អន្តរជាតិ
អាម៉េរិក ជំរុញឱ្យចិនឱ្យបន្ធូរបន្ថយវិធានចត្តាឡីស័កសម្រាប់អ្នកការទូតរបស់ខ្លួន ![](https://image.thmeythmey.com/pictures/2022/01/28/000_9xb47n.jpg)
×![]()
ទីក្រុងវ៉ាស៊ីនតោន បានស្នើឱ្យទីក្រុងប៉េកាំងបន្ធូរបន្ថយវិធានចត្តាឡីស័កសម្រាប់អ្នកការទូតអាម៉េរិក ដោយលើកមូលហេតុថា វិធានការរឹតត្បិតនេះប្រឆាំងនឹងអភ័យឯកសិទ្ធិការទូត។
អាជ្ញាធរចិន នៅតែបន្តអនុវត្តគោលនយោបាយរឹតត្បិតយ៉ាងតឹងរ៉ឹងចំពោះការទប់ស្កាត់ការឆ្លងរាលដាលជំងឺកូវីដ-១៩ ហើយចិនក៏បានដាក់តម្រូវការឱ្យមានការធ្វើចត្តាឡីស័ក យ៉ាងហោចណាស់១៤ថ្ងៃសម្រាប់អ្នកដំណើរមកពីក្រៅប្រទេស។ វិធានការនេះ ត្រូវបានអនុវត្តយ៉ាងម៉ត់ចត់សឹងគ្មានករណីលើកលែង។ អាម៉េរិក ហាក់មិនសប្បាយចិត្តនឹងចំណាត់ការតឹងរ៉ឹងបែបនេះឡើយ។
អំឡុងសន្និសីទកាសែតថ្ងៃទី២៧ ខែមករា អ្នកនាំពាក្យក្រសួងការបរទេសអាម៉េរិកលោក Ned Price បានលើកឡើងថា អាម៉េរិកបានពិភាក្សាជាមួយចិនអំពីបញ្ញត្តិចត្តាឡីស័ក និងការធ្វើតេស្តរកជំងឺកូវីដ-១៩ ដែលផ្ទុយនឹងអភ័យឯកសិទ្ធិរបស់តំណាងអាម៉េរិក។
«ពួកយើងបានផ្តល់អនុសាសន៍ដែលពួកយើងគិតថា ជាជម្រើសសមហេតុផល និងត្រូវគ្នាជាមួយនឹងវិធានការបន្ធូរបន្ថយសម្រាប់ប្រឆាំងនឹងជំងឺកូវីដ-១៩ ព្រមទាំងស្របតាមបទដ្ឋានការទូតអន្តរជាតិផងដែរ»។ លោក Price បញ្ជាក់បែបនេះ។
បើតាមមន្រ្តីក្រសួងការបរទេសអាម៉េរិកដដែលនេះ ស្ថានទូតអាម៉េរិកក្នុងទីក្រុងប៉េកាំងនៅតែមិនផ្លាស់ប្តូរស្ថានភាពប្រតិបត្តិការខ្លួនឡើយ ទោះបីជាមានការព្រួយបារម្ភជុំវិញផលប៉ះពាល់លើអ្នកការទូតដូចបានរៀបរាប់ខាងលើក៏ដោយ៕
© រក្សាសិទ្ធិដោយ thmeythmey.com