ជាតិ
នយោបាយជាតិ
ទណ្ឌិតជិត ៤០០នាក់ស្នើសុំបន្ធូរបន្ថយ និងលើកលែងទោស លោក គឹម សន្តិភាព អ្នកនាំពាក្យក្រសួងយុត្តិធម៌ ផ្តល់បទសម្ភាសដល់ក្រុមអ្នកសារព័ត៌មាន ក្រោបញ្ចប់កិច្ចប្រជុំគណៈកម្មការជាតិពិនិត្យបញ្ជីទណ្ឌិតស្នើសុំបន្ធូរបន្ថយទោស នៅរសៀលថ្ងៃទី៣០ ខែមីនា ឆ្នាំ២០១៧នេះ។
× ភ្នំពេញ៖ អ្នកនាំពាក្យក្រសួងយុត្តិធម៌លោក គឹម សន្តិភាព បានឲ្យដឹងថា ទណ្ឌិតសរុបចំនួន ៣៩១នាក់(ស្ត្រី២៤នាក់) ដែលកំពុងជាប់ទោសតាមពន្ធនាគារថ្នាក់ខេត្តចំនួន ១៧ និងមណ្ឌលអប់រំកែប្រែចំនួន ៤ នៅកម្ពុជា បានស្នើសុំបន្ថូរបន្ថយទោស និងលើកលែងទោស ក្នុងនោះ អ្នកទោសចំនួន៣១៤រូប បានស្នើបន្ធូរបន្ថយទោស និងចំនួន៧៧រូប ស្នើលើកលែងទោស ក្នុងឱកាសចូលឆ្នាំប្រពៃណីជាតិខ្មែរ ខាងមុខនេះ។
លោក គឹម សន្តិភាព បានអះអាងថា ទណ្ឌិតជិត ៤០០នាក់ ត្រូវតែបានអនុវត្តទោសចំនួន ២ភាគ៣ សិន មុនពេលគណៈកម្មការថ្នាក់ជាតិដែលដឹកនាំដោយរដ្ឋមន្ត្រីក្រសួងយុត្តិធម៌ស្នើថ្វាយព្រះមហាក្សត្រ ដើម្បីឡាយព្រះហត្ថលេខាបន្ធូរបន្ថយទោស ឬលើកលែងទោស ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ។
ថ្លែងក្នុងកិច្ចប្រជុំគណៈកម្មការជាតិ ពិនិត្យបញ្ជីទណ្ឌិតស្នើសុំបន្ធូរបន្ថយទោស នៅរសៀលថ្ងៃទី៣០ ខែមីនានេះ អ្នកនាំពាក្យក្រសួងយុត្តិធម៌រូបនេះ បានបន្តបញ្ជាក់អ្នកសារព័ត៌មានថា ទណ្ឌិតទាំងនោះ ពុំមែនជាអ្នកទោសជាប់ពាក់ព័ន្ធនឹងបទឧក្រិដ្ឋប្លន់ប្រដាប់អាវុធ រំលោភសេពសន្ថវៈ និងបទល្មើសជួញដូរគ្រឿងញៀនឡើយ។ លោកបានពន្យល់មូលហេតុដែលគណៈកម្មការជាតិមិនអាចពិនិត្យបន្ធូរបន្ថយ ឬដោះលែងទោសពួកគេដូច្នេះថា៖«អ្នកទោសទាំងនោះមានចរិតកាចសាហាវដែលបង្កអសន្តិសុខសណ្តាប់ធ្នាប់សង្គមជាតិ»។
តែយ៉ាងណា គណៈកម្មការថ្នាក់ជាតិទើបបញ្ចប់ការពិនិត្យសំណើរបស់គណៈកម្មការថ្នាក់ខេត្តចំនួន ១២ ចំណោម ១៧ខេត្តប៉ុណ្ណោះ នៅថ្ងៃនេះ។ ដោយឡែក សំណើគណៈកម្មការថ្នាក់ខេត្តចំនួន ៥ និងមណ្ឌលអប់រំកែប្រែចំនួន៤ ទៀតដែលនៅសល់ ពួកគេនឹងបន្តពិនិត្យក្នុងកិច្ចប្រជុំ នៅរសៀលថ្ងៃទី៣១ មីនានេះថែមទៀត។
បើតាមប្រសាសន៍លោក គឹម សន្តិភាព ដែលមានតួលេខអ្នកទោសរបស់អគ្គនាយកដ្ឋានពន្ធនាគារ កម្ពុជាមានអ្នកទោសកំពុងជាប់ពន្ធនាគារជាង ២ម៉ឺននាក់ ក្នុងឆ្នាំ២០១៦ កន្លងមក៕
Tag:
អង្គ វង្ស វឌ្ឍានា
គឹម សន្តិភាព
មហាផ្ទៃ
យុត្តិធម៌
ទណ្ឌិត
© រក្សាសិទ្ធិដោយ thmeythmey.com