អគាររដ្ឋបាលអគ្គនាយកដ្ឋានគយ និងរដ្ឋាករកម្ពុជា កម្ពស់៣៥ជាន់ ចំណាយទឹកប្រាក់អស់៣៣,៥លានដុល្លារអាមេរិក ដោយចាប់ផ្តើមពីខែកុម្ភៈ ឆ្នាំ២០១៧ ហើយបញ្ចប់នៅខែកក្កដា ឆ្នាំ២០២០។ អគារនេះ មានចំណតយានយន្ត សាលប្រជុំធំៗ អាហារដ្ឋាន ក្លិបហាត់នៅជាន់ទី៣១ ស្កាយបារនៅជាន់ទី៣៣ និង៣៤។

 

រីឯអាគាសាលាជាតិគយ ផ្តើមសាងសង់នៅខែតុលា ឆ្នាំ២០១៩ ហើយបញ្ចប់នៅខែតុលា ឆ្នាំ២០២១ ក្នុងទឹកប្រាក់១៤,៥លានដុល្លារអាម៉េរិក ដោយមានទីតាំងនៅតំបន់អភិវឌ្ឍន៍ OCIC សង្កាត់ព្រែកតាសេក ខណ្ឌជ្រោយចង្វារ ។ ដោយឡែកអគារសារមន្ទីរគយ ត្រូវបានរៀបចំជួសជុល កែលម្អឡើងវិញ អស់ទឹកប្រាក់៣៨ម៉ឺនដុល្លារ។

 

ពិធីសម្ពោធអគារទាំងបីនេះ កើតឡើងចំខួប៧០ឆ្នាំនៃការបង្កើតស្ថាប័នគយ និងរដ្ឋាការកម្ពុជា ដោយសម្តេចនាយករដ្ឋមន្ត្រី ហ៊ុន សែន មានប្រសាសន៍រំលឹកដល់គុណូបការៈដ៏ធំធេងរបស់ព្រះករុណា សម្តេចព្រះនរោត្តម សីហនុ ព្រះបរមរតនកោដ្ឋ ដែលបានបង្កើតស្ថាប័នគយនេះឡើង។ 

 

«មានសម្ភារទំនើប អគារទំនើប តែមនុស្សមិនទំនើបទេ កុំសង្ឃឹម»។ នេះជាការក្រើនរំលឹករបស់សម្តេចនាយករដ្ឋមន្ត្រី ហ៊ុន សែន ដោយជំរុញឲ្យមន្ត្រីរបស់ខ្លួនបន្តបេសកកម្មបម្រើជាតិប្រកបដោយស្មារតីទទួលខុសត្រូវ។

 

អគ្គនាយកដ្ឋានគយ និងរដ្ឋាករត្រូវបានបង្កើតឡើងក្នុងសម័យសង្គមរាស្ត្រនិយមដោយព្រះរាជក្រមកាលពីឆ្នាំ១៩៥១។ កិច្ចដំណើរការរបស់អគ្គនាយកដ្ឋានគយនិងរដ្ឋាករត្រូវបានបញ្ឈប់ពីឆ្នាំ១៩៧៥ ដល់ ឆ្នាំ១៩៧៩ ក្រោមរបបខ្មែរក្រហម។ អង្គភាពនេះចាប់ដំណើរការឡើងវិញនៅថ្ងៃទី១៣ ខែកក្កដា ឆ្នាំ១៩៧៩ ក្រោមឱវាទក្រសួងពាណិជ្ជកម្ម។ 

 

អង្គភាពនេះត្រូវបានផ្ទេរទៅនៅក្រោមឱវាទក្រសួងសេដ្ឋកិច្ចនិងហិរញ្ញវត្ថុ តាមរយៈអនុក្រឹត្យ នាឆ្នាំ១៩៨៨។ ទីចាត់ការគយនិងរដ្ឋាករត្រូវបានតម្លើងជាអគ្គនាយកដ្ឋានគយនិងរដ្ឋាករកម្ពុជា (អគរ) តាមរយៈអនុក្រឹត្យលេខ ១៣៤ ចុះថ្ងៃទី១៥ ខែកញ្ញា ឆ្នាំ២០០៨។ អគរ គឺជារដ្ឋបាលសាធារណៈស្ថិតក្រោមឱវាទក្រសួងសេដ្ឋកិច្ចនិងហិរញ្ញវត្ថុ៕