ដើម្បីធានាប្រសិទ្ធភាព នៃការគ្រប់គ្រងការការពារផលប្រយោជន៍អ្នកប្រើប្រាស់និងការទប់ស្កាត់សកម្មភាព មិនប្រក្រតីក្នុងការលក់ ការចែកចាយ និងការប្រើប្រាស់ស៊ីមនៅកម្ពុជា ន.ទ.ក. បានក្រើនរំលឹកជាថ្មី ដល់អង្គពាក់ព័ន្ធទាំងអស់ ត្រូវបញ្ឈប់ជាដាច់ខាតរាល់ការលក់ និងចែកចាយលក់ ដោយមិនយកឯកសារសម្គាល់អត្តសញ្ញាណរបស់អ្នកប្រើប្រាស់ ទោះក្នុងរូបភាពណាក៏ដោយ។ 

 

សេចក្តីប្រកាសព័ត៌មានរបស់ ន.ក.ទ. នាថ្ងៃទី៧ឧសភា បានបញ្ជាក់ថា​​៖ «រាល់ការលក់ស៊ីមថ្មីទាំងអស់ ប្រតិបត្តិករទូរស័ព្ទចល័ត ភ្នាក់ងារលក់និងចែកចាយស៊ីមត្រូវធានាថា បានទទួលឯកសារសម្គាល់អត្តសញ្ញាណត្រឹមត្រូវជាមុន ទើបអាចបើកឱ្យដំណើរការ (Activate) សេវាបាន»។ 

 

សម្រាប់ប្រតិបត្តិករទូរសព្ទចល័ត ត្រូវជូនដំណឹងទៅអ្នកកំពុងប្រើប្រាស់ស៊ីម ដែលពុំមានឯកសារសម្គាល់ អត្តសញ្ញាណ ឬប្រើប្រាស់ឯកសារសម្គាល់អត្តសញ្ញាណ ក្រោមឈ្មោះបុគ្គលតែម្នាក់ សម្រាប់អ្នកប្រើប្រាស់រាប់រយនាក់ ដោយណែនាំឱ្យមកទាក់ទង និងផ្តល់ឯកសារពាក់ព័ន្ធនៅតាមការិយាល័យលក់របស់ប្រតិបត្តិករ ទូរសព្ទចល័ត ឬភ្នាក់ងារលក់និងចែកចាយស៊ីម ឬតាមគ្រប់មធ្យោយបាយផ្សេងទៀត ដើម្បីបំពេញសំណុំបែបបទ ប្រើប្រាស់សេវាទូរគមនាគមន៍ឡើងវិញ ស្របតាមបទប្បញ្ញត្តិជាធរមាន។ 

 

ន.ក.ទ. បានតម្រូវឱ្យប្រតិបត្តិករ ទូរសព្ទចល័តត្រូវបិទដំណើរការលេខទូរសព្ទទាំងឡាយណា ដែលពុំមានព័ត៌មានអត្តសញ្ញាណ ឬឯកសារសម្គាល់អត្តសញ្ញាណត្រឹមត្រូវរបស់អ្នកប្រើប្រាស់ និងត្រូវលុបបំបាត់ការប្រើប្រាស់ឯកសារសម្គាល់ អត្តសញ្ញាណក្រោមឈ្មោះបុគ្គលតែម្នាក់ សម្រាប់អ្នកប្រើប្រាស់រាប់រយនាក់។ 

 

ន.ក.ទ បានព្រមានដល់អ្នកប្រើប្រាស់លេខទូរសព្ទចល័តនិងភ្នាក់ងារលក់ និងចែកចាយស៊ីម មិនត្រូវសហការ ឬអនុញ្ញាតឱ្យបុគ្គលដទៃជួលឬជាវស៊ីមរបស់ខ្លួនយកទៅប្រើប្រាស់ក្នុងការបង្កើតជាគណនីធនាគារ ឬគណនី បណ្តាញសង្គម ក្លែងក្លាយនានាសម្រាប់ប្រព្រឹត្តអំពើល្មើសឡើយ។ ការណ៍នេះ គឺដើម្បីចៀសវាងធ្លាក់ក្នុងឧបាយកលរបស់ជនទុច្ចរិត និងទទួលរងផលប៉ះពាល់ពីវិធានការច្បាប់ ដែលអាចកើតមានជាយថាហេតុ។ 

 

ន.ទ.ក. បានបញ្ជាក់ជាថ្មីថា ក្នុងករណីជនទុច្ចរិតទិញ ឬជួលស៊ីមគ្មានឯកសារសម្គាល់អត្តសញ្ញាណ ពីអ្នកលក់ស៊ីម ឬប្រតិបត្តិករនានា ដើម្បីប្រព្រឹត្តអំពើខុសច្បាប់ ទោះបីប្រតិបត្តិករទូរសព្ទចល័ត ភ្នាក់ងារលក់និងចែកចាយស៊ីម ឬអ្នកប្រើប្រាស់លេខទូរស័ព្ទចល័ត មិនបានប្រព្រឹត្តក៏ដោយ ក៏មានន័យថាអ្នកទាំងនោះ បានចូលរួមចំណែកប្រព្រឹត្តអំពើខុសច្បាប់ ឬឃុបឃិតជាមួយជនទុច្ចរិតដោយប្រយោល។ បន្ថែមលើនេះ ប្រតិបត្តិករទូរសព្ទចល័ត ភ្នាក់ងារលក់និងចែកចាយស៊ីម និងអ្នកប្រើប្រាស់លេខទូរស័ព្ទចល័ត ទាំងឡាយណា ដែលនៅតែបន្តអនុវត្តផ្ទុយនឹងខ្លឹមសារខាងលើ នឹងត្រូវប្រឈមចំពោះមុខច្បាប់និងបទប្បញ្ញត្តិ ជាធរមាន៕