​សម្រាប់ នាយកវិទ្យាល័យដដែល ការសង់ជម្រាលសម្រាប់ជនមានពិការភាពនេះ គឺជាផ្នែកមួយចូលរួមលើកកម្ពស់គោលនយោបាយអប់រំប្រកបដោយបរិយាប័ន្ន។ លោក អៃ សុគន្ធ ពន្យល់បន្ថែម៖ «សព្វថ្ងៃនេះ គោលនយោបាយរបស់រាជរដ្ឋាភិបាល ក៏ដូចជាក្រសួងអប់រំ គឺដាក់គោលនយយោបាយប្រកបដោយបរិយាប័ន្ន។​ ដូច្នេះទាំងជនជាតិដើមភាគតិច ជនមានពិការភាព អាចឱ្យចូលរៀន​ដូចគ្នា។ ដូច្នេះជម្រាលនេះ គឺមានសារៈសំខាន់ណាស់។»។

 

 

ក្រៅពីមានជម្រាលហើយនោះ នាយកសាលារូបនេះ ក៏បានបញ្ជាក់ពីការលើកទឹកចិត្ត និងសម្រួលដល់ការសិក្សារបស់សិស្សដែលមានពិការភាពផងដែរ ដូចជាសម្រួលឱ្យអាចអង្គុយនៅតុខាងមុខ  និងរៀបចំ បន្ទប់សិក្សាសម្រាប់ថ្នាក់ដែលមានសិស្សពិការភាពនៅជាន់ផ្ទាល់ដីជាដើម។

​

យុវសិស្ស ចាន់ សុភា ជាសិស្សដែលមានពិការភាពជើង និងដែលកំពុងសិក្សានៅវិទ្យាល័យ ហ៊ុន សែន ឧត្តរមានជ័យ។ សុភា អះអាងថា ខ្លួនសប្បាយចិត្ត ដែលសាលាបានគិតគូរសង់ជម្រាលសម្រាប់ផ្តល់ភាពងាយស្រួលដែលពិការធ្វើដំណើរដូចខ្លួន។ យុវសិស្ស ចាន់ សុភា បន្ថែមដូច្នេះ៖ «ងាយស្រួល ក្នុងការធ្វើដំណើរ ដូចជាឡើងចុះ។ ដើរទៅបន្ទប់ទឹក។»។ 

 

 

សម្រាប់សុភា បានតាំងចិត្តសិក្សាឱ្យបានខ្ពស់ តាមដែលនាងអាចធ្វើបាន ខណៈសុភា មានបំណងបន្តការសិក្សាផ្នែករដ្ឋបាលសាធារណៈ ឬបើកអាជីវកម្មខ្នាតតូចដោយខ្លួនឯង នៅពេល​ដែលនាងមានលទ្ធភាព៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ