អន្តរជាតិ
ចិន ប្រហារជីវិតអតីតមេក្រុមហ៊ុនរដ្ឋម្នាក់ដែលត្រូវកាត់ទោសពីបទពុករលួយ និងទ្វេពន្ធភាព ![លោក Lai Xiaomin ត្រូវប្រហារជីវិតក្រោយត្រូវបានកាត់ទោសពីបទពុករលួយ និងទ្វេពន្ធភាព។ រូបថត AFP](https://image.thmeythmey.com/pictures/2021/01/30/xiao.jpg)
លោក Lai Xiaomin ត្រូវប្រហារជីវិតក្រោយត្រូវបានកាត់ទោសពីបទពុករលួយ និងទ្វេពន្ធភាព។ រូបថត AFP
×![]()
អាជ្ញាធរចិន នៅថ្ងៃទី២៩ ខែមករា បានកាត់ទោសប្រហាជីវិតអតីតមេក្រុមហ៊ុនរដ្ឋម្នាក់ដែលត្រូវកាត់ទោសពីបទពុករលួយ ស៊ីសំណូក និងរស់នៅជាមួយប្រពន្ធលួចលាក់បំពានច្បាប់។ នេះបើតាមការផ្សាយរបស់ទូរទស្សនរដ្ឋចិន CCTV ។
លោក Lai Xiaomin អតីតប្រធានក្រុមហ៊ុន Huarong ដែលជាក្រុមហ៊ុនរដ្ឋទទួលបន្ទុកចាត់ចែងទ្រព្យសម្បត្តិ ត្រូវបានប្រហារដោយតុលាការក្រុងធានជីន។ ក្នុងសវនាការនៅដើមខែមករានេះ លោកត្រូវចោទថា ទទួលសំណូក២៦០លានដុល្លារក្រោមទម្រង់ជាអំពើពុករលួយផ្សេង។ លោកក៏ត្រូវរកឃើញថា មានកំហុសពីបទទ្វេពន្ធភាពដោយរស់នៅជាមួយស្ត្រីម្នាក់ក្រៅចំណងអាពាហ៍ពិពាហ៍ស្របច្បាប់ និងមានកូនមិនស្របច្បាប់ផង។
បើតាមទូរទស្សន៍រដ្ឋចិន CCTV តុលាការកំពូលចិន ដែលបានត្រួតពិនិត្យ និងផ្ដល់ភ្លើងបៃតងដល់ការប្រហារជីវិតផង លើកឡើងថា ទឹកប្រាក់សំណូកដែលទទួលដោយលោក Lai Xiaomin មានទំហំធំណាស់ បទឧក្រិដ្ឋក៏ធ្ងន់ធ្ងរ ហើយផលប៉ះពាល់ផ្នែកសង្គម ក៏ធ្ងន់ធ្ងរដែរ។ ប្រព័ន្ធផ្សព្វផ្សាយរដ្ឋចិន មិនបានបញ្ជាក់ពីវិធីប្រហារជីវិតលើលោក Lai ឡើយ តែលោកត្រូវបានអនុញ្ញាតឱ្យសាច់ញាតិដែរមិនត្រូវបានប្រហារជីវិត។
ជាការកត់សម្គាល់ ក្នុងតុលាការចិន អត្រានៃការមានទោសមានដល់៩៩ភាគរយឯណោះ ហើយទោសប្រហាជីវិតវិញ កម្រត្រូវបានបដិសេធណាស់ ដែលជាធ្វើឱ្យចិនស្ថិតលើកំពូលតារាងប្រទេសដែលប្រហារជីវិតអ្នកទោសច្រើនជាងគេ។ អ្នកទោសមិនតិចជាងខ្ទង់ពាន់នាក់ឡើយដែលត្រូវប្រហារជីវិតរាល់ឆ្នាំ។ ចំនួនទោសប្រហារជីវិតដែលត្រូវបានអនុវត្តកន្លងមក ត្រូវចាត់ទុកជាការណ៍សម្ងាត់របស់រដ្ឋទៀតផង។
ជីវិតរបស់លោក Lai បានធ្លាក់ចុះមួយរំពេចនៅឆ្នាំ២០១៨ ពេលលោកត្រូវដាក់ឱ្យស្ថិតក្រោមការស៊ើបអង្កេតពាក់ព័ន្ធអំពើពុករលួយ ហើយត្រូវបណ្ដេញពីតំណែង និងតួនាទីក្នុងបក្សកុម្មុយនីស្តចិន។ លោកក៏ត្រូវចោទថា ប្រើប្រាស់តួនាទីរបស់ខ្លួនដើម្បីកេងយកប្រាក់៣.៨លានដុល្លារចន្លោះឆ្នាំ២០០៩ ដល់ឆ្នាំ២០១៨ ផងដែរ។
យុទ្ធនាការប្រឆាំងអំពើពុករលួយនៅចិនក្រោមការដឹកនាំរបស់ប្រធានាធិបតី ស៊ី ជិនភីង ធ្វើឱ្យមន្ត្រីជាច្រើនអស់តំណែង និងខ្លះដល់ថ្នាក់អស់ជីវិត។ សូម្បីអតីតមន្ត្រីថ្នាក់កំពូលដូចជាលោក ចូវ យ៉ុងខាង ក៏មិនរួចផុតពីកណ្ដាប់ដៃដែករបស់លោក ស៊ី ដែលប្ដេជ្ញាចិត្តបោសសម្អាតអំពើពុករលួយទាំងលើមន្ត្រីខ្លា និងមន្ត្រីរុយ៕
© រក្សាសិទ្ធិដោយ thmeythmey.com