អន្តរជាតិ
រដ្ឋមន្ត្រីក្រសួងការពារជាតិចិន៖ ការប៉ះទង្គិចរវាងចិននិងអាម៉េរិក នឹងបង្កគ្រោះមហន្តរាយយ៉ាងធំ ![](https://image.thmeythmey.com/pictures/2023/06/05/china.jpg)
×![]()
រដ្ឋមន្ត្រីក្រសួងការពារជាតិចិន លោក Li Shangfu នៅថ្ងៃទី៤ ខែមិថុនា បានលើកឡើងថា ក្រុងប៉េកាំងកំពុងស្វែងរកកិច្ចពិភាក្សាវិញការប្រឈមមុខដាក់គ្នាជាមួយអាម៉េរិក ខណៈព្រមានថាការប៉ះទង្គិចរវាងប្រទេសទាំងពីរនឹងនាំឱ្យមានជម្លោះដ៏ធំលើពិភពលោក។
នៅក្នុងកិច្ចប្រជុំកំពូលស្ដីពីសន្តិសុខអាស៊ី Shangri-La Dialogue រដ្ឋមន្ត្រីក្រសួងការពារជាតិចិន លោក Li Shangfu បានលើកឡើងថា ទាំងចិននិងអាម៉េរិកអាចរីកចម្រើនជាមួយគ្នាដោយគ្នាការប៉ះទង្គិចលើឆាកពិភពលោកដ៏ធំនេះ។ លោកបានសង្កត់ធ្ងន់ថា ការប៉ះទង្គិចណាមួយរវាងភាគីទាំងពីរនឹងអាចជះឥទ្ធិពលអាក្រក់ដល់ពិភពលោកទាំងមូល។
ខណៈទាំងចិន និងអាម៉េរិកមានប្រព័ន្ធ និងវិធានការជាច្រើនទៀតផ្សេងៗគ្នា ភាគីទាំងពីរគួរស្វែងរកមូលដ្ឋានរួម និងផលប្រយោជន៍រួម ដើម្បីពង្រីកទំនាក់ទំនងទ្វេភាគី និងធ្វើឱ្យកិច្ចសហប្រតិបត្តិការកាន់តែស៊ីជម្រៅ។ រដ្ឋមន្ត្រីក្រសួងការពារជាតិចិន លោក Li Shangfu បានលើកឡើងបែបនេះក្នុងកិច្ចប្រជុំដដែល។
«វាជារឿងដែលមិនអាចប្រកែកបានថា ជម្លោះឬការប្រឈមមុខគ្នាធ្ងន់ធ្ងររវាងចិន និងអាម៉េរិកនឹងក្លាយជាគ្រោះមហន្តរាយដែលមិនអាចទ្រាំទ្របានសម្រាប់ពិភពលោក»។ រដ្ឋមន្ត្រីក្រសួងការពារជាតិចិនរូបនេះ បានសង្កត់ធ្ងន់បែបនេះ។
ទំនាក់ទំនងរវាងទីក្រុងវ៉ាស៊ីនតោន និងទីក្រុងប៉េកាំងហ៉ាក់មានភាពតានតឹងធ្ងន់ធ្ងរលើបញ្ហាជាច្រើន រួមមានបញ្ហាតៃវ៉ាន់ ជម្លោះដែនដីនៅសមុទ្រចិនខាងត្បូង និងការរឹតបន្តឹងលើការនាំចេញបន្ទះឈីប semiconductor ពីអាម៉េរិកទៅចិនជាដើម។
រដ្ឋមន្ត្រីក្រសួងការពារជាតិចិន ដែលត្រូវបានអាម៉េរិកដាក់ទណ្ឌកម្មក្នុងឆ្នាំ ២០១៨ ជុំវិញការទិញអាវុធពីរុស្ស៊ីរូបនេះ នៅអាហារពេលល្ងាចនៅថ្ងៃទី២ ខែមិថុនា ក្នុងកិច្ចប្រជុំកំពូលស្ដីពីសន្តិសុខអាស៊ី Shangri-La Dialogue បានចាប់ដៃគ្នាជាមួយរដ្ឋមន្ត្រីក្រសួងការពារជាតិអាម៉េរិក លោក Lloyd Austin ប៉ុន្តែអ្នកទាំងពីរមិនបានពិភាក្សាគ្នាកាន់តែស៊ីជម្រៅនោះទេ។ ទីក្រុងវ៉ាស៊ីនតោនទាមទារម្តងហើយម្តងទៀតឱ្យភាគីទាំងពីបើកកិច្ចពិភាក្សាឡើងវិញដើម្បីកាត់បន្ថយភាពយល់ច្រលំ។
សុន្ទរកថារបស់លោក Li នៅឯកិច្ចប្រជុំសិង្ហបុរី ក៏បានចោទប្រកាន់អាម៉េរិកនិងប្រទេសដទៃទៀតថាព្យាយាមជ្រៀតជ្រែកក្នុងកិច្ចការផ្ទៃក្នុងរបស់ចិន ដោយផ្តល់ជំនួយផ្នែកយោធា ការបណ្តុះបណ្តាល និងការធ្វើទស្សនកិច្ចការទូតកម្រិតខ្ពស់ទៅតៃវ៉ាន់។ លោក បានព្រមានថា ចិនប្រកាន់ខ្ជាប់នូវមាគ៌ានៃការអភិវឌ្ឍដោយសន្តិវិធី ប៉ុន្តែចិននឹងមិនស្ទាក់ស្ទើរក្នុងការការពារសិទ្ធិ និងផលប្រយោជន៍ស្របច្បាប់របស់ខ្លួនឡើយ៕
© រក្សាសិទ្ធិដោយ thmeythmey.com