ក្រុងកៀវមិនទាន់បានរាយការណ៍ពីការចាប់ផ្តើមនៃការវាយលុករបស់ខ្លួនក្នុងការដណ្ដើមយកទឹកដីវិញ​នៅឡើយ ប៉ុន្តែក្រុងមូស្គូបានបញ្ជាក់មុនថា ខ្លួនបានរារាំងការលុកលុយនោះ​ ដោយជោគជ័យ។ បើតាមក្រសួងការពារជាតិរុស្ស៊ី អ៊ុយក្រែនបានវាយប្រហារលើកងកម្លាំងខ្លួនដោយកងវរសេនាតូចចំនួន​ប្រាំ​មួយ និងកងវរសេនាតូចរថក្រោះពីរនៅភាគខាងត្បូងទីក្រុង Donetsk ដែលជាកន្លែងទីក្រុងមូស្គូ​បាន​សង្ស័យយូរមកហើយថាអ៊ុយក្រែននឹងព្យាយាមបើកច្រកឆ្លងកាត់ទឹកដីដែលគ្រប់គ្រងដោយរុស្ស៊ី។

 

«នៅព្រឹកថ្ងៃទី៤ ខែមិថុនា សត្រូវបានចាប់ផ្តើមការវាយលុកទ្រង់ទ្រាយធំនៅក្នុងផ្នែកចំនួនប្រាំនៃ​ផ្នែក​ខាងមុខក្នុងទិសដៅទៅតំបន់ Donetsk នៅភាគខាងត្បូង»។ ក្រសួងការពារជាតិរុស្ស៊ីបញ្ជាក់បែបនេះ​ក្នុងសេចក្ដីថ្លែងការណ៍មួយដែលបង្ហោះលើប្រព័ន្ធបញ្ជូនសារ Telegram។ ក្រសួងដដែលបន្តថា គោលដៅរបស់ក្រុងកៀវគឺដើម្បីទម្លុះការការពាររបស់រុស្ស៊ីនៅក្នុងផ្នែកដែលផុយស្រួយបំផុត ប៉ុន្តែ​ក្រុង​កៀវនៅតែមិនទទួលបានជោគជ័យនោះឡើយ ។ 

 

បន្ថែមពីនេះ ក្រសួងការពារជាតិរុស្ស៊ីក៏បានបញ្ចេញវីដេអូនៃរថពាសដែកអ៊ុយក្រែនជាច្រើនគ្រឿង​នៅ​ក្នុងវាលមួយបានផ្ទុះឡើងបន្ទាប់ពីត្រូវបានវាយប្រហារផងដែរ។

 

យោងតាមសេចក្ដីថ្លែងការណ៍ដដែលខាងលើ កងកម្លាំងរុស្ស៊ីបានសម្លាប់ទាហានអ៊ុយក្រែនចំនួន២៥០ នាក់ ព្រមទាំងបានបំផ្លាញរថក្រោះចំនួន១៦គ្រឿង រថពាសដែកប្រយុទ្ធដឹកទាហានថ្មើរជើង និង​រថពាសដែកផ្សេងទៀតចំនួន២១គ្រឿង។ ប្រធានអគ្គសេនាធិការរុស្ស៊ីឧត្តមសេនីយ៍ Valery Gerasimov ដែលទទួលបន្ទុកប្រតិបត្តិការយោធានៅអ៊ុយក្រែនបានស្ថិតនៅក្នុងតំបន់​នៃការវាយ​ប្រហាររបស់អ៊ុយក្រែនផងដែរ​។

 

យ៉ាងណាមិញ ការអះអាងរបស់រុស្ស៊ី មិនទាន់ត្រូវបានបញ្ជាក់ឡើយ។ ឯក្រសួងការពារជាតិ និង​យោធាអ៊ុយក្រែនក៏មិនទាន់បានឆ្លើយតបថាយ៉ាងណា។

 

គួរបញ្ជាក់ថា ប្រធានាធិបតីអ៊ុយក្រែន វ្ល៉ូឌីមៀ ហ្សេលេនស្គី បានប្រាប់កាសែត Wall Street Journal នៅក្នុងបទសម្ភាសមួយដែលចេញផ្សាយកាលពីថ្ងៃទី៣ ខែមិថុនា ថា លោកបានត្រៀមខ្លួន​រួច​រាល់​ហើយដើម្បីចាប់ផ្តើមការវាយលុក៕