ដោយ៖ សុង សុធាវី
ភ្នំពេញ៖ ការធានានិរន្តរភាពនិងបង្កើនការអភិវឌ្ឍរបស់ស្ថាប័នជាកាតព្វកិច្ចដែល លោក ជេត ជាលី បាននិងកំពុងទទួលបន្ទុកក្នុងនាមជាសាកលវិទ្យាធិការសាកលវិទ្យាល័យភូមិន្ទភ្នំពេញ(RUPP) រយៈពេលប្រមាណ៩ឆ្នាំមកនេះ។ ក្រៅពីអភិវឌ្ឍនរចនាសម្ព័ន្ធទាំងផ្នែករឹង លោក ជេត ជាលី ប្រាប់សារព័ត៌មានថ្មីៗតាមរយៈកម្មវិធី«គំនិតថ្មី» ថា លោក និងមន្ត្រីទាំងអស់ក៏បានប្រឹងប្រែងបង្កើតបរិយាកាសសិក្សាគ្រប់ទីកន្លែងដល់សិស្សនិស្សិតផងដែរ។ សាកលវិទ្យាធិការរូបនេះសង្ឃឹមថាភូមិន្ទភ្នំពេញមិនត្រឹមតែជាកន្លែងបណ្តុះធនធានមនុស្សប៉ុណ្ណោះទេ ប៉ុន្តែជាកន្លែងបណ្តុះចិត្តស្រឡាញ់បរិស្ថានធម្មជាតិនិងប្រទេសជាតិដល់សិស្សនិស្សិតខ្មែរផងដែរ។
ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍រវាងកញ្ញា សុង សុធាវី អ្នកសម្របសម្រួល កម្មវិធី «គំនិតថ្មី» និង លោក ជេត ជាលី ដូចតទៅ៖
រយៈពេលប្រមាណ ៩ឆ្នាំហើយ ដែលលោក ជេត ជាលី បានដឹកនាំសាកវិទ្យាល័យភូមិន្ទភ្នំពេញ។ ក្នុងនាមជាសាកវិទ្យាធិការ លោក ជេត ជាលី តែងតែប្រកាន់ខ្ជាប់នូវគោលការណ៍ចំនួន២ ចម្បង នោះគឺការផ្តល់យុត្តិធម៌ដល់បុគ្គលិក និងមន្ត្រីទាំងអស់ និងការផ្តល់ការយកចិត្តទុកដាក់ចំពោះសុខទុក្ខរបស់មន្ត្រី។ ក្រៅពីធម្មនុញ្ញទាំង២នេះ សាកលវិទ្យាធិការរូបនេះ ក៏ចាត់ទុកថា បុគ្គលិក និងមន្ត្រីទាំងអស់នៅក្នុងសាកលវិទ្យាល័យ គឺជាបក្សពួករបស់ខ្លួនផងដែរ។
លោក ជេត ជាលី ពន្យល់បន្ថែមដូច្នេះ៖« នៅកន្លែងនេះ អត់មានបក្សពួកទេ។ ខ្ញុំគ្មានអ្នកណាមកជាមួយខ្ញុំទេ។ ខ្ញុំមកជានាយកនៅកន្លែងនេះម្នាក់ឯង ព្រោះខ្ញុំយល់ថាមន្រ្តីនៅទីនេះ ទាំងមន្ត្រីរដ្ឋ និងមន្ត្រីកិច្ចសន្យា ជាង១ពាន់នាក់ គឺជាគ្នាខ្ញុំ ទាំង១ពាន់នាក់។ ខ្ញុំអត់មាននាំអ្នកក្រៅណា សូម្បីតែ១នាក់ ចូលមកជាមួយខ្ញុំ។ ហើយអ្នកទាំងអស់នេះ គេត្រៀមខ្លួនរួចរាល់ធ្វើការជាមួយខ្ញុំ។ ហើយខ្ញុំត្រូវតែយុត្តិធម៌ជាមួយគេទាំងអស់គ្នា ហើយខ្ញុំខ្វល់ខ្វាយពីគេ។»។
ទន្ទឹមនឹងការប្រកាន់ខ្ជាប់គោលការណ៍ដឹកនាំទាំងនេះហើយ លោក ជេត ជាលី ក៏មានសមិទ្ធផលជាច្រើនដែរ នៅក្នុងការអភិវឌ្ឍរចនាសម្ព័ន្ធទាំងផ្នែករឹង និងផ្នែកទន់ នៅក្នុងគ្រឹះស្ថាន ដើម្បីបង្កើនប្រសិទ្ធភាព និងបរិយាកាសសិក្សាសម្រាប់និស្សិត និងធានានិរន្តរភាព ក៏ដូចជាភាពរីកចម្រើនរបស់សាកលវិទ្យាល័យ។
![](https://image.thmeythmey.com/pictures/2022/07/05/waa__2_.jpg)
បណ្ឌិត ជេត ជាលី ក្នុងបទសម្ភាសជាមួយកម្មវិធី «គំនិតថ្មី» នៃសារព័ត៌មានថ្មីៗ
ជុំវិញការអភិវឌ្ឍន៍រចនាសម្ព័ន្ធផ្នែករឹង មានអគារសិក្សាដ៏ស្គឹមស្គៃចំនួន២ បានលេចត្រដែត ឡើង ក្នុងពេលប៉ុន្មានឆ្នាំមកនេះ នោះគឺអគារវិទ្យាសាស្រ្តបច្ចេកវិទ្យា តម្លៃប្រមាណ ៣លានដុល្លារ ដែលជាការវិនិយោគរបស់រាជរដ្ឋាភិបាល និងអគារបណ្តុះធុរកិច្ចថ្មីនៅកម្ពុជា ដែលសាងសង់ឡើង ក្រោមជំនួយរបស់សាធារណរដ្ឋកូរ៉េ។ កញ្ចប់ជំនួយរបស់កូរ៉េខាងត្បូង មានទំហំជិត៧ លានដុល្លារ សម្រាប់សំណង់អគារសិក្សា និងការអនុវត្តគម្រោងនានា រយៈ ពេល ៥ឆ្នាំ។
បន្ថែមពីនេះ រូបចម្លាក់មួយចំនួន ដែលបង្ហាញ ពីជីវប្រវត្តិរបស់ថ្នាក់ដឹកនាំសាកលវិទ្យាល័យ ក្នុងជំនាន់នីមួយៗ កាហ្វេនិស្សិត បន្ទប់ពិសោធន៍សម្រាប់និស្សិតជីវៈវិទ្យា បន្ទប់ពិសោធន៍ ដង្កូវនាង ក៏ត្រូវបានសាងសង់ឡើងដែរ។ «ជាទស្សនៈរបស់ពួកខ្ញុំ គឺធ្វើឱ្យសាលាទាំងមូល ទៅជាកន្លែងរៀន។ មិនមែនតែក្នុងថ្នាក់រៀនទេ ដែលជាកន្លែងរៀន។ ជាទស្សនវិស័យ របស់ពួកខ្ញុំ គឺធ្វើឱ្យសាលា ក្លាយជាកន្លែងមនោរម្យ កន្លែងទាំងអស់គ្នាអាចប្រើបាន។»។ នេះជាការពន្យល់បន្ថែម របស់លោក ជេត ជាលី សាកលវិទ្យាធិការសាកលវិទ្យាល័យ ភូមិន្ទភ្នំពេញ។
សាកលវិទ្យាធិការរូបនេះ សង្ឃឹមយ៉ាងមុតមាំថា សាកលវិទ្យាល័យភូមិន្ទភ្នំពេញ មិនត្រឹម តែជាថ្នាលបណ្តុះបណ្តាលធនធានមនុស្សកម្ពុជានោះទេ ប៉ុន្តែក៏អាចបណ្តុះនូវទឹកចិត្តស្រ ឡាញ់ ធម្មជាតិ និងប្រទេសជាតិ ដល់សិស្ស-និស្សិតផងដែរ៕