ពលរដ្ឋខ្មែរគ្រប់និន្នាការ ដឹងគុណ និងបួងសួងឲ្យលោក រីចឆ្នឺរ ឆាប់ជា

ជាតិ

ពលរដ្ឋខ្មែរគ្រប់និន្នាការ ដឹងគុណ និងបួងសួងឲ្យលោក រីចឆ្នឺរ ឆាប់ជា

30, Mar 2017 , 8:19 pm

រូបភាព

ដោយ: ខន ចំប៉ា

ពលរដ្ឋខ្មែរគ្រប់និន្នាការទាំងអស់ បានបង្ហោះសាររំលឹកនឹកគុណ និងជូនពរឲ្យលោក រីចឆ្នឺរ ឲ្យឆាប់ជាសះស្បើយ បន្ទាប់ពីដឹងថា ស្ថាបនិកមន្ទីរពេទ្យគន្ធបុប្ផារូបនេះធ្លាក់ខ្លួនឈឹ។ តាមរយៈបណ្តាញសង្គមហ្វេស ប៊ុក សារជូនពរទាំងនេះ ត្រូវបានបង្ហោះក្នុងរូបភាពផ្សេងៗគ្នា មានដូចជាការរចនារូបជាវីដេអូ និងសំណេរជូនពរភ្ជាប់នឹងរូបថតលោក រីចឆ្នឺរ។

ភិក្ខុ គូ សុភាព សាស្ត្រាចារ្យនៅសាកលវិទ្យាល័យបញ្ញាសាស្ត្រកម្ពុជា បានបង្ហោះវីដេអូជាងមួយនាទី ក្នុងទំព័រហ្វេសប៊ុករបស់ខ្លួន បង្ហាញពីសកម្មភាពរបស់លោក រីចឆ្នឺរ ក្នុងបេសកកម្មសង្គ្រោះកុមារកម្ពុជា។ ជាមួយនឹងវីដេអូនេះ ភិក្ខុ គូ សុភាព បានសរសេរដូច្នេះថា៖«ចូលរួមចែករំលែកបុណ្យកុសលអ្នក ជូនលោកវេជ្ជបណ្ឌិត Beat Richner ឱ្យបានឆាប់ជាសះស្បើយពីរោគាពាធ។ លោកវេជ្ជបណ្ឌិតឋិតនៅក្នុងបេះដូងប្រជាជនខ្មែរគ្រប់រូប»។

លោក ជា ច័ន្ទ បរិបូរណ៍ រដ្ឋលេខាធិការក្រសួងព័ត៌មាន ក៏បានបែរបន់ឲ្យលោកវេជ្ជបណ្ឌិតឆាប់ជាពីជំងឺ និងមានសុខភាពល្អ ដើម្បីបន្តបេសកកម្មជួយជិវិតកុមារកម្ពុជាតទៅទៀតដែរ។ ក្នុងសំណេរ អមនឹងរូបថតរបស់លោក រីចឆ្នឺរ ដែលកំពុងចោមរោមដោយកុមារជាច្រើននាក់នោះ លោក ជា ច័ន្ទបរិបូរណ៍ ក៏បានឆ្លៀតរំលឹកគុណមន្ទីរពេទ្យគន្ធបុប្ផា ដែលបានសង្គ្រោះជីវិតកូនប្រុសម្នាក់របស់ខ្លួនដែរ។

លោក ឧកញ៉ា ហុង ពីវ ដែលបានផ្តល់ទឹកប្រាក់ជាច្រើនដល់មន្ទីរគន្ធបុប្ផានៅមួយរយៈចុងក្រោយនេះបានបង្ហោះរូបរបស់ខ្លួន ជាមួយលោក វេជ្ជបណ្ឌិត បេអាត រីចឆ្នឺរ ចំនួន៤សន្លឹក ក្រោយដឹងថាលោកវេជ្ជបណ្ឌិត បេអាត រីចឆ្នឺរ ធ្លាក់ខ្លួនឈឺ។ ក្រៅតែពីការជូនពរឲ្យលោក ជោគជ័យក្នុងការព្យាបាល ឧកញ៉ា ហុង ពីវ បាន អំពាវនាវឲ្យប្រជាពលរដ្ឋខ្មែរផ្សេងទៀត ជួយបួងសួងឲ្យ លោក វេជ្ជបណ្ឌិត បេអាត រីចឆ្នឺរ ឆាប់ជាសះស្បើយដែរ។

កញ្ញា សុខ ពិសី តារាចម្រៀង បានសរសេរថា៖ «បារម្ភដល់លោកវេជ្ជបណ្ឌិតចិត្តធម៌ណាស់ កុមារខ្មែរទាំងអស់ចាំផ្ដល់កម្លាំងចិត្តជូនលោក ស៊ូស៊ូ my hero»។

ថ្នាក់ដឹកនាំ មន្ត្រីរាជការ បុគ្គលិក និង និស្សិតទាំងអស់នៃសាកលវិទ្យាល័យវិទ្យាសាស្ត្រសុខាភិបាល បានសរសេរថា៖ «សូមបួងសួងដល់វត្ថុស័ក្តិសិទ្ធជួយថែរក្សាឯកឧត្ដមសាស្ត្រាចារ្យវេជ្ជបណ្ឌិត BEAT RICHNER ស្ថាបនិកមន្ទីរពេទ្យគន្ធបុប្ផា ដែលកំពុងសម្រាកព្យាបាលបន្ទាន់នៅមន្ទីរពេទ្យនៃប្រទេសស្វីស សូមឆាប់បានជាសះស្បើយ និងមានសុខភាពល្អឡើងវិញ»។

ដូចគ្នាដែរ អ្នកប្រើប្រាស់បណ្តាញសង្គមជាច្រើនទៀត ក៏បានបង្ហោះសាររំលឹកនឹកគុណ និងជូនពរឲ្យលោក រីចឆ្នឺរ ឲ្យឆាប់ជាសះស្បើយ។ ដ្បិតតែសំណេរផ្សេងគ្នា ប៉ុន្តែស្ថិតក្នុងន័យបួងសួងឲ្យ ស្ថាបនិក មន្ទីរពេទ្យគន្ធបុប្ផា ឆាប់ជា និងមានសុខភាពល្អ។ អ្នកស្រឡាញ់លោក រីចឆ្នឺរ មួយចំនួនបានប្រើ Hastag លើបណ្តាញសង្គម #BeatRichner #PrayforBeatRichner ដោយបួងសួងឲ្យលោកឆាប់ជាសះស្បើយ។

លោក បេអាត រិចឆ្នឺរ បានធ្លាក់ខ្លួនឈឺ និងប្រកាសលាលែងពីតំណែងជាអ្នកគ្រប់គ្រងមន្ទីរពេទ្យគន្ធបុប្ផា ដែលតំណែងនេះ នឹងផ្ទេរទៅឲ្យ លោក ភីតធឺរ ស្ទូដឺរ ដែលជាអនុប្រធានមន្ទីរពេទ្យ។ ទោះជាកំពុងញ៉ាំញីដោយជំងឺក៏ដោយ លោក រិចឆ្នឺរ បានអះអាងថា មន្ទីរពេទ្យនេះនឹងនៅបន្តដំណើរការទៅមុខដោយឯករាជ្យដូចពីមុន ពោលគឺជាមន្ទីរពេទ្យដែលផ្តល់សេវាកម្មថែទាំសុខភាពកុមារ និងមាតា ដោយមិនគិតប្រាក់ និងគុណភាពខ្ពស់៕