងប្រទេសស្វីស ៤,៧ភាគរយ បានមកពីការចូលរួមវិភាគទានរបស់រាជរដ្ឋាភិបាលកម្ពុជា និង៨,៩ភាគរយបានមកពីការចូលរួមវិភាគទានរបស់រាជរដ្ឋាភិបាលស្វីស។

«ក្នុងរយៈពេល២៤ឆ្នាំមកនេះមានកុមារឈឺចំនួន១៤,៨៣៧,១៥៥នាក់ ដែលបានទទួលការពិនិត្យ ព្យាបាលនៅក្នុងផ្នែកពិគ្រោះជំងឺក្រៅ និងកុមារដែលមានជំងឺ និងរបួសធ្ងន់ៗ មានចំនួន១,៥១៦,៤៧១នាក់ ត្រូវបានជួយសង្គ្រោះ និងបានជាសះស្បើយនៅ មន្ទីរពេទ្យគន្ធបុប្ផា។ ៨០ភាគរយនៃកុមារដែលមានជំងឺធ្ងន់ធ្ងរទាំងនោះ នឹងគ្មានសំណាងល្អឡើយប្រសិនបើមិនបានដាក់ឲ្យសម្រាកនៅមន្ទីរពេទ្យទេនោះ។ សម្រាប់ផ្នែកសម្ភពវិញ មានស្ត្រីចំនួន១៩២,៨៩៧នាក់មកសម្រាលកូន និងមានការពិនិត្យ តាមដានផ្ទៃពោះចំនួន ១,៣៩០,៣២៣ដង នៅក្នុងផ្នែកពិគ្រោះជំងឺក្រៅនៃសម្ភព» ។ នេះបើផ្អែកលើរបាយការណ៍ដដែល។

សូមបញ្ជាក់ថា មន្ទីរពេទ្យគន្ធបុប្ផា បានចំណាយថវិកាបានចំណាយថវិកា ចំនួន១២ម៉ឺនដុល្លារក្នុងមួយថ្ងៃៗដើម្បីព្យាបាលជំងឺដោយឥតគិតថ្លៃដល់ កុមារកម្ពុជា៕