អន្តរជាតិ
អាមេរិកនឹងកែទម្រង់បេសកកម្មរក្សាសន្តិភាព UN ដើម្បីបន្ថយការខ្ជះខ្ជាយនិងបង្កើនប្រសិទ្ធភាព
× បេសកជនអាមេរិកប្រចាំអង្គការសហប្រជាជាតិលោកស្រី Nikki Haley បានព្រមានថា វានឹងមានការត្រួតពិនិត្យស៊ីជម្រៅមួយលើរាល់ប្រតិបត្តិការថែរក្សាសន្តិភាពពិភពលោករបស់អង្គការសហប្រជាជាតិដើម្បីកែទម្រង់និងធានាពីប្រសិទ្ធភាពនិងបន្ថយការខ្ជះខ្ជាយធនធាន។ ប្រតិបត្តិការរក្សាសន្តិភាពនៅប្រទេសមួយចំនួនដែលមិនចាំបាច់នឹងត្រូវបញ្ចប់ ហើយអង្គការសហប្រជាជាតិត្រូវផ្តោតលើការរក្សាសន្តិភាពនៅតំបន់ដែលគ្មានសន្តិភាពពិតប្រាកដវិញ។
ក្នុងពេលថ្លែងសុន្ទរកថានៅក្រុមប្រឹក្សានៃទំនាក់ទំនងអន្តរជាតិ (CFR) ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានបញ្ជាក់ថា អាមេរិកនឹងប្រើប្រាស់តួនាទីជាប្រធាននៃកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិខែមេសាដើម្បីត្រួតពិនិត្យស៊ីជម្រៅលើការបំពេញប្រតិបត្តិការរក្សាសន្តិភាពរបស់អង្គការសហប្រជាជាតិ។
លោកស្រីបានប្រាប់អ្នកជំនាញដែលមានវត្តមានក្នុងវេទិកានោះថា គោលដៅចម្បងនៃការត្រួតពិនិត្យនេះគឺជាអ្វីដែលអាមេរិកចង់បានព្រោះប្រតិបត្តិការរក្សាសន្តិភាពរបស់អង្គការសហប្រជាជាតិបច្ចុប្បន្នមិនមានប្រសិទ្ធិភាពនិងខ្ជះខ្ជាយ។
«ខ្ញុំមកអង្គការសហប្រជាជាតិនេះដោយមានគោលដៅចម្បងបង្ហាញប្រជាជនអាមេរិកពីតម្លៃនៃការវិនិយោគក្នុងស្ថាប័នអន្តរជាតិនេះ»។
បេសកជនពិសេសអាមេរិករូបនេះបានពន្យល់ថា លោកស្រីបានចាប់ផ្តើមជជែកជាមួយអគ្គលេខាធិការអង្គការសហប្រជាជាតិលោក Antonio Guterres រួចរាល់ហើយពីបញ្ហានេះ។ លោកស្រីសង្កត់ធ្ងន់ថា អាមេរិកនិងអង្គការសហប្រជាតិកំពុងស្វែងរកវិធីសមស្របដើម្បីធ្វើឲ្យប្រតិបត្តិការរក្សាសន្តិភាពមិនត្រឹមតែចំណាយតិចទេ តែរក្សាបានគណនេយ្យភាព និង ប្រសិទ្ធភាពថែមទៀត។ មិនត្រឹមតែប៉ុណ្ណោះ អាមេរិកចង់ឲ្យការអន្តរាគមន៍រក្សាសន្តិភាពនេះមានផែនការចាកចេញច្បាស់លាស់ផង។
ដើម្បីធានាថា ប្រតិបត្តិការរក្សាសន្តិភាពនេះមិនខ្ជះខ្ជាយលុយនិងមានប្រសិទ្ធភាពលោកស្រី Nikki Haley បានប្រកាសថា ប្រតិបត្តិការរក្សាសន្តិភាពនៅប្រទេសមួយចំនួនដែលមិនចាំបាច់នឹងត្រូវបញ្ចប់ ក្នុងនោះមាននៅហៃទី និងកូឌីវ័រ។
«យើងនឹងបញ្ចប់បេសកកម្មរក្សាសន្តិភាពនៅប្រទេសហៃទី ព្រោះតាមស្ថានការណ៍បច្ចុប្បន្នវាមិនត្រូវការប្រតិបត្តិការនេះទៀតទេ។ ហើយយើងក៏នឹងបញ្ចប់ការងាររបស់យើងនៅកូឌីវ័រ និងលីបេរីដែរ។ ប៉ុន្តែយើងនឹងប្រឹងប្រែងរក្សាសន្តិភាពនៅតំបន់ដែលគ្មានសន្តិភាពពិតប្រាកដវិញ»។
ពាក់ព័ន្ធការអន្តរាគមន៍នៅសាធារណរដ្ឋប្រជាធិបតេយ្យកុងហ្គោវិញ អគ្គរដ្ឋទូតអាមេរិករូបនេះមិនបានបញ្ជាក់ច្បាស់ថា វានឹងមានការកាត់បន្ថយពិតឬអត់ទេ ប៉ុន្តែគេអាចយល់បានថាអាមេរិកចង់ឲ្យមានការបន្ថយ ។ ក្រុមប្រឹក្សាសន្តិសុខនឹងបោះឆ្នោតប៉ុន្មានថ្ងៃខាងមុខនេះដើម្បីកំណត់ថា វានឹងមានការបន្ថយចំនួនកងទ័ពមួកខៀវទាំង ១៩០០០នាក់ដែលឈរជើងនៅកុងហ្គោនោះឬអត់។
តំណាងអាមេរិកនេះបានអះអាងថា វាជារឿងមិនសមរម្យឡើយដែលអង្គការសហប្រជាជាតិជួយរដ្ឋាភិបាលកុងហ្កោដែលពុករលួយ ហើយរំលោភបំពានធ្វើទុក្ខបុកម្នេញប្រជាជនខ្លួនឯង។លោកស្រីមិនចង់ឲ្យរឿងបែបនេះបន្តកើតមានឡើងទៀតទេ វាចាំបាច់ត្រូវដោះស្រាយ។
យ៉ាងណាក៏ដោយ មន្ត្រីទូតបារាំងប្រចាំក្រុមប្រឹក្សាសន្តិសុខបានបង្ហាញក្តីបារម្ភនិងជំទាស់ចំពោះគម្រោងបន្ថយទ័ពអង្គការសហប្រជាជាតិនៅកុងហ្គោ។ ប្រមុខអង្គការសហប្រជាជាតិក៏យល់ឃើញដូចគ្នាព្រោះកុងហ្គោនឹងត្រូវរៀបចំការបោះឆ្នោតចុងឆ្នាំនេហ ដែលវាចាំបាច់ត្រូវមានការបង្កើនកងកម្លាំងទ័ពជាពិសេសមន្ត្រប៉ូលិសដើម្បីធានាសន្តិសុខ និងភាពត្រឹមត្រូវនៃការបោះឆ្នោតផង។
ដោយឡែក ស្របពេលដែលអាមេរិកចង់ឲ្យមានការកែទម្រង់ប្រតិបត្តិការរក្សាសន្តិភាពរបស់អង្គការសហប្រជាជាតិ លោកស្រីឯកអគ្គរដ្ឋទូតអាមេរិក Nikki Haley ក៏បានបញ្ជាក់ផងដែរថា លុយជំនួយអាមេរិកគាំទ្រការចំណាយសម្រាប់ប្រតិបត្តិការរក្សាសន្តិភាពអង្គការសហប្រជាជាតិ នឹងត្រូវកាត់បន្ថយនៅពេលខាងមុខនេះ។ អាមេរិករួមចំណែកផ្តល់វិភាគទាន ៧,៩ពាន់លានដុល្លារក្នុងប្រតិបត្តិការដែលស្មើ ២៩ភាគរយ ហើយវានឹងត្រូវបន្ថយមកត្រឹម ២៥ភាគរយប៉ុណ្ណោះ៕
Tag:
អាមេរិក
Nikki Haley
UN
ប្រតិបត្តិការរក្សាសន្តិភាពអង្គការសហប្រជាជាតិ
© រក្សាសិទ្ធិដោយ thmeythmey.com