ជាតិ
នយោបាយជាតិ
កម្ពុជាស្នើរុស្ស៊ីឲ្យចូលរួមសង្កេតការណ៍ពេលបោះឆ្នោត លោក អ៊ុច បូរិទ្ធ រដ្ឋលេខាធិការនៃក្រសួងការបរទេស បានផ្តល់បទសម្ភាសដល់ក្រុមអ្នកសារព័ត៌មាន ក្រោយពីបញ្ចប់ជំនួបជាមួយលោក Igor Morgulo អនុរដ្ឋមន្ត្រីក្រសួងការបរទេសរុស្ស៊ី នៅរសៀល ថ្ងៃទី៣០ ខែមីនា ឆ្នាំ២០១៧នេះ។
× ភ្នំពេញ៖ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ លោក អ៊ុច បូរិទ្ធ បានថ្លែងថា លោកបានស្នើរុស្ស៊ីឲ្យបញ្ជូនអ្នកសង្កេតការណ៍ចូលរួមសង្កតការណ៍បោះឆ្នោតនៅកម្ពុជា នាពេលខាងមុខនេះ។
លោក អ៊ុច បូរិទ្ធ បានជួបពិភាក្សាការងារជាមួយលោក Igor Morgulo អនុរដ្ឋមន្ត្រីក្រសួងការបរទេសរុស្ស៊ី នៅថ្ងៃទី៣០ ខែមីនានេះ។ ក្នុងជំនួបនោះ លោកបានបង្ហើបឲ្យដឹងថា លោកស្នើរុស្ស៊ីឲ្យដាក់អ្នកសង្កេតការណ៍ ដើម្បីតាមដានដំណើរការនៃការបោះឆ្នោតថា្នក់ឃុំ-សង្កាត់ ដែលនឹងប្រព្រឹត្តទៅនៅថ្ងៃទី៤ ខែមិថុនាខាងមុខផងដែរ ក្រៅពីការរម្លឹកទំនាក់ទំនងការទូតរយៈពេលជាង ៦០ឆ្នាំរវាងកម្ពុជា និងរុស្ស៊ី។
ថ្លែងក្រោយជំនួបពិភាក្សាក្នុងក្របខណ្ឌនយោបាយជាមួយលោក Igor Morgulo ជិត២ម៉ោង ក្នុងទីស្តីការក្រសួងការបរទេស លោកបានបន្តបញ្ជាក់ថា រុស្ស៊ីឯកភាពបញ្ជូនអ្នកសង្កេតការណ៍បោះឆ្នោត ដើម្បីពិនិត្យការបោះឆ្នោតនៅកម្ពុជា នាពេលខាងមុខនេះ។
បើតាម គ.ជ.ប គណបក្សចំនួន ១២ នឹងចូលរួមប្រកួតប្រជែងការបោះឆ្នោតខាងមុខ ក្នុងនោះ រួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែររួបរួមជាតិ គណបក្សសំបុកសង្គមប្រជាធិបតេយ្យ គណបក្សសញ្ជាតិកម្ពុជា គណបក្សអំណាចខ្មែរ គណបក្សប្រជាធិបតេយ្យមូលដ្ឋាន គណបក្សយុវជនកម្ពុជា គណបក្សជនជាតិដើមប្រជាធិបតេយ្យកម្ពុជា និងគណបក្សសាធារណរដ្ឋប្រជាធិបតេយ្យ។
យោងតាមរបាយការណ៍បណ្តោះអាសន្នពីគណៈកម្មការរាជធានី ខេត្តរៀបចំការបោះឆ្នោត គណបក្សប្រជាជនកម្ពុជា និងគណបក្សសង្គ្រោះជាតិ បានសុំចុះបញ្ជីនៅឃុំ សង្កាត់ទាំង១៦៤៦ នៅក្នុងប្រទេសកម្ពុជា។
គួរបញ្ជាក់ថា ការបោះឆ្នោតថ្នាក់ឃុំ-សង្កាត់ នឹងប្រព្រឹត្តឡើងនៅថ្ងៃទី៤ ខែមិថុនា ឆ្នាំ២០១៧ខាងមុខនេះ៕
Tag:
អ៊ុច បូរិទ្ធ
បោះឆ្នោត
Igor Morgulo
រុស្សី
ការបរទេស
© រក្សាសិទ្ធិដោយ thmeythmey.com