Davis Cup៖ ក្រុមកីឡាវាយកូនបាល់ជម្រើសជាតិបានទៅក្រុងអ៊ីសា ប្រទេសបារ៉ែនហើយ

កីឡាជាតិ

ជាតិ

Davis Cup៖ ក្រុមកីឡាវាយកូនបាល់ជម្រើសជាតិបានទៅក្រុងអ៊ីសា ប្រទេសបារ៉ែនហើយ

30, Mar 2017 , 4:44 pm

រូបភាព

ដោយ: នាយយ៉ាន

ក្រុងអ៊ីសា-បារ៉ែន៖ បន្ទាប់ពីបានធ្វើដំណើរអស់រយៈពេលប្រមាណ១៩ម៉ោង ក្រុមកីឡាវាយកូនបាល់ជម្រើសជាតិកម្ពុជា នាថ្ងៃទី៣០ ខែមីនា នេះ បានទៅដល់ក្រុងអ៊ីសា ប្រទេសបារ៉ែន ដែលជាទីកន្លែងពួកគេត្រូវចូលរួមប្រកួតក្នុងព្រឹត្តិការណ៍វគ្គប្រចាំជម្រុះ Davis Cup ហើយ។

ក្រុមកីឡាករវាយកូនបាល់ជម្រើសជាតិកម្ពុជា ដែលមានកីឡាករ៤រូប គឺ ប៊ុន កេន្នី, ម៉ម ផល្គុណ, ឡុង សំនៀង និង អួរ សារិទ្ធ នឹងត្រូវប្រកួតប្រជែងក្នុងការប្រកួតវគ្គជម្រុះពានរង្វាន់ Davis Cup សម្រាប់តំបន់អាស៊ី/អូសេអានី Group IV ដោយមាន១០ប្រទេសទៀតចូលរួម។ ការចាប់ឆ្នោតដែលប្រព្រឹត្តទៅនៅថ្ងៃអាទិត្យ ទី២ ខែមេសា នឹងបែងចែកជា២ពូល។ ការប្រកួតនឹងប្រព្រឹត្តពីថ្ងៃទី៣ ដល់ថ្ងៃទី៨ ខែមេសា នៅទីក្រុង Isa Town ប្រទេសបារ៉ែន។

បន្ទាប់យេម៉ែន បានដកខ្លួនចេញ ក្រុមដែលត្រូវប្រជែងក្នុង Group IV នេះ មានតែ១១ប្រទេសប៉ុណ្ណោះ គឺម្ចាស់ផ្ទះបារ៉ែន បង់ក្លាដែស អ៊ឺរ៉ាក់ កៀហ្ស៊ីស៊ីស្ថាន ម៉ុងហ្គោលី មីយ៉ាន់ម៉ា អូម៉ង់ អារ៉ាប៊ីសាអូឌីត សិង្ហបុរី តាហ្ស៊ីគីស្ថាន និងកម្ពុជា។

ក្រុមកម្ពុជា មានលោក ទេព រិទ្ធីវិត អគ្គលេខាធិការសហព័ន្ធកីឡាវាយកូនបាល់កម្ពុជា ជាប្រធានក្រុម និងលោក ANEIROS Braen ជាគ្រូបង្វឹក។ ពេលនេះ ក្រុមកម្ពុជាកំពុងរៀបចំខ្លួនឲ្យបានល្អប្រសើរ បន្ទាប់ពីមានការនឿយហត់ក្នុងការធ្វើដំណើររាប់ម៉ោងនៅក្នុងយន្តហោះ។

លោក ANEIROS Braen ដឹកនាំក្រុមទៅមើលទីតាំង ជាពិសេសទីលានដែលក្រុមត្រូវធ្វើការប្រកួតផងដែរ៕