ជាតិ
រដ្ឋាភិបាលសម្រេចបិទសាលារៀននៅក្នុងក្រុងសៀមរាបបណ្តោះអាសន្ន
× រដ្ឋាភិបាល បានសម្រេចបិទសាលារៀនពីថ្នាក់មតេយ្យដល់ឧត្តមសិក្សាទាំងរដ្ឋ និងឯកជន នៅក្នុងក្រុងសៀមរាបបណ្តោះអាសន្ន ក្រោយបុរសខ្មែរអាយ៣៨ឆ្នាំម្នាក់មានផ្ទុក COVID-19។ នេះជាការបញ្ជាក់របស់លោកម៉ម ប៊ុនហេង រដ្ឋមន្ត្រីសុខាភិបាល នៅក្នុងសន្និសីទកាសែតនៅល្ងាចថ្ងៃទី៧ មីនានេះ។
ការសម្រេចនេះ ធ្វើឡើងតាមការបញ្ជាផ្ទាល់ របស់ សម្តេច ហ៊ុន សែន នាយករដ្ឋមន្ត្រី មកលោកម៉ម ប៊ុនហេង ពេលកំពុងធ្វើសន្និសីទកាសែត។ បើតាមលោក ម៉ម ប៊ុនហេង សាលារៀនទាំងនោះ នឹងបិទរយៈពេល១៤ថ្ងៃ ខណៈរដ្ឋាភិបាលកំពុងខ្នះខ្នែងទប់ស្កាត់ការរាលដាល COVID-19។
រដ្ឋមន្ត្រីក្រសួងអប់រំ យុវជន និងកីឡា បានចេញសេចក្តីប្រកាសព័ត៌មានបន្ថែមពីលើការសម្រេចមុននេះ៕
© រក្សាសិទ្ធិដោយ thmeythmey.com