ជាតិ
សេដ្ឋកិច្ច
បញ្ចប់ការស៊ើបអង្កេត សំណុំរឿងអាជ្ញាធរខ្មែរបើកដៃឲ្យវៀតណាមចូលកាប់ឈើ ក្រោយសួរអ្នកពាក់ព័ន្ធជាង៤០នាក់ រូបភាពពីហ្វេសប៊ុក Phorn Sophal
× ដំណើរការស៊ើបអង្កេតលើសំណុំរឿងអាជ្ញាធរខ្មែរបើកដៃឲ្យជនជាតិវៀតណាមចូលកាប់ឈើ នៅព្រំដែនអូរហុច ខេត្តមណ្ឌលគិរី បានបិទបញ្ចប់ហើយ នៅថ្ងៃទី២៩ ខែមីនា។ បិទបញ្ចប់ ក្រោយចំណាយពេលចំនួន១០ថ្ងៃ និងបានស្តាប់ចម្លើយអ្នកពាក់ព័ន្ធជាង៤០នាក់។
គណៈកម្មាការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបិទបញ្ចប់ដំណើរការស៊ើបអង្កេត នៅថ្ងៃទី២៩ ខែមីនា លើសំណុំរឿងអាជ្ញាធរខ្មែរឃុបឃិតជាមួយឈ្មួញជនជាតិវៀតណាមចូលកាប់ឈើ នៅព្រំដែនអូរហុច ស្រុកកែវសីមា ខេត្តមណ្ឌលគិរី។
គណៈកម្មាការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលដឹកនាំដោយលោក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស បានចំណាយពេល១០ថ្ងៃនៅខេត្តមណ្ឌលគិរី ដើម្បីស៊ើបអង្កេត និងបានសាកសួរអ្នកពាក់ព័ន្ធជាង៤០នាក់។ នេះបើយោងតាមកាសែតភ្នំពេញបុស្តិ៍ ដែលបន្តបញ្ជាក់ពីសមាសភាពអ្នកដែលត្រូវបានសាកសួរទាំងនោះថា រួមមានមន្ត្រីនគរបាល ទាហាន និងមន្ត្រីអាវុធហត្ថជាដើម។
លោក អេង ហ៊ី អ្នកនាំពាក្យគណៈកម្មាការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ មិនទាន់អាចបញ្ជាក់បានទេថា គណៈកម្មការជាតិនឹងចាត់វិធានការបែបណាចំពោះអ្នកពាក់ព័ន្ធនឹងករណីនេះ លោក អេង ហ៊ី ដែលជាអ្នកនាំពាក្យឲ្យកងរាជអាវុធហត្ថលើផ្ទៃប្រទេសផងនោះ បញ្ជាក់ដូច្នេះ៖«មិនទាន់សម្រេចបែបណាទេ យើងរង់ចាំការប្រជុំសម្រេចពីគណៈកម្មាការជាតិសិន»។
កាលពីខែកុម្ភៈកន្លងទៅ អាជ្ញាធរកម្ពុជា បានឃាត់ខ្លួនជនជាតិវៀតណាម និងបក្ខពួកចំនួន ៧ នាក់ ពេលដែលពួកគេកំពុងដឹកឈើចេញពីព្រៃ ក្នុងដែនជម្រកសត្វព្រៃកែវសីមា ខេត្តមណ្ឌគិរី។ អគ្គស្នងការនគរបាលជាតិ ក៏បានស៊ើបអង្កេតករណីនេះដែរ នៅដើមខែមីនា និងបានរកឃើញថាឈ្មួញជនជាតិវៀតណាម ឈ្មោះ អ៊ុក ញ៉ បានសូកប្រាក់១៧ ម៉ឺនដុល្លារ ដល់មន្ត្រីខ្មែរជាច្រើននាក់ ជាថ្នូនឹងការអនុញ្ញាតឲ្យជនជាតិវៀតណាមចូលកាប់ឈើ៕
Tag:
បទល្មើស
ព្រៃឈើ
ពុករលួយ
វៀតណាម
© រក្សាសិទ្ធិដោយ thmeythmey.com