ក្រុមកីឡាល្បុក្កតោកម្ពុជាបានឈ្នះមេដាយមាស៣ និងប្រាក់២ក្នុងការប្រកួតកីឡាយុទ្ធគុនចម្រុះអន្តរជាតិ (2021 International Martial Arts Contest) តាមប្រព័ន្ធអនឡាញ កាលពីថ្ងៃទី៣១ ខែតុលា កន្លងមក ដែលក្នុងនោះ កីឡាការិនី យស់ សញ្ចនា ឈ្នះមេដាយមាស២តែម្នាក់ឯងលើវិញ្ញាសាទ្វារមេគុណ (Bare Hands) និងវិញ្ញាសាជាក្រុម។ ចូលប្រឡូកក្នុង កីឡាល្បុក្កតោអស់រយៈពេល៦ឆ្នាំ វាជាសមិទ្ធផលដ៏អស្ចារ្យលើកដំបូងរបស់ យុវតីវ័យ២១ឆ្នាំរូបនេះ។
ដើម្បីជ្រាបច្បាស់សូម លោក-អ្នកទស្សនាវីដេអូខាងក្រោមដូចតទៅ៖
ព្រោះតែក្តីស្រឡាញ់ និងចង់ចូលរួមលើកស្ទួយយុទ្ធគុនដែលជាមរតកដូនតា កញ្ញា យស់ សញ្ចនា បានសម្រេចចិត្តចូល ហាត់ល្បុក្កតោ តាំងពីអំឡុងឆ្នាំ២០១៥មក។ យុវតីពីខេត្តកណ្តាលរូបនេះ ប្រឹងប្រែងឥតឈប់ឈរក្នុងការហ្វឹកហាត់ដើម្បី បំពេញក្តីសុបិនរបស់ខ្លួន បើទោះបីជាធ្លាប់រងរបួស គ្រេចដៃ គ្រេចជើង និងប្រឈមបញ្ហាផ្សេងៗក៏ដោយ។
«យើងជានារី បើប្រៀបធៀបទៅនឹងបុរស រៀងពិបាកជាងគេបន្តិច ព្រោះត្រូវហ្វឹកហាត់តែម្ដងចេះ។ យើងត្រូវហ្វឹកហាត់ម្ដង ឬពីរដងទើបចេះ»។ នេះជាការលើកឡើងរបស់កញ្ញា សញ្ចនា ដោយការប្រឹងប្រែងនាំឲ្យនាងក្លាយជាកីឡាការិនីល្បុក្កតោ ជម្រើសជាតិ ចាប់តាំងពីឆ្នាំ២០១៨មក លើជំនាញ ទ្វារមេគុនអាវុធមានមុខនារី, ទ្វារមេគុនព្រលឹងល្បុក្កតោឯកកត្តជននារី និងទ្វារមេគុនព្រលឹងល្បុក្កតោក្រុម។
ព្រឹត្តិការណ៍យុទ្ធគុនចម្រុះអន្តរជាតិ ដែលរៀបចំដោយគណៈកម្មការយុទ្ធគុនអន្តរជាតិ (WoMAU) នៅប្រទេសកូរ៉េខាងត្បូង មានកីឡាករ-កីឡាការិនីជាង២០០នាក់ មកពី១២ប្រទេសចូលរួម។ ក្នុងវិញ្ញាសាទ្វារមេគុណ សញ្ចនា ទទួលបានពិន្ទុលើសគេ ដោយទទួលបានមេដាយមាស ខណៈកីឡាការិនីវៀតណាម Nguyen Thi Hue May បានមេដាយប្រាក់។ មេដាយសំរឹទ្ធស្ទួន បានទៅលើកីឡាការិនីវៀតណាម Nguyen Hoang Trang និងកីឡាការិនីអ៊ូសបេគីស្ថាន Nazarova Ozoda។
![](https://image.thmeythmey.com/pictures/2021/11/16/san__2_.jpg)
កញ្ញា យស់ សញ្ចនា ម្ចាស់មេដាយមាស ពីការប្រកួតកីឡាយុទ្ធគុនចម្រុះអន្តរជាតិ តាមប្រព័ន្ធអនឡាញ នៅសាធារណរដ្ឋកូរ៉េ កាលពីថ្ងៃទី៣១តុលា ឆ្នាំ២០២១។
សម្រាប់វិញ្ញាសាជាក្រុមចម្រុះ (Team Mixed Gender Group ) សញ្ចនា ឈ្នះមេដាយមាសរួមជាមួយកីឡាករ គឹម ទិត្យសុវឌ្ឍន: កីឡាករ រុន សាលីត កីឡាករ ពន្លឺ ពេជ្រមរកត កីឡាករ អោក រិទ្ធានី កីឡាករ ព្រំ ពេញពិសាល កីឡាករ ឈើន វណ្ណរិទ្ធ និងកីឡាការិនី ភិរម្យ មន្នីរ័ត្ន ខណៈក្រុមហ្វីលីពីន បានមេដាយប្រាក់ ក្រុមអ៊ូសបេគីស្ថាន និងក្រុមកូរ៉េខាងត្បូង បានមេដាយសំរឹទ្ធស្ទួន។
ជុំវិញនៃការទទួលបានមេដាយមាសពីការប្រកួតកម្រិតអន្តរជាតិនេះ សញ្ចនា បានរៀបរាប់ប្រាប់សារព័ត៌មាន ThmeyThmey ដូច្នេះថា៖«យើងមានការប្រកួតក្នុងក្រុមជាមុនសិន មុនពេលបញ្ជូនឈ្មោះបេក្ខជន។ នៅក្នុងការប្រកួតនោះ ដំណាក់កាលទី១ មានបេក្ខជនពី១២ប្រទេស គ្រប់បេក្ខជនត្រូវថតវីដេអូរៀងៗខ្លួន ហើយ Submit (ដាក់) ទៅខាងកូរ៉េ។ ដំណាក់កាល ទី២ជ្រើសរើស៧វីដេអូ សម្រាប់ការប្រកួតនៅជុំចុងក្រោយ ហើយយើងក៏បានឱកាសឈ្នះមេដាយមាស»។
ការទទួលបានមេដាយមាសរបស់និស្សិតឆ្នាំទី៤ ដែលកំពុងសិក្សាលើជំនាញគណនេយ្យរូបនេះ គឺមិនមែនកើតឡើងដោយចៃដន្យឡើយ ពោលគឺ វា កើតចេញការខិតខំប្រឹងប្រែងទ្វេរដងរបស់នាងផ្ទាល់ រួមជាមួយនឹងការរៀបចំផែនការ និងយុទ្ធសាស្ត្រ និងហ្វឹតហាត់ច្បាស់លាស់ ជាពិសេសគឺការសិក្សាពីចំណុចខ្សោយ និងភាពបរាជ័យនាពេលកន្លងមករបស់ខ្លួន។ «លោកគ្រូបង្វឹករបស់ខ្ញុំផ្ទាល់ ទាំងខ្លួនខ្ញុំផ្ទាល់ គឺយើងបានខិតខំប្រឹងប្រែងអស់ពីសមត្ថភាព ដើម្បីការបង្ហាញពីក្បាច់គុនល្បុក្កតោមួយ មានភាពហ្មត់ចត់ ហើយជាពិសេសចង់ឱ្យពិភពលោកទាំងមូល ស្គាល់ពីក្បាច់គុណល្បុក្កតោនេះទូលំទូលាយ»។ នេះជាសម្តីរបស់ កញ្ញា យស់ សញ្ចនា ។
លោក វី តារ៉ា គ្រូបង្វឹកក្រុមជម្រើសជាតិ នៃសហព័ន្ធកីឡាគុនល្បុក្កតោកម្ពុជា មានប្រសាសន៍ថា កញ្ញា សញ្ចនា គឺជាកីឡាការិនីជម្រើសជាតិមួយរូបដែលរៀនអភិវឌ្ឍបានយ៉ាងល្អ តាមរយៈការកែប្រែពីចំណុចខ្សោយរបស់ខ្លួនឱ្យ ទៅជាចំណុចខ្លាំងវិញ។
![](https://image.thmeythmey.com/pictures/2021/11/16/san__3_.jpg)
កីឡាការិនី យស់ សញ្ចនា (ខាងមុខ)លើកបង្ហាញមេដាយសំរឹទ្ធ ដែលដណ្តើមបានក្នុងការប្រកួតកីឡាស៊ីហ្គេមឆ្នាំ២០១៩
គ្រូបង្វឹករូបនេះ បានគូសបញ្ជាក់ថា៖«ចំណុចពិសេសរបស់ សញ្ចនា គឺលើការផ្ដោតអារម្មណ៍របស់គាត់ គាត់ព្យាយាមស្ដាប់អ្វីដែលជាដំបូន្មានរបស់យើង ក្នុងការកែប្រែ ចំណុចខ្សោយទៅជាចំណុចខ្លាំង កែពីកន្លែងមិនទាន់ល្អ ទៅជាល្អ ហើយគាត់ជាមនុស្សមានឆន្ទៈ ក្នុងការធ្វើការងារ»។ លោក បន្ថែមថា៖«អ្វីដែលជាស្មារតី ក្រុមជម្រើសជាតិរបស់យើង បើទោះលទ្ធផលការប្រកួតយ៉ាងណាក៏ដោយ ប៉ុន្តែយើងនៅតែមានស្មារតី ក្នុងការបង្ហាញចេញឱ្យអស់ពីសមត្ថភាព ឱ្យអស់ពីលទ្ធភាព ដែលអាចធ្វើទៅបាន ដើម្បីបង្ហាញពិភពលោកឱ្យគេស្គាល់អំពីសក្ដានុពលអ្វីដែលកម្ពុជាមាន»។
បើតាមលោក វី តារ៉ា បច្ចុប្បន្ន កម្ពុជា មានកីឡាករជម្រើសជាតិផ្នែកគុនល្បុក្កតោ ចំនួន២៨នាក់។ ក្នុងនោះ មាន១១នាក់ ជាស្ត្រី ដែលកំពុងហ្វឹកហាត់ក្រោមការផ្គត់ផ្គង់ពីសហព័ន្ធកីឡាគុនល្បុក្កតោកម្ពុជា និងក្រសួងអប់រំ យុវជន និងកីឡា។ សម្រាប់ប្រកួតកីឡាយុទ្ធគុនចម្រុះពិភពលោក (The 2021 International martial arts contest) ឆ្នាំ២០២១ នៅប្រទេសកូរ៉េខាងត្បូង កាលពីថ្ងៃទី៣១តុលា កន្លងថ្មីៗនេះ កម្ពុជាដណ្ដើមបានមេដាយមួយចំនួន ក្នុងនោះបានមេដាយមាស៣ ប្រាក់២ និងសំរឹទ្ធ១៕