លោក អេង ឆៃអ៊ាង ថា ឯកឧត្តម កឹម សុខា នៅតែជាប្រធានបក្ស ដោយគ្មានការប្រែប្រួលឡើយ

ជាតិ

នយោបាយជាតិ

លោក អេង ឆៃអ៊ាង ថា ឯកឧត្តម កឹម សុខា នៅតែជាប្រធានបក្ស ដោយគ្មានការប្រែប្រួលឡើយ

30, Mar 2017 , 1:30 pm

រូបភាព

ដោយ: ថ្មីៗ

ភ្នំពេញ៖ មន្ត្រីជាន់ខ្ពស់គណបក្សសង្គ្រោះជាតិ អះអាងថា ឯកឧត្តម កឹម សុខា នៅតែជាប្រធានគណបក្សដោយមិនមានការប្រែប្រួលអ្វីឡើយ បើទោះជាបញ្ហាសមាជបក្សកំពុងស្ថិតនៅក្នុងភាពចម្រូងចម្រាសគ្នា ដែលក្រសួងមហាផ្ទៃ សម្គាល់ឃើញផ្ទុយពីលក្ខន្តិកៈគណបក្សក្តី។

ក្រសួងមហាផ្ទៃ បានកត់សម្គាល់ឃើញថា សមាជវិសាមញ្ញ និងលក្ខន្តិកគណបក្សសង្គ្រោះជាតិ មិនមានអ្វីដែលបញ្ហាទេ។ តែអ្វីដែលក្រសួងមហាផ្ទៃជំទាស់នោះ គឺការជ្រើសរើសក្បាលម៉ាស៊ីនដឹកនាំបក្ស ដែលគណបក្សសង្គ្រោះជាតិ ត្រូវពិនិត្យមើលឡើងវិញ។

ត្រង់ចំណុចនេះ គណបក្សសង្គ្រោះជាតិ អះអាងថា ក្រោយពិនិត្យមើលលិខិត និងប្រើពេលបកស្រាយជាមួយតំណាងក្រសួងមហាផ្ទៃហើយនោះ ករណីជ្រើសរើសមេដឹកនាំបក្ស ដែលមានឯកឧត្តម កឹម សុខា ជាប្រធាននេះ គ្មានបញ្ហាអ្វីដែលត្រូវចោទនោះទេ។ អនុប្រធានគណបក្សសង្គ្រោះជាតិ លោក អេង ឆៃអ៊ាង បានសង្កត់ថា ឯកឧត្តម កឹម សុខា នៅតែជាប្រធានគណបក្ស ដោយគ្មានការប្រែប្រួលអ្វីឡើយ។

ឆ្លើយតបនឹងសំនួររបស់អ្នកកាសែត ជុំវិញភាពចម្រូងចម្រាសនៃក្បាលម៉ាស៊ីនដឹកនាំបក្សនោះ លោក អេង ឆៃអ៊ាង បានបញ្ជាក់ដូច្នេះថា៖«ទោះយ៉ាងណាក៏គាត់(កឹម សុខា) នៅតែជាប្រធាន។ ទាំងលក្ខន្តិកៈបក្សចាស់ក៏គាត់អាចធ្វើជាប្រធាន និងលក្ខន្តិកៈថ្មី (ពីរ) ក៏គាត់ជាប្រធាន»។

បើតាមលោក អេង ឆៃអ៊ាង គណបក្សលោក នឹងបន្តអនុវត្តការងារជាធម្មតា ដោយមិនមានការសើរើធ្វើសមាជបក្សជាថ្មីម្ដងទៀតនោះទេ។ ហើយគណបក្សសង្គ្រោះជាតិ ក៏មិនស្នើសុំជួបបកស្រាយបញ្ហាសមាជបក្សជាមួយក្រសួងមហាផ្ទៃបន្តទៀតដែរ។

កាលពីថ្ងៃទី២ មីនា គណបក្សសង្គ្រោះជាតិ បានធ្វើសមាជវិសាមញ្ញ ដោយបានបោះឆ្នោតជ្រើសតាំងឯកឧត្តម កឹម សុខា ជាប្រធាន លោក ប៉ុល ហំម លោកស្រី មួរ សុខហួរ និងលោក អេង ឆៃអ៊ាង ធ្វើជាអនុប្រធាន។

ជុំវិញបញ្ហានេះក្រសួងមហាផ្ទៃ ចាត់ទុកសមាជគណបក្សសង្គ្រោះជាតិនេះ បានធ្វើផ្ទុយពីលក្ខន្តិកៈគណបក្ស។ អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ លោក ប្រាក់ សំអឿន ក៏មិនបានបកស្រាយបញ្ជាក់អ្វីច្រើនដែរ ដោយលោកគ្រាន់តែស្នើឲ្យគណបក្សសង្គ្រោះជាតិ អនុវត្តឲ្យបានត្រឹមត្រូវចំពោះប្រការ៤៧ ត្រេទី២នៃលក្ខន្តិកៈគណបក្ស ដោយអណត្តិនៅសល់មានរយៈពេលតិចជាង១៨ខែ គិតត្រឹមកាលបរិច្ឆេទ ដែលលោក សម រង្ស៊ី បានលាលែងចេញពីតំណែងប្រធានគណបក្ស នៅថ្ងៃទី ១១ កុម្ភៈ ឆ្នាំ២០១៧។ លោក ប្រាក់ សំអឿន ក៏មិនទាន់អាចបញ្ជាក់ថា ក្រសួងមហាផ្ទៃ នឹងចាត់វិធានការបែបណាដែរ ទៅលើគណបក្សសង្គ្រោះជាតិ បើសិនជាមិនមានការកែប្រែក្បាលម៉ាស៊ីនបក្សនោះ។

ថ្លែងចំពោះមុខអ្នកកាសែត ក្រោយជំនួបជាមន្ត្រីគណបក្សសង្គ្រោះជាតិ អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃរូបនេះ បានអត្ថាធិប្បាយយ៉ាងដូច្នេះថា៖«សាមីគណបក្ស(CNRP) គាត់យកទៅមើលទៅលក្ខន្តិកៈចែងច្បាស់ហើយ។ មើលតែលក្ខន្តិកៈនេះ គាត់យកទៅធ្វើទៅ…។ ហើយវានឹងមានវិធានការជាបន្តបន្ទាប់ទៀត តែខ្ញុំមិនទាន់ដឹងទេ វាអាស្រ័យលើគណបក្សគាត់។ ក្រសួងមហាផ្ទៃអត់មានដាក់កំណត់អ្វីទេ តែសំខាន់ឲ្យតែគាត់អនុវត្តទៅតាមស្មារតីលិខិតពីរចំណុច បើគាត់អនុវត្តតាម វានឹងចប់រឿង»។

សមាជជ្រើសរើសក្បាលម៉ាស៊ីនដឹកនាំបក្ស កាលពីថ្ងៃទី២ មីនា ឯកឧត្តម កឹម សុខា ក៏បានទទួលសារជូនពរពីសម្ដេចនាយករដ្ឋមន្ត្រី ហ៊ុន សែន ផងដែរ។ សម្ដេច ហ៊ុន សែន បានសរសេរក្នុងលិខិតយ៉ាងខ្លីថា៖«នៅក្នុងឱកាសដែលឯកឧត្តម ត្រូវបានជ្រើសតាំងជាប្រធានគណបក្សសង្គ្រោះជាតិ ខ្ញុំសូមជូនពរឯកឧត្តម មានសុខភាពល្អ និងសុភមង្គលក្នុងគ្រួសារ»។

ត្រង់ចំណុចនេះ លោក ប្រាក់ សំអឿន បាននិយាយថា ករណីដែលសម្ដេច ហ៊ុន សែន ចេញសារគាំទ្រឯកឧត្តម កឹម សុខា ធ្វើជាប្រធានបក្សប្រឆាំងនោះ គឺជារឿងមួយផ្សេងដោយឡែក។ ចំណែកក្រសួងមហាផ្ទៃវិញ គ្រាន់តែជាស្ថាប័នអនុវត្តតាមច្បាប់ប៉ុណ្ណោះ៕