អន្តរជាតិ
រដ្ឋមន្រ្តីការបរទេសម៉ាល់ឌីវ ជាប់ឆ្នោតជាប្រធានមហាសន្និបាត UN លោក Abdulla Shahid រដ្ឋមន្រ្តីការបរទេសម៉ា់ល់ឌីវ។ រូបភាព៖ Xinhua
× រដ្ឋមន្រ្តីការបរទេសម៉ាល់ឌីវ លោក Abdulla Shahid បានជាប់ឆ្នោតជាប្រធានមហាសន្និបាតអង្គការសហប្រជាជាតិ (UNGA) សម្រាប់អាណត្តិឆ្នាំ២០២១ ដល់ ២០២២។ នេះ គឺជាលើកដំបូង ដែលម៉ាល់ឌីវមានរដ្ឋមន្រ្តីកាន់តំណែងជាប្រធាន UNGA។
មហាសន្និបាតអង្គការសហប្រជាជាតិ នៅថ្ងៃទី៧ ខែមិថុនា បានរៀបចំការបោះឆ្នោតជាសម្ងាត់មួយ ដើម្បីជ្រើសរើសប្រធានមហាសន្និបាតនៅអាណត្តិ២០២១-២០២២។ ក្នុងការបោះឆ្នោតនោះ លោក Abdulla Shahid រដ្ឋមន្រ្តីការបរទេសម៉ាល់ឌីវ បានយកឈ្នះគូប្រជែង ដែលជាអតីតរដ្ឋមន្រ្តីការបរទេសអាហ្វហ្កាណីស្ថាន លោក Zalmai Rassoul ក្នុងសំឡេងដ៏ច្រើនលើសលុប។
តាមការចុះផ្សាយរបស់ទីភ្នាក់ងារព័ត៌មាន AP លោក Shahid បានទទួលសំឡេងគាំទ្រចំនួន ១៤៣ ទល់ ៤៨ សំឡេងរបស់លោក Rassoul ។ ចំណែកសមាជិកចំនួនពីរប្រទេស របស់មហាសន្និបាត បានបោះអនុបវាទ។ ក្នុងការបោះឆ្នោតនេះ អ្នកតំណាងប្រទេសនីមួយៗ ដោយមានពាក់ម៉ាស់ការពារផងនោះ ត្រូវបានហៅឈ្មោះម្តងមួយៗ ដើម្បីឡើងមកបោះឆ្នោត ក្នុងប្រអប់ឈើមួយ។ ការបោះឆ្នោតលើប្រធាន UNGA ត្រូវធ្វើឡើង ក្នុងមួយឆ្នាំម្តង។
បន្ទាប់ពីជាប់ឆ្នោតជាប្រធានមហាសន្និបាតអង្គការសហប្រជាជាតិទី៧៥ លោក Shahid បានថ្លែងអរគុណ ទៅសមាជិក ដែលបានផ្តល់សេចក្តីទុកចិត្តដល់លោក។ ក្នុងសុន្ទរកថានៅក្នុងមហាសន្និបាត ប្រមុខការទូតម៉ាល់ឌីវរូបនេះ បានសន្យាជួយសង្រ្គោះសេដ្ឋកិច្ច ដែលរងគ្រោះដោយកូវីដ-១៩ និងបរិស្ថានពិភពលោកឡើងវិញ។ មិនតែប៉ុណ្ណោះ លោកក៏បានដាក់ចេញអាទិភាពចំនួន ៥ផងដែរ ដែលទាក់ទិននឹង ការឆ្លើយតបជំងឺកូវីដ-១៩, សមភាពវ៉ាក់សាំងបង្ការជំងឺកូវីដ-១៩, បរិស្ថាន, សិទ្ធិមនុស្ស និងសមភាពយេនឌ័រ។
អគ្គលេខាធិការអង្គការសហប្រជាជាតិ លោកអាន់តូនីញ៉ូ ហ្គូតេរ៉េស ក៏បានផ្ញើសារអបអរសាទរ លោក Shahid ផងដែរ និងបានចាត់ទុកមហាសន្និបាត គឺជាស្ថាប័នដ៏សំខាន់មួយ និងជាមូលដ្ឋានរបស់ UN៕
© រក្សាសិទ្ធិដោយ thmeythmey.com