លោក ឆាយ គឹមខឿន អ្នកនាំពាក្យស្នងការដ្ឋាននគរបាលជាតិ បានបញ្ជាក់ថា ករណីបង្ខាំងមនុស្សនៅខណ្ឌសែនសុខនេះ គឺកម្លាំងសមត្ថកិច្ចបានឃាត់ខ្លួនជនជាតិចិន៧៤នាក់។

ប៉ុន្តែបន្ទាប់ពីសាកសួរ រកឃើញថាមានចិន៣នាក់ ពាក់ព័ន្ធនឹងការប្រព្រឹត្តបទល្មើសបង្ខាំងមនុស្ស។

 

ការចុះបង្រ្កាបក្រុមជនជាតិចិន នៅផ្ទះមួយកន្លែងក្នុងខណ្ឌសែនសុខ រាជធានីភ្នំពេញនេះ ធ្វើឡើងថ្ងៃទី១៨វិច្ឆិកា។ ពួកចិនទាំងនោះ បានបង្ខាំងជនជាតិថៃ៩៩នាក់ ដើម្បីជំរិតទារប្រាក់។ នេះបើតាមលោក ឆាយ គឹមខឿន ដោយបញ្ជាក់ថា ជនរងគ្រោះថៃទាំងនោះបានចាញ់បោកមេខ្យល់មកធ្វើការងារឲ្យក្រុមហ៊ុនចិនលក់ផលិតផលអនឡាញ។ 

 

អ្នកនាំពាក្យរូបនេះ បានថ្លែងប្រាប់សារព័ត៌មានថ្មីៗតាមប្រព័ន្ធតេឡេក្រាមថា៖ «ចិនទាំង៧៤នាក់ដែលជាប់ពាក់ព័ន្ធនឹងការបង្ខាំងជនជាតិថៃ៩៩នាក់នោះ មាន៣នាក់ជាអ្នកធ្វើទារុណកម្មនិងបង្ខាំងមនុស្ស ទើបយើងធ្វើរបាយការណ៍ ហើយបញ្ជូនទៅតុលាការរួចហើយ។ ក្រៅពីនេះ(ចិន៧១នាក់) យើងដោះលែងវិញ ព្រោះពួកគេគ្រាន់តែជាបុគ្គលិកធ្វើការធម្មតា»។ លោកបញ្ជាក់ថា ជនជាតិចិនទាំងនោះ បានបញ្ជូនទៅតុលាការកាលពីថ្ងៃទី២២វិច្ឆិកា។ 

 

ទន្ទឹមនឹងនេះ លោក ឆាយ គឹមខឿន បានឲ្យដឹងថា ជនជាតិថៃទាំង៩៩នាក់នោះ គឺឆ្លងដែនខុសច្បាប់ដើម្បីស្វែងរកការងារធ្វើនៅកម្ពុជា៕