ជាតិ
នយោបាយជាតិ
លោក មាជ សុវណ្ណារ៉ា មិនចោលនយោបាយឡើយ ហើយបន្តប្រកួតជាមួយយុវជនCPP
× ភ្នំពេញ៖ ក្រោយចេញពីពន្ធនាគារភ្លាម លោក មាជ សុវណ្ណារ៉ា មន្ត្រីជាន់ខ្ពស់របស់អតីតគណបក្សសង្គ្រោះជាតិ បានប្រកាសជំហរបន្តធ្វើនយោបាយទៀត ដើម្បីប្រកួតប្រជែងជាមួយគណបក្សកាន់អំណាច។ គោលដៅដែលលោក មាជ សុវណ្ណារ៉ា បានកំណត់នោះ គឺការប្រកួតជាមួយយុវជនជំនាន់ក្រោយរបស់គណបក្សប្រជាជនកម្ពុជា។ ជាពិសេសកូនៗរបស់សម្ដេចនាយករដ្ឋមន្ត្រី ហ៊ុន សែន។
សូមស្ដាប់សំឡេង
«ខ្ញុំត្រូវធ្វើនយោបាយបន្តទៀត ព្រោះខ្ញុំជាប់ឃុំក្នុងគុកដោយសាររឿងហេតុផលនយោបាយ រឿងអ្វីដែលខ្ញុំត្រូវរត់ចោលស្រុកបន្តទៀត។ ខ្ញុំត្រូវធ្វើនយោបាយបន្តទៀត ប៉ុន្តែខ្ញុំត្រូវធ្វើនយោបាយ(ប្រកួត) ជាមួយ គឺ ហ៊ុន ម៉ាណែត ,ហ៊ុន ម៉ានិត ,ហ៊ុន ម៉ានី គឺត្រូវធ្វើជាមួយគ្នា។ ហើយកុំគិតថា ខ្ញុំ មាជ សុវណ្ណារ៉ា និងអ្នក១៣នាក់ គេដោះលែងវិញនេះ គេទិញក្បាលបាននោះ គឺអត់ទេ»។ នេះជាការបញ្ជាក់របស់លោក មាជ សុវណ្ណារ៉ា ដែលដាក់គោលដៅនយោបាយ ប្រកួតប្រជែងជាមួយយុវជនជំនាន់ក្រោយរបស់គណបក្សកាន់អំណាច។
មូលហេតុដែលលោក មាជ សុវណ្ណារ៉ា ដាក់ទិសដៅនយោបាយប្រជែងជាមួយអ្នកនយោបាយវ័យក្មេងរបស់បក្សកាន់អំណាចនេះ ដោយសារលោក សម្លឹងឃើញថា យុវជនជំនាន់ក្រោយ នឹងប្រើប្រាស់វប្បធម៌នយោបាយបង្រួបបង្រួមជាតិ ផ្សះផ្សារជាតិបានច្រើនជាងអ្នកនយោបាយជំនាន់មុន ពោលគឺការធ្វើនយោបាយដោយសន្តិភាព គ្មានការចាប់ឃុំខ្លួនអ្នកនយោបាយឡើយ។
ថ្លែងចំពោះមុខអ្នកសារព័ត៌មាន និងក្រុមគ្រួសារសកម្មជនជាប់ពន្ធនាគារ ទាំងយប់កណ្ដាលអាធ្រាតថ្ងៃទី២៨ សីហានេះ មន្ត្រីជាន់ខ្ពស់អតីតគណបក្សសង្គ្រោះជាតិរូបនេះ បានបង្ហាញផ្នត់គំនិតនយោបាយខ្លួនដូច្នេះថា៖«ខ្ញុំនៅស្រុកអាមេរិក១០ឆ្នាំ គេមិនដែលចាប់អ្នកនយោបាយដាក់គុកទេ ប៉ុន្តែរឿងក្នុងអតីតកាលយើងត្រូវបំភ្លេចចោល ហើយសង្ឃឹមថា រដ្ឋាភិបាលថ្មីរបស់លោក ហ៊ុន សែន គាត់នឹងយល់។ ហើយកូនគាត់ជំនាន់ក្រោយដែលធ្វើជាមួយខ្ញុំបន្តទៀត ដោយប្រើបញ្ញា។ គាត់(កូនសម្ដេច ហ៊ុន សែន)បណ្ឌិត ខ្ញុំមានអនុបណ្ឌិត គាត់មានវោហោសព្ទនយោបាយជារឿងរបស់គាត់។ ខ្ញុំមានជំនាញបង្រៀនមនុស្ស ខ្ញុំបង្រៀនមនុស្សឲ្យចេះអប់រំគ្នា ឲ្យចេះស្រលាញ់គ្នា គឺខ្មែរឯកភាពគ្នា ដូច្នេះមិនចាំបាច់មានអ្នកណាមកចាក់បំបែកខ្មែរទៀតទេ»។
តែយ៉ាងណាលោក មាជ សុវណ្ណារ៉ា មិនទាន់អាចបញ្ជាក់ថា លោកនឹងធ្វើនយោបាយជាមួយគណបក្សណាមួយឡើយ ខណៈដែលគណបក្សសង្គ្រោះជាតិ ត្រូវបានរំលាយ តាមអំណាចសាលក្រមរបស់តុលាការកំពូល។ លោក មាជ សុវណ្ណារ៉ា រង់ចាំមើលវត្តមានលោក កឹម សុខា ដែលជាមេដឹកនាំខ្លួន រួចចេញពីពន្ធនាគារសិន ។ ក្នុងន័យនេះលោក មាជ សុវណ្ណារ៉ា សង្ឃឹមថា សម្ដេចនាយករដ្ឋមន្ត្រី ហ៊ុន សែន នឹងផ្ដល់ការអនុគ្រោះដល់លោក កឹម សុខា ដោយស្នើទៅព្រះមហាក្សត្រ លើកលែងទោសដូចពួកខ្លួនទាំង១៤នាក់ រួមទាំងនយោបាយ សកម្មជនដីធ្លី និងអ្នកវិភាគនេះដែរ។
គួរបញ្ជាក់ថា លោក មាជ សុវណ្ណារ៉ា និងសកម្មជនអតីតគណបក្សសង្គ្រោះជាតិ១៣នាក់ទៀត ត្រូវបានតុលាការចោទប្រកាន់ពីបទដឹកនាំកុបកម្ម និងចូលរួមក្នុងចលនាកុបកម្ម ដែលប្រព្រឹត្តក្រោយបោះឆ្នោតកាលពី២០១៣ នៅទីលានប្រជាធិបតេយ្យ ម្តុំវត្តភ្នំ។។ លោក មាជ សុវណ្ណារ៉ា លោក អឿ ណារិទ្ធ និងលោក ឃីន ជំរឿន ដែលជាប់ចោទដឹកនាំធ្វើកុបកម្ម ត្រូវបានតុលាការផ្តន្ទាទោសជាប់ពន្ធនាគារ២០ឆ្នាំ។ ចំណែក ១១នាក់ ដែលជាប់ចោទចូលរួមចលនាកុបកម្ម ជាប់ទោស៧ឆ្នាំក្នុងម្នាក់ៗ រួមមាន ស៊ុំ ពុទ្ធី លោក នាង សុឃុន លោក សាន គីមហេង លោក ទេព ណារិន លោក សាន សីហៈ លោក អាន បឋម លោក អ៊ុក ពេជ្រសំណាង លោក កែ ឃីម លោក យា ថុង លោក យន់ គឹមហួរ និងលោក រឿន ចិត្រា៕
© រក្សាសិទ្ធិដោយ thmeythmey.com