ដោយ៖ ជា ពេជ្រដាឡែន

 

 

ថ្លែងក្នុងមហាសន្និបាតសុខាភិបាលពិភបលោកនៅថ្ងៃទី៣១ ខែឧសភា ប្រមុខ WHO លោក Tedros Adhanom Ghebreyesus អះអាងថា សា្ថប័នរបស់លោក ជួបប្រទះបញ្ហាប្រឈមដ៏ធំក្នុងការរក្សាការឆ្លើយតបទៅនឹងជំងឺកូវីដ-១៩ និងត្រូវការហិរញ្ញវត្ថុប្រកបដោយចីរភាព និងបត់បែនបាន។ លោក Tedros ក៏លើកឡើងពីភាពចាំបាច់ក្នុងការបង្កើតសន្ធិសញ្ញាអន្តរជាតិដើម្បីពង្រឹងការឆ្លើយតបជំងឺឆ្លងជាសកលផងដែរ។

 

រដ្ឋមន្រ្តីសុខាភិបាលប្រទេសសមាជិក WHO នឹងជួបគ្នាជាថ្មីនៅខែវិច្ឆិកាខាងមុខ ដើម្បីជជែកពីគម្រោងបង្កើតសន្ធិសញ្ញានេះ។ យ៉ាណាមិញ ការឈានដល់សន្ធិសញ្ញាអន្តរជាតិមួយ ទំនងជាត្រូវដើរលើផ្លូវ វែងឆ្ងាយទៅមុខទៀតក្នុងការតាក់តែង និងការអនុម័តសន្ធិសញ្ញានោះ។ ជាក់ស្ដែង អនុសញ្ញាក្របខណ្ឌ WHO ស្តីពីការត្រួតពិនិត្យថ្នាំជក់ដែលជាសន្ធិសញ្ញាសុខភាពលើកដំបូងរបស់ ពិភពលោក ត្រូវចរចា៤ឆ្នាំឯណោះ ទើបចេញជារូបរាងនៅឆ្នាំ២០០៣។

 

«អនុសាសន៍មួយដែលខ្ញុំជឿថា នឹងអាចពង្រឹងទាំង WHO និងសន្តិសុខសុខភាពពិភពលោកបាន ច្រើនបំផុតនោះ គឺសន្ធិសញ្ញាស្តីពីការត្រៀមបង្ការ និងការឆ្លើយតបជំងឺឆ្លង។» លោក Tedros បញ្ជាក់បែបនេះនាកិច្ចប្រជុំដដែល។
 

បើតាមទីភ្នាក់ងារព័ត៌មាន Reuters លោក ស្កុត ម៉ូរីសុន នាយករដ្ឋមន្រ្តីអូស្រ្តាលី បានថ្លែងក្នុង សន្និបាតដដែលថា សន្ធិសញ្ញាពិតជាមានសារសំខាន់ក្នុងការពង្រឹងសមត្ថភាពប្រទេសលើពិភពលោក និងផ្ដល់សិទ្ធិអំណាច និងសមត្ថភាពបន្ថែមដល់ WHO ក្នុងការទប់ទល់ជំងឺឆ្លងនៅថ្ងៃខាងមុខ ។ 
 

ចំណែកឯលោក Frank Tressler Zamorano ឯកអគ្គរដ្ឋទូតស៊ីលី ដែលថ្លែងតំណាងឱ្យប្រទេស៦០ អះអាងថា សន្ធិសញ្ញាស្តីពីជំងឺឆ្លងនឹងជួយបានច្រើនក្នុងការដោះស្រាយវិបត្តិពិភពលោក។ លោកក៏ បានអំពាវនាវឱ្យអ្នកជំនាញចូលរួមរៀបចំកែទម្រង់ប្រព័ន្ធ WHO ឡើងវិញផងដែរ៕