COVID-19
ជាតិ
COVID-19៖ វិជ្ជមាន២៩នាក់ទៀត និងសះស្បើយ៣៤នាក់ ![ការយកសំណាកទៅធ្វើតេស្តកន្លងមកនៅខេត្តសៀមរាប។ រូបថត Mey Sokharith](https://image.thmeythmey.com/pictures/2021/03/24/sr.jpg)
ការយកសំណាកទៅធ្វើតេស្តកន្លងមកនៅខេត្តសៀមរាប។ រូបថត Mey Sokharith
×![]()
ករណីវិជ្ជមានកូវីដ-១៩ ចំនួន២៩នាក់ទៀត ត្រូវបានប្រកាសនៅថ្ងៃពុធ ទី២៤ ខែមីនា នេះ ដែលក្នុងនោះមាន២៧នាក់ ស្ថិតក្នុងព្រឹត្តិការណ៍សហគមន៍២០កុម្ភៈ ដោយភាគច្រើននៅភ្នំពេញ។ ខណៈត្បូងឃ្មុំជាខេត្តទី១៣ដែលមានករណីសហគមន៍នេះ ។ បើតាមក្រសួងសុខាភិបាល អ្នកជាសះស្បើយមាន៣៤បន្ថែមទៀតផងដែរ។
២ករណីនាំចូល មាន ១នាក់ជាបុរសឥណ្ឌូណេស៊ីអាយុ៣០ឆ្នាំ អាសយដ្ឋានស្នាក់នៅស្រុកអូរជ្រៅ ខេត្តបន្ទាយមានជ័យ ដែលធ្វើដំណើរពីប្រទេសខ្លួនមកដល់កម្ពុជានៅថ្ងៃទី២២ ខែមីនា រីឯ១នាក់ទៀត ជាស្ត្រីជនជាតិហ្វីលីពីនអាយុ៤៧ឆ្នាំ អាសយដ្ឋាននៅសង្កាត់ស្លាក្រាម ខេត្តសៀមរាប ដែលមកដល់កម្ពុជានៅថ្ងៃទី២២ ខែមីនា ដូចគ្នា។
២៧ករណីទៀតជាករណីសហគមន៍២០កុម្ភៈ ដោយ២២នាក់ស្ថិតនៅក្នុងរាជធានីភ្នំពេញ ដោយភាគច្រើនជាជនជាតិខ្មែរ ក្រៅពីនេះ មានបុរសនីហ្សេរីយ៉ា១នាក់ និងបុរសអាមេរិក១នាក់។ ករណីនៅភ្នំពេញមាននៅសង្កាត់ចាក់អង្រែ, សង្កាត់ព្រៃសរ, សង្កាត់ទូលទំពូង, សង្កាត់ព្រែកឯក, សង្កាត់ព្រែកកំពឹស, សង្កាត់ភ្នំពេញថ្មី, សង្កាត់ស្រះចក, សង្កាត់បឹងសាឡាង, សង្កាត់កាកាប១, សង្កាត់បឹងធំ, សង្កាត់ផ្សារដើមថ្កូវ ជាដើម។
៣នាក់ករណីនៅកោះកុង ជាបុរសចិនទាំង៣នាក់ មានអាសយដ្ឋាននៅភូមិកូនកុក ឃុំភ្ញីមាស ស្រុកគិរីសាគរ។ នៅព្រៃវែងមាន១ករណី ដោយអ្នកជំងឺជាកុមារីអាយុ៣ឆ្នាំពីស្រុកល្វាឯម ខេត្តកណ្តាល។ រីឯករណីដំបូងនៅត្បូងឃ្មុំ ជាបុរសអាយុ៤២ឆ្នាំ អាសយដ្ឋាននៅភូមិចំការគរ ឃុំដារ ស្រុកមេមត់។
ស្របពេលជាមួយគ្នា អ្នកជំងឺ៣៤នាក់ទៀតបានជាសះស្បើយ ក្នុងនោះ៣៣នាក់ស្ថិតក្នុងសហគមន៍ដោយ៨នាក់ចេញពីមន្ទីរពេទ្យបង្អែកខេត្តព្រះសីហនុ ៤នាក់ពីមន្ទីរពេទ្យជ័យជំនះខេត្តកណ្តាល ១៥នាក់ពីសណ្ឋាគារ The Great Duke និង៦នាក់ពីមជ្ឈមណ្ឌលប្រយុទ្ធនឹងជំងឺរបេង និងហង់សិន។
គិតមកដល់ពេលនេះ កម្ពុជាមានអ្នកកើតកូវីដ-១៩ សរុប១៨១៧នាក់ ក្នុងនោះ១២៩៣នាក់ស្ថិតក្នុងសហគមន៍២០កុម្ភៈ។ អ្នកជាសះស្បើយសរុបមាន១០៣៣នាក់ និងស្លាប់មាន៥នាក់។ ករណីសហគមន៍២០កុម្ភៈ មាននៅរាជធានីភ្នំពេញ កណ្តាល ព្រះសីហនុ ព្រៃវែង កោះកុង កំពង់ធំ សៀមរាប កំពង់ចាម តាកែវ ស្វាយរៀង បាត់ដំបង កែប និងត្បូងឃ្មុំ។ មនុស្ស៧៧៧នាក់ ទៀតកំពុងបន្តសម្រាកព្យាបាល៕
© រក្សាសិទ្ធិដោយ thmeythmey.com