កូនស្រូីអតីតនាយករដ្ឋមន្ត្រីថៃដែលនិរទេសខ្លួន លោក ថាក់ស៊ីន ស៊ីណាវ៉ាត់ និយាយថា ឪពុកខ្លួនគ្រោងនឹងវិលចូលប្រទេសថៃវិញ នៅថ្ងៃទី១០ ខែសីហា។ លោក ថាក់ស៊ីន អាចប្រឈមមុខនឹងការជាប់ពន្ធនាគារ ស្របពេលដែលវិបត្តិនយោបាយនៅថៃកំពុងតែអូសបន្លាយ។
លោកស្រី Paetongtarn Shinawatra ដែលជាកូនស្រីលោក ថាក់ស៊ីន បានបង្ហោះសារតាមប្រព័ន្ធផ្សព្វផ្សាយសង្គមថា៖ «ប៉ានឹងត្រឡប់មកវិញនៅថ្ងៃទី ១០ ខែសីហា នៅអាកាសយានដ្ឋាន Don Muang។ ការសម្រេចចិត្តត្រឡប់មកផ្ទះ នេះជាអ្វីដែលប៉ាបាននិយាយយ៉ាងហ្មត់ចត់តាំងពីដើមឆ្នាំ ២០២២»។
លោក ថាក់ស៊ីន អាយុ ៧៤ ឆ្នាំ មានទ្រព្យសម្បត្តិនៅក្នុងអាជីវកម្មទូរគមនាគមន៍ និងជានាយករដ្ឋមន្ត្រីចាប់ពីឆ្នាំ ២០០១ រហូតដល់ត្រូវបានបណ្តេញចេញពីរដ្ឋប្រហារឆ្នាំ ២០០៦។ បច្ចុប្បន្នលោករស់នៅនិរទេសខ្លួន ដើម្បីគេចពីការកាត់ទោសដាក់ពន្ធនាគារពីបទប្រព្រឹត្តអំពើពុករលួយកាលពីឆ្នាំ ២០០៨។
គណបក្សភឿថៃដែលគាំទ្រដោយលោកថាក់ស៊ីន បច្ចុប្បន្នកំពុងព្យាយាមបង្កើតរដ្ឋាភិបាលថ្មី ក្រោយពេលបក្សឆ្ពោះទៅមុខដែលជាបក្សសម្ព័ន្ធខ្លួន ត្រូវបានសភាបដិសេដការស្នើបេក្ខភាពនាយករដ្ឋមន្រ្តីរបស់ខ្លួន លោក Pita Limjaroenrat ។
អគ្គស្នងការរងនគរបាលជាតិថៃ លោក Surachate Hakparn បាននិយាយថា លោក ថាក់ស៊ីន ត្រូវឆ្លងកាត់នីតិវិធីតុលាការ នៅពេលលោកគ្រោងនឹងវិលត្រឡប់មកវិញ។
លោក ថាក់ ស៊ីន ប្រឈមមុខនឹងការជាប់ពន្ធនាគាររហូតដល់ ១០ឆ្នាំ ជុំវិញករណីជាច្រើនដែលត្រូវបានកាត់ទោសដោយតុលាការកំពូលរបស់ថៃ ដែលលោកតែងតែអះអាងថា ជាកាត់ទោសក្រោមហេតុផលនយោបាយ ។
បើយោងតាមកាសែតបាងកកប៉ុស្តិ៍ លោក ថាក់ ស៊ីន បានរងនូវបទចោទប្រកាន់ចំនួន ៤ករណី ។ ទីមួយពីបទរំលោភសិទ្ធអំណាចទិញដីរដ្ឋដែលមានតម្លៃទាបជាងទីផ្សារ ខណៈបទចោទទីពីរ ជុំវិញការរត់គេចខ្លួនពាក់ព័ន្ធការលេងល្បែង។ ចំណែកទីបី គឺការផ្តល់ប្រាក់កម្ចីលុយរដ្ឋទៅដល់ប្រទេសមីយ៉ាន់ម៉ា ក្នុងការទិញសម្ភារៈពីក្រុមហ៊ុនទូរគមនាគមន៍ផ្ទាល់ខ្លួន ហើយជាចុងក្រោយ គឺការកាន់កាប់ភាគហ៊ុនក្នុងក្រុមហ៊ុនទូរគមនាគមន៍ Shin Corp ដែលជាការហាមឃាត់សម្រាប់អ្នកនយោបាយថៃ។
លោក Surachate បានប្រាប់សារព័ត៌មានរ៉យទ័រថា ប៉ូលីសថៃនឹងបំពេញភារកិច្ចរបស់ពួកគេជាធម្មតានៅពេលដែលយន្តហោះចុះចត។ លោកនឹងត្រូវទៅតុលាការហើយស្តាប់អ្វីដែលពួកគេសម្រេចចិត្ត ។
លោក ថាក់ស៊ីន ធ្លាប់បានបញ្ជាក់ថា លោកនឹងត្រឡប់ទៅប្រទេសថៃវិញនៅខែកក្កដា។
កន្លងមក គណបក្សឆ្ពោះទៅមុខធ្លាប់បាននិយាយថា បក្សភឿថៃនឹងដឹកនាំការបង្កើតរដ្ឋាភិបាល បន្ទាប់ពីបេក្ខជននាយករដ្ឋមន្ត្រីរបស់ខ្លួនលោក Pita Limjaroenrat បរាជ័យក្នុងការទទួលបានការគាំទ្រពីសភាសម្រាប់មុខតំណែងកំពូលមួយនេះ។
គណបក្សភឿថៃ មិនទាន់ដាក់ឈ្មោះបេក្ខជនជានាយករដ្ឋមន្ត្រីជាផ្លូវការនៅឡើយទេ។
មហាសេដ្ឋីអចលនទ្រព្យ លោក Srettha Thavisin ដែលជាបេក្ខភាពនាយករដ្ឋមន្ត្រីមួយរូបក្នុងចំណោមបេក្ខជននាយករដ្ឋមន្ត្រីទាំងបីរបស់ភឿថៃក្នុងអំឡុងពេលយុទ្ធនាការបោះឆ្នោត ត្រូវបានគេរំពឹងថានឹងត្រូវបានដាក់ស្នើបេក្ខភាពក្នុងការជ្រើសនាយករដ្ឋមន្រ្តីនាពេលបន្ទាប់៕