អន្តរជាតិ
វិបត្តិអ៊ុយក្រែន៖ លោក ពូទីន ថា រុស្ស៊ីគ្មានមូលហេតុអ្វីដែលត្រូវដកថយឡើយ ![ប្រធានាធិបតីរុស្ស៊ី វ៉្លាឌីមៀ ពូទីន ។ រូបថតពីវេបសាយប្រធានាធិបតីរុស្ស៊ី](https://image.thmeythmey.com/pictures/2021/12/22/rus.jpg)
ប្រធានាធិបតីរុស្ស៊ី វ៉្លាឌីមៀ ពូទីន ។ រូបថតពីវេបសាយប្រធានាធិបតីរុស្ស៊ី
×![]()
រុស្ស៊ីគ្មានមូលហេតុត្រូវដកថយពីការការប្រឈមមុខដាក់គ្នាជាមួយអាម៉េរិកជុំវិញរឿងអ៊ុយក្រែននោះទេ ហើយរុស្ស៊ីនឹងឆ្លើយតបយ៉ាងម៉ឺងម៉ាត់ ប្រសិនបើលោកខាងលិចនៅតែបន្តឈ្លានពានបន្ទាត់ក្រហម។ ប្រធានាធិបតីរុស្ស៊ី វ្ល៉ាឌីមៀ ពូទីន បានលើកឡើងបែបនេះនៅចំពោះមុខមន្ត្រីយោធារុស្ស៊ីនៅថ្ងៃទី២១ ខែធ្នូ។
«អ្វីដែលអាម៉េរិកកំពុងធ្វើនៅអ៊ុយក្រែន គឺស្ថិតនៅមាត់ទ្វាររបស់យើង ហើយពួកគេគួរតែយល់ថា យើងគ្មានមូលហេតុអ្វីដែលត្រូវដកថយទៀតទេ។ តើពួកគេគិតថា យើងនឹងឈរមើលដោយនៅស្ងៀមស្ងាត់ឬ?» ប្រធានាធិបតីរុស្ស៊ី វ៉ា្លឌីមៀ ពូទីន បញ្ជាក់បែបនេះទៅកាន់ក្រុមមន្ត្រីយោធារុស្ស៊ី។ លោកក៏ព្រមានទៀតថា ប្រសិនបើលោកខាងលិចនៅបន្តសកម្មភាពឈ្លានពាននេះទៀតនោះរុស្ស៊ីនឹងមិនរាក់ទាក់ទៀតឡើយ ហើយរុស្ស៊ីនឹងចាត់ចំណាត់ការយោធាយ៉ាងម៉ឺងម៉ាត់ដើម្បីឆ្លើយតបទៅវិញ។
ប្រមុខរដ្ឋរុស្ស៊ី មិនបានបញ្ជាក់ច្បាស់ពីចំណាត់ការនោះឡើយ។ យ៉ាងណាមិញ ឃ្លាដែលលោកបានលើកឡើងខាងលើទំនងជាដូចអ្វីដែលអនុរដ្ឋមន្ត្រីការបរទេសរុស្ស៊ី Sergei Ryabkov បាននិយាយថ្មីៗនេះថា រុស្ស៊ីអាចនឹងដាក់ពង្រាយមីស៊ីលនុយក្លេអ៊ែរចម្ងាយមធ្យមដើម្បីឆ្លើយតបនឹងសកម្មភាពលោកខាងលិច។
ជាថ្មីម្ដងទៀត លោក ពូទីន ក៏បានទាមទារឱ្យលោកខាងលិចធានាសន្តិសុខរបស់រុស្ស៊ីដោយច្បាប់តែម្ដង ប៉ុន្តែលោកដាក់ផ្លែផ្កាដែរថា លោកពិបាកនឹងជឿទុកចិត្តលើអាម៉េរិកចំពោះការគោរពសន្ធិសញ្ញា ឬច្បាប់ណាមួយណាស់។ ត្រង់នេះ មេដឹកនាំរុស្ស៊ីរូបនេះលើកឡើងថា៖ «យើងត្រូវការការធានាដោយច្បាប់រយៈពេលវែង។ ប៉ុន្តែការធានាផ្នែកច្បាប់របស់ពួកគេក៏មិនអាចជឿទុកចិត្តបានដែរ ពីព្រោះអាម៉េរិកងាយស្រួលដកខ្លួនចេញពីកិច្ចព្រមព្រៀងអន្តរជាតិក្រោមមូលហេតុបាត់បង់ផលប្រយោជន៍ខ្លួន ឬហេតុផលផ្សេងទៀត ហើយពេលខ្លះក៏មិនផ្តល់ការពន្យល់អ្វីទាំងអស់»។
ក្រៅពីនេះ ក្នុងជំនួបតាមទូរស័ព្ទនៅថ្ងៃទី២១ ខែធ្នូជាមួយប្រធានាធិបតីបារាំង អេម៉ានុយអែល ម៉ាក្រុង លោក ពូទីន បានសង្កត់ធ្ងន់ពីការកោះប្រជុំក្រុម Normandy ដែលអាចនឹងជួយជំរុញឱ្យអ៊ុយក្រែនអនុវត្តកិច្ចព្រមព្រៀងសន្តិភាពដែលមានស្រាប់។ ក្រុម Normandy មានរុស្ស៊ី អ៊ុយក្រែន បារាំង និងអាល្លឺម៉ង់។ យ៉ាងណាមិញ អ៊ុយក្រែនបានវាយបកទៅវិញថា រុស្ស៊ីនោះទេដែលមិនព្រមចូលរួមគោរពកិច្ចព្រមព្រៀងសន្តិភាពដែលមានស្រាប់ទាំងនោះ៕
© រក្សាសិទ្ធិដោយ thmeythmey.com