ដោយ៖ ហាក់ ស្រីពេជ្រ
បូទុមសាគរ, កោះកុង៖ សាលាបឋមសិក្សាកណ្ដោល ដែលស្ថិតក្នុងឃុំកណ្តោល ស្រុកបូទុមសាគរ ខេត្តកោះកុង មានសិស្សសរុបចំនួន ១៥៥នាក់ កំពុងសិក្សា ប៉ុន្តែមិនមានសិស្សដែលមានពិការភាពនោះទេ។ យ៉ាងណាក៏ដោយ នៅសាលានេះ មានជម្រាលសម្រាប់ជនមានពិការភាពទាំងនៅអគារសិក្សា និងបន្ទប់ទឹក។ លោក យិន សុង នាយកសាលាបឋមសិក្សាកណ្តោល អះអាងថា ជម្រាលនេះ គឺសង់ត្រៀមទទួលសិស្សដែលមានពិការភាពដែលត្រូវចូលសិក្សានៅសាលារបស់ខ្លួន។
ដើម្បីជ្រាបច្បាស់សូមទស្សនាកិច្ចសម្ភាសខាងក្រោមនេះ៖
សាលាបឋមសិក្សាកណ្ដោល មានទីតាំងនៅលើបណ្តោយផ្លូវលេខ ៤៨ ស្ថិតក្នុងភូមិសាស្ត្រភូមិកណ្តោល ឃុំកណ្តោល ស្រុកបូទុមសាគរ ខេត្តកោះកុង។ នៅក្នុងឆ្នាំសិក្សា ២០២១-២០២២នេះ សាលាមានសិស្សកំពុងសិក្សាចំនួន១៥៥នាក់ ក្នុងនោះ សិស្សស្រីមានចំនួន ៦៤នាក់។ នេះបើតាមលោក យិន សុង នាយកសាលាបឋមសិក្សាកណ្តោល។
លោក យិន សុង បានអះអាងថា នៅសាលារបស់ខ្លួន មិនមានសិស្សមានពិការភាពនោះទេប៉ុន្តែក្នុងចំណោមអគារសិក្សា ៣ខ្នងនៅបរិវេណសាលាបឋមសិក្សាកណ្ដោលនេះ មានអគារ ចំនួន២ខ្នង បានសង់ជម្រាលសម្រាប់ជនពិការ។ មិនតែប៉ុណ្ណោះ បង្គន់អនាម័យនៅក្នុងសាលានេះ ក៏មានជម្រាលសម្រាប់ជនមានពិការភាពដែរ។
ជុំវិញការសាងសង់ជម្រាលនេះ លោកនាយកសាលាបឋមកណ្តោលពន្យល់ថា ជម្រាលនេះគឺបានសង់រួចជាយូរឆ្នាំមកហើយ គឺដើម្បីត្រៀមរួចជាស្រេច សម្រាប់សិស្សានុសិស្ស ដែលមានពិការភាព ដែលត្រូវចូលសិក្សា។ «ធ្វើហ្នឹង គឺយើងត្រៀម ត្រៀម ដើម្បីមានជនពិការដែលគ្នាបានចូលសិក្សា។ សិក្សាក្នុងសាលាយើងខ្ញុំ»។
បើតាមលោក យិន សុង ការសង់ជម្រាលនេះ មានសារៈសំខាន់ណាស់ បើទោះមិនទាន់សិស្សមែន ប៉ុន្តែនៅពេលសហគមន៍មានការប្រជុំនានា សាលារៀន បានក្លាយជាទីតាំងសម្រាប់ការប្រជុំ។ មានន័យថា បើសិនក្នុងការប្រជុំនោះ មានពលរដ្ឋដែលមានពិការភាព ស្ត្រីមានផ្ទៃពោះ មកចូលរួមដែរ វានឹងផ្តល់ភាពងាយស្រួលក្នុងការឡើងចុះអគារនេះ សម្រាប់ពួកគាត់។ «ជម្រាលជនពិការហ្នឹងមានសារៈសំខាន់ណាស់ ដល់សិស្សក្តី ដល់សហគមន៍ក្តី ដែលគាត់ចូលរួមប្រជុំអី គាត់អាចឡើងមកលើបាន ដើម្បីចូលរួមក្នុងការសន្ទនាផ្សេងៗ។ បើសិស្សវិញ គឺយើងទទួលក្នុងការសិក្សា។ បើសិនជាយើងអត់មានជម្រាលចឹង សិស្សដែលពិការ គាត់ជិះរទេះ គាត់ឡើងអត់រួច។ ចុះឡើងពិបាក។ ចូលបន្ទប់ទឹកក៏ពិបាក។ បើអត់ជម្រាលគឺត្រូវការលើកចុះ លើកឡើង»។ នេះជាការពន្យល់បន្ថែម របស់លោក យិន សុង៕
អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ
(វីដេអូនេះ
គឺជាស្នាដៃរបស់ក្រុមយុវជន និងត្រូវបានរៀបរៀងឡើង
ក្រោមជំនួយហិរញ្ញវត្ថុរបស់សហភាពអឺរ៉ុប
និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត
តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។
រាល់ខ្លឹមសារនៅក្នុងអត្ថបទ និងវីដេអូនេះ គឺជាការទទួលខុសត្រូវរបស់ស្មេរ ឬផលិតករ
ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ
អភិវឌ្ឍអន្តរជាតិស៊ុយអ៊ែតនោះទេ)