ការប្រកួតរវាងក្រុមម្ចាស់ផ្ទះ ណាហ្គាវើលដ៍ និងភ្ញៀវភ្នំពេញក្រោន នឹងបង្ករបរិយាកាសឱ្យកាន់តែកក្រើកនាកីឡដ្ឋានខេត្តកំពង់ស្ពឺ។ ណាហ្គាវើលដ៍ ត្រូវការ៣ពិន្ទុជាចាំបាច់សម្រាប់ប្រជែងដំណែងលេខ៤ ចំណែកភ្ញៀវក្រោន ត្រឹមស្មើក៏មានលទ្ធភាពខ្ពស់ក្នុងការការពារដំណែងលេខ៤ ផងដែរ។ ទាំងពីរក្រុមនេះ ត្រូវប្រជែងគ្នាយកលេខ៤ ដើម្បីបានកៅអីឡើងទៅវគ្គពាក់កណ្តាលផ្តាច់ព្រ័ត្រជាមួយវិសាខា​ ព្រះខណ្ឌរាជស្វាយរៀង និងបឹងកេត ដែលកក់កៅអីរួចហើយ។
 

ជួបគ្នា៧លើក សឹង្ហក្រហមក្រោន ឈ្នះ៤ ស្មើ២ និងចាញ់១។ ប្រកួតចុងក្រោយ ណាហ្គាវើលដ៍ យកឈ្នះម្ចាស់ផ្ទះព្រះខ័នរាជស្វាយរៀង ៣-២ ចំណែកភ្នំពេញក្រោន ប្រកួតចុងក្រោយរបស់គេ លត់គីរីវង់សុខសែនជ័យនាជំនួបក្រៅដី ៥-៣។
 

ជំនួបផ្សេងទៀតមាន ព្រះខ័នរាជស្វាយរៀង ស្វាគមន៍ភ្ញៀវអង្គរថាយហ្គឺរ ខណៈវិសាខា សួរសុខទុក្ខកងយោធពលខេមរភូមិន្ទ(ទ័ព) មុនការប្រកួតរវាងម្ចាស់ផ្ទះបឹងកេត ទល់នឹងគីរីវង់សុខសែនជ័យ សម្រាប់ជំនួបសប្តាហ៍ទី២០ នៃព្រឹត្តិការណ៍ពានរង្វាន់ខេមបូឌានព្រីមៀរលីគ រដូវកាល២០២២។ ការប្រកួតនឹងចាប់ផ្តើមនៅម៉ោង ៣និង៤៥នាទីរសៀលតទៅ។

 

នាកីឡដ្ឋានខេត្តស្វាយរៀង ម្ចាស់ផ្ទះព្រះខ័នរាជស្វាយរៀង នឹងត្រូវទទួលភ្ញៀវអង្គរថាយហ្គឺរ ក្រុមទាំងពីរជួបគ្នា៥លើក ព្រះខ័នរាជ ឈ្នះ៤ និងចាញ់១ ប្រកួតចុងក្រោយក្រុមទាំងពីរធ្វើមិនបានល្អដូចគ្នាដោយ ព្រះខ័នរាជ ចាញ់ណាហ្គាវើលដ៍ ៣-២ និងថាយហ្គឺរ ចាញ់ទ័ព ៣-០។

 

ក្រុមភ្ញៀវវិសាខា នឹងត្រូវធ្វើដំណើរទៅទឹកដីស្តាតចាស់សួរសុខទុក្ខម្ចាស់ផ្ទះ កងយោធពលខេមរភូមិន្ទ(ទ័ព)។ ក្រុមទាំងពីរធ្លាប់ជួបគ្នា៨លើក ក្នុងនោះទ័ពឈ្នះ៤ ស្មើ៣ និងចាញ់១ ប្រកួតចុងក្រោយ វិសាខា ស្មើបឹងកេត ២-២ រីឯទ័ព ឈ្នះអង្គរថាយហ្គឺរ ៣-០។ 

 

នាកីឡដ្ឋានអង្គរអ៊ែវ៉េឯណោះវិញ បឹងកេត ស្វាគមន៍ភ្ញៀវគីរីវង់សុខសែនជ័យ។ បឹងកេត ពុំដែលចាញ់ គីរីវង់សុខសែនជ័យឡើយ នា៥ប្រកួតរបស់គេទាំងពីរកន្លងមក។ បឹងកេត ស្មើវិសាខា ២-២ នាជំនួបចុងក្រោយរបស់គេ ស្របពេលដែលគីរីវង់ ចាញ់ភ្នំពេញក្រោន ៥-៣៕