ដើម្បីបណ្ដុះទម្លាប់ការអានសៀវភៅ ធ្វើលំហាត់ នៅពេលចេញលេង និងប្រើប្រាស់ទូរស័ព្ទឱ្យចំគោលដៅក្នុងវ័យសិក្សា វិទ្យល័យ​ ហ៊ុន សែន ជីខលើ ស្ថិតក្នុងឃុំជីខលើ ស្រុកស្រែអំ​បិល ខេត្តកោះកុង បានដាក់ចេញវិន័យ លើការប្រើប្រាស់ទូរស័ព្ទដៃ។ ពោលគឺមិនអនុ​ញ្ញាតឱ្យប្រើប្រាស់ទូរស័ព្ទ smart phone នៅអំឡុងម៉ោងសិក្សា ឬបរិវេណសាលានោះឡើយ។ 
 

ជុំវិញការអនុវត្តវិធានការដូច្នេះ លោក ម៉ែន ចាន់ឌីណា លេខានាយកវិទ្យាល័យ ហ៊ុន សែន ជីខលើ លើកឡើងថា ធ្វើឡើងក្នុងគោលបំណង ដើម្បីឱ្យសិស្សយកចិត្តទុកដាក់លើការសិក្សាជាងមុន និងជំនួសការប្រើប្រាស់ទូរស័ព្ទលេងហ្គេម ឬសកម្មភាពអសីលធម៌ ជំនួសមកអានសៀវភៅ និងធ្វើលំហាត់វិញ។ 
 

លោក ម៉ែន ចាន់ឌីណា អះអាងទៀតថា ប្រសិនបើក្នុងករណីសិស្សល្មើស ប្រើប្រាស់ទូរស័ព្ទ សាលានឹងចាត់វិធានការណ៍ រួមមាន ការប្រមានផ្ទាល់មាត់ ដកហូតទូរស័ព្ទទុកចន្លោះពី ៣ខែ ទៅ៦ខែ ផងដែរ។ លោកបន្ថែមថា គ្រូបង្រៀនក្នុងសាលា តែងធ្វើសកម្មភាពត្រួតពិនិត្យការប្រើប្រាស់ទូរស័ព្ទនេះ ដើម្បីឱ្យកាន់តែមានប្រសិទ្ធភាព៕

 

សកម្មភាពសិស្សានុសិស្ស កំពុងសិក្សានៅវិទ្យាល័យ ហ៊ុន សែន ជីខលើ ស្ថិតក្នុងភូមិជីខ ឃុំជីខលើ ស្រុកស្រែអំបិល ខេត្តកោះកុង។