ដោយ៖ ទី មូល (យុវជនឃុំកណ្តោល)
ស្រុកបូទុមសាគរ, កោះកុង៖ គិតត្រឹមខែសីហា ឆ្នាំ២០២២នេះ ករណីអំពើហិង្សានៅក្នុងគ្រួសារ បានកើតឡើងតែចំនួន ៣ករណី ដែលចំនួននេះ ថយចុះបើប្រៀបធៀបនឹងឆ្នាំ២០២១។ នេះបើតាមលោក សុខ រចនា មេប៉ុស្តិ៍នគរបាលស្តីទីឃុំកណ្តោល ស្រុកបូទុមសាគរ ខេត្តកោះកុង។
បើតាមមេប៉ុស្តិ៍រូបនេះ កត្តាដែលធ្វើឱ្យករណីអំពើហិង្សាក្នុងឃុំរបស់ខ្លួនថយចុះ គឺមកពីចំណេះដឹងប្រជាពលរដ្ឋមានការកើនឡើង និងការបន្តអប់រំ ផ្សព្វផ្សាយ អំពីអំពើហិង្សានេះ ជាប្រចាំ។ លោក សុខ រចនា មេប៉ុស្តិ៍ស្តីទីឃុំកណ្តោល អះអាងថា អំពើហិង្សាក្នុងគ្រួសារ មិនត្រឹមតែជះឥទ្ធិពលមិនល្អដល់សហគមន៍នោះទេ ប៉ុន្តែវាក៏នឹងផ្តល់គំរូមិនល្អដល់កុមារដែលរស់នៅក្រោមដំបូលផ្ទះតែមួយ ឬរស់នៅជុំវិញនោះផងដែរ។ មិនតែប៉ុណ្ណោះ អំពើហិង្សា ក៏អាចជាកត្តាជំរុញឱ្យកុមារ បោះបង់ចោលការសិក្សាដែរ។ នេះជាបន្ថែមរបស់លោក សុខ រចនា ដែលបន្តថា អំពើហិង្សាគឺពិតជាពិបាកលុបបំបាត់ទាំងស្រុងណាស់។ មេប៉ុស្តិ៍លោក សុខ រចនា ពន្យល់មូលហេតុថា៖«ចំពោះការលុបបំបាត់ បើថាលុបឱ្យបាត់តែម្តង អំពើហិង្សាក្នុងគ្រួសារ ខ្ញុំគិតថា វាពិបាកនឹងលុបឱ្យបាត់ណាស់។បើចង់លុបឱ្យបាត់លុះត្រាតែប្រជាពលរដ្ឋ មានចំណេះដឹងគ្រប់គ្នា។ ដូចបច្ចុប្បន្ននេះ ពួកគាត់ មិនទាន់មានចំណេះដឹងគ្រប់គ្រាន់ទេ»។
![](https://image.thmeythmey.com/pictures/2022/11/01/11120221443c__2_.jpg)
លោក សុខ រចនា មេប៉ុស្តិ៍នគរបាលស្តីទីឃុំកណ្តោល ស្រុកបូទុមសាគរ ខេត្តកោះកុង។
ទោះជាមិនអាចលុបបំបាត់ឱ្យអស់ ប៉ុន្តែ មេប៉ុស្តិ៍នគរបាលស្តីទីឃុំកណ្តោល នៅតែបន្តការងារអប់រំ ផ្សព្វផ្សាយ និងបង្កើនការយល់ដឹងបន្ថែមដល់ប្រជាពលរដ្ឋនៅក្នុងឃុំ។ ក្រៅពីសកម្មភាពនេះ លោក សុខ រចនា និងមន្ត្រីរបស់ខ្លួន ក៏បានត្រៀមខ្លួនរួចជាស្រេច នៅក្នុងការអន្តរាគមន៍ លើករណីប្រើប្រាស់អំពើហិង្សានៅក្នុងគ្រួសារ និងចាត់វិធានការលើអ្នកប្រើប្រាស់ ទៅតាមលក្ខខណ្ឌកំណត់ដោយច្បាប់។
ជុំវិញការងារដោះស្រាយបញ្ហាអំពើិហិង្សានៅក្នុងឃុំនេះ លោក ហុក នេង ជំទប់ទី២ ឃុំកណ្តោល ដែលទទួលបន្ទុកដោះស្រាយទំនាស់នៅក្នុងឃុំ យល់ស្របថា មានតែការអប់រំ ឱ្យពលរដ្ឋយល់ច្បាស់ពីផលប៉ះពាល់នៃអំពើហិង្សាប៉ុណ្ណោះ ដែលជាកត្តារួមចំណែកដល់ការកាត់បន្ថយករណីហិង្សាក្នុងឃុំ។ សម្រាប់ លោក ហុក នេង អំពើហិង្សាក្នុងត្រូវបានកាត់បន្ថយ ក៏ជាផ្នែកមួយនៃការអភិវឌ្ឍឃុំ និងកសាងភាពសុខដុមនៅក្នុងឃុំផងដែរ។
![](https://image.thmeythmey.com/pictures/2022/11/01/11120221443c__3_.jpg)
លោក ហុក នេង ជំទប់ទី២ ឃុំកណ្តោល
ទន្ទឹមនឹងនេះ ជំទប់ឃុំទី២ ក៏បង្ហាញពីឆន្ទៈមោះមុតក្នុងការកាត់បន្ថយអំពើហិង្សា និងទំនាស់នានា នៅក្នុងឃុំនេះ។ លោក បានបញ្ជាក់ដូច្នេះ៖ «គោលដៅរបស់ខ្ញុំ ខ្ញុំជាអ្នកទទួលបន្ទុកដោះស្រាយទំនាស់ គឺខ្ញុំចង់រកឱកាសយ៉ាងណាផ្សព្វផ្សាយ កុំឱ្យករណីទំនាស់ហ្នឹងវាកើតឡើង សូម្បីទំនាស់(ក្នុង)គ្រួសារក៏ដោយ ទំនាស់ពីផ្ទះមួយទៅផ្ទះមួយក្តី ទំនាស់ព្រំប្រទល់ដីក៏ដោយ ទំនាស់អីក៏ដោយ គឺគោលបំណងរបស់ខ្ញុំគឺនឹងព្យាយាមកាត់បន្ថយ ព្រោះអីបើយើងកាត់បន្ថយ បន្ទុកធ្លាក់មកលើយើងដដែល។ យើងការពារប្រសើរជាងព្យាបាល»៕
(វីដេអូ និងអត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុ របស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារ នៅក្នុងអត្ថបទ និងវីដេអូនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំង អំពីទស្សនៈ របស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែតនោះទេ)