កីឡាជាតិ
ជាតិ
ឆ្នាំ២០១៩នេះ ស្ត្រីខ្មែរពីររូបនឹងមមាញឹកក្នុងការងារគ្រប់គ្រងក្លិបបាល់ទាត់ក្របខណ្ឌកំពូល
×![]()
អ្នកស្រី ពុធ ធីតា និងអ្នកស្រី កែ សួន សុភី ត្រូវតាំងជាបន្តបន្ទាប់ក្នុងតំណែងជាប្រធានក្លិបកីឡាបាល់ទាត់ក្នុងក្របខណ្ឌកំពូលរបស់កម្ពុជា។ អ្នកស្រី ធីតា ដែលជាអ្នកជំនួញល្បីឈ្មោះម្នាក់ ក្លាយជាប្រធានក្លិបបឹងកេតតាំងពីខែឧសភា មុនពេលដែលអ្នកស្រី កែ សួន សុភី ឡើងគ្រប់គ្រងក្លិបវិសាខា ជំនួសស្វាមី ចាប់ពីពាក់កណ្តាលខែធ្នូ ឆ្នាំ២០១៨មក។
បើទោះបីជាតំណែងជាប្រធានក្លិបមិនពាក់ព័ន្ធនឹងបច្ចេកទេសបង្វឹកក៏ដោយ ប៉ុន្តែស្ត្រីទាំងពីររូបនេះ នឹងដើរតួនាទីយ៉ាងសំខាន់នៅក្នុងក្រុមរៀងៗខ្លួន ជាពិសេសសកម្មភាពនៅក្រៅទីលាន។ សម្រាប់រដូវកាលឆ្នាំ២០១៩-២០២០ នេះ គេមិនទាន់ឃើញកម្មវិធីប្រកួតផ្លូវការនោះឡើយ តែនេះជាកំណត់ត្រាដំបូងបំផុតក្នុងបាល់ទាត់កម្ពុជា ដែលមានស្ត្រីរហូតដល់ទៅ២រូបក្លាយជាក្បាលម៉ាស៊ីនកំពូលរបស់ក្លិប។
អ្នកស្រី ពុធ ធីតា ដែលមានស្វាមីជនជាតិថៃ ត្រូវបានតែងតាំងឲ្យធ្វើជាប្រធានក្លិបបាល់ទាត់បឹងកេត ជំនួសលោក ស៊ីវ ថា ស្ថាបនិកក្លិបនេះ ដែលប្រកាសដកខ្លួន។ ការតែងតាំងធ្វើឡើង កាលពីដើមខែឧសភា ឆ្នាំ២០១៨ បន្ទាប់ពីគ្រួសារអ្នកស្រីមានភាគហ៊ុនធំជាងគេ។
បច្ចុប្បន្នអ្នកស្រី ពុធ ធីតា កំពុងមមាញឹកជាមួយការសាងសង់កីឡដ្ឋានផ្ទាល់ខ្លួននៅម្តុំបឹងស្នោរក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។ ការសាងសង់នេះ គ្រោងនឹងបញ្ចប់ជាស្ថាពរមុនបើករដូវកាលថ្មី។
លោកស្រី កែ សួនសុភី ត្រូវបានតែងតាំងជាប្រធានក្លិបបាល់ទាត់វិសាខា ជំនួសស្វាមីរបស់ខ្លួន គឺលោក ស សុខា បច្ចុប្បន្នជារដ្ឋលេខាធិការក្រសួងអប់រំ យុវជន និងកីឡា។ ការតែងតាំងនេះ ត្រូវបានប្រកាសក្នុងកម្មវិធីផ្លូវការមួយរបស់ក្លិបកាលពីល្ងាចថ្ងៃទី១៦ ខែធ្នូ ក្រោមអធិបតីភាពសម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាឪពុកបង្កើតលោក ស សុខា។
ការតែងតាំងនេះ គឺដើម្បីជំនួសលោក ស សុខា ដែលមមាញឹកជាមួយក្នុងស្ថាប័នរដ្ឋ ពិសេសក្នុងតួនាទីជារដ្ឋលេខាធិការក្រសួងអប់រំ យុវជន និងកីឡា ប៉ុន្តែលោកសន្យាបន្តជំរុញលើកទឹកចិត្តក្រុមការងាររបស់ខ្លួន។ បច្ចុប្បន្នក្លិបនេះ ក៏កំពុងមមាញឹកជាមួយការសាងសង់ទីលានម្តុំហ្គ្រេនភ្នំពេញក្នុងសង្កាត់ស្វាយប៉ាក ខណ្ឌទួលគោក រាជធានីភ្នំពេញ ដែលនឹងដាក់ឲ្យប្រើប្រាស់នៅរដូវកាលថ្មីខាងមុខ។
គួរឲ្យកត់សម្គាល់ផងដែរ អ្នកស្រី ពុធ ធីតា និងអ្នកស្រី កែ សួនសុភី ក៏ធ្លាប់ឆ្លើយឆ្លងគ្នាផងដែរនៅលើហ្វេសប៊ុក ដោយអះអាងរួមគ្នាលើការអភិវឌ្ឍន៍កីឡាបាល់ទាត់នៅកម្ពុជា។ គណនីហ្វេសប៊ុកដែលមានឈ្មោះថា Khaphy Sar [ដែលទំនងជាកម្មសិទ្ធិរបស់អ្នកស្រី កែ សួន សុភី] បាន Tag ឈ្មោះគណនីអ្នកស្រីពុធ ធីតា [Thyda Puth] នៅលើព័ត៌មានមួយ។
ក្នុងការសន្ទនានោះ អ្នកស្រី ពុធ ធីតា បានអបអរអ្នកស្រី កែ សួនសុភី ដែលបានក្លាយជាប្រធានក្លិបវិសាខា។ អ្នកស្រី ធីតា បានសរសេរទៅអ្នកស្រី សួនសុភីថា រួមគ្នាទៅមុខដើម្បីបាល់ទាត់ជាតិ និងលីគកម្ពុជា។ អ្នកស្រី សុភី តបវិញថា «ស៊ូស៊ូ» ជាមួយការបង្ហាញ emoji លើកសាច់ដុំបីដូចគ្នា។
ភរិយារបស់លោក រិទ្ធី សំណាង ម្ចាស់ក្លិបភ្នំពេញក្រោន ក៏ជាស្ត្រីម្នាក់ស្រឡាញ់បាល់ទាត់ខ្លាំងផងដែរ ដោយគាត់តែងតែបង្ហាញវត្តមានជាមួយស្វាមី ជាពិសេសនៅរាល់ការប្រកួតធំៗរបស់ក្លិប៕
Tag:
បាល់ទាត់
ពុធ ធីតា
កែ សួនសុភី
© រក្សាសិទ្ធិដោយ thmeythmey.com
