ខ្លាំងមែន! ខេត្តព្រៃវែង ជាប់សិស្សពូកែទូទាំងប្រទេសច្រើនជាងគេ

ជាតិ

ខ្លាំងមែន! ខេត្តព្រៃវែង ជាប់សិស្សពូកែទូទាំងប្រទេសច្រើនជាងគេ

17, May 2024 , 11:39 am

រូបភាព

សិស្សពូកែទាំង៦រូប មកពីខេត្តព្រៃវែង ក្នុងពិធីទទួលរង្វាន់។ រូបភាពក្រសួងអប់រំ យុវជន និងកីឡា

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ឆ្នាំ២០២៤នេះ ខេត្តព្រៃវែង បានឈរលេខរៀងទី១ ដែលមានសិស្សប្រឡងជាប់សិស្សពូកែទូទាំងប្រទេសច្រើនជាងគេ ដល់ទៅ៦នាក់ ខណៈរាជធានីភ្នំពេញ ជាប់ត្រឹម៥នាក់។ នេះបើតាមប្រកាសស្ដីពីការទទួលស្គាល់សិស្សពូកែទូទាំងប្រទសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងទី១២។

ការប្រឡងសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងទី១២ កាលពីថ្ងៃទី ១៣ ឧសភា បានរកឃើញជ័យលាភីចំនួន ៣០នាក់ មកពី ១៣រាជធានី-ខេត្ត។ ជ័យលាភីទាំង៣០នាក់នេះ មានខេត្តព្រៃវែង ៦នាក់, រាជធានីភ្នំពេញ ៥នាក់, បាត់ដំបង និងកំពង់ឆ្នាំង ៣នាក់ ដូចគ្នា, សៀមរាប កំពង់ចាម ពោធិ៍សាត់ និងកណ្ដាល ក្នុងមួយខេត្តមាន ២នាក់, មណ្ឌលគិរី បន្ទាយមានជ័យ ត្បូងឃ្មុំ តាកែវ និងស្វាយរៀង មាន១នាក់។

ក្នុងឆ្នាំនេះ ខេត្តព្រៃវែង ទទួលបានមេដាយមាសចំនួន ៣គ្រឿង លើមុខវិជ្ជាអក្សរសិល្ប៍ខ្មែរ រូបវិទ្យា ថ្នាក់ទី៩ និងមុខវិជ្ជារូបវិទ្យា ថ្នាក់ទី១២, មេដាយប្រាក់ចំនួន ១គ្រឿង លើមុខវិជ្ជារូបវិទ្យា ថ្នាក់ទី១២ និងមេដាយសំរិទ្ធចំនួន ១គ្រឿង លើមុខវិជ្ជាអក្សរសិល្ប៍ខ្មែរ ថ្នាក់ទី៩ រួមទាំងជ័យលាភីលេខ៤ចំនួន ១នាក់លើមុខវិជ្ជាគណិតវិទ្យា ថ្នាក់ទី១២ផងដែរ។

លោក ឆាយ ប៉េងឆាន នាយកវិទ្យាល័យព្រៃព្នៅ (ខាងឆ្វេងដៃ) និងសិស្សពូកែអក្សរសិល្ប៍ខ្មែរមកពីវិទ្យាល័យព្រៃព្នៅ ក្នុងខេត្តព្រៃវែង។

លោក ឆាយ ប៉េងឆាន នាយកវិទ្យាល័យព្រៃព្នៅ ក្នុងខេត្តព្រៃវែង ដែលមានសិស្សទទួលបានមេដាយមាស និងសំរិទ្ធ លើមុខវិជ្ជាអក្សរសិល្ប៍ខ្មែរ ថ្នាក់ទី៩ បានប្រាប់សារព័ត៌មានឌីជីថលថ្មីៗថា នេះជាលើកទី៣ហើយ ដែលវិទ្យាល័យរបស់លោកទទួលបានមេដាយមាស ក្នុងការប្រឡងសិស្សពូកែទូទាំងប្រទេស។ នាយកវិទ្យាល័យរូបនេះ បន្តថា លទ្ធផលដែលទទួលបាននេះ កើតចេញការខិតខំប្រឹងរបស់សិស្ស លោកគ្រូ អ្នកគ្រូ អាណាព្យាបាល គណៈគ្រប់គ្រងវិទ្យាល័យ រួមទាំងសហគមន៍ផងដែរ។

«ខ្ញុំរីករាយ រកអ្វីថ្លែងមិនចេញទេ សម្រាប់ជ័យលាភី និងលទ្ធផលនេះ វាមានតម្លៃរកអ្វីកាត់ថ្លៃមិនបាន។ សម្រាប់ខ្ញុំជាគណៈគ្រប់គ្រងពិតជាមានមោទកភាព»។ នេះជាការលើកឡើងពីអារម្មណ៍របស់លោក ឆាយ ប៉េងឆាន ដោយនិយាយផង សើចផង។

ចំពោះលទ្ធផលនេះ លោក ឆាយ ប៉េងឆាន ចាត់ទុកជាមោទកភាពសម្រាប់អ្នកខេត្តព្រៃវែងផងដែរ ដែលជាប់សិស្សពូកែច្រើនជាងគេ ក្នុងចំណោមសិស្សនៅទូទាំង២៥រាជធានី-ខេត្ត។ នាយកវិទ្យាល័យរូប នេះ បន្ថែមថា៖«សម្រាប់ខ្ញុំជាជនបទ ពិតជាត្រេកអរ ព្រោះធនធាននៅខេត្តមិនសម្បូរបែបដូចនៅទីក្រុង ប៉ុន្តែដោយសារការខិតខំប្រឹងរបស់យើងទាំងអស់គ្នា ធ្វើឱ្យទទួលបានលទ្ធផលដ៏អស្ចារ្យមួយនេះ»។

លោក ហង់ជួន ណារ៉ុន និងសិស្សពូកែអក្សរសិល្ប៍ខ្មែរថ្នាក់ទី៩។ រូបភាពក្រសួងអប់រំ យុវជន និងកីឡា

ក្នុងពិធីបិទការប្រឡងសិស្សពូកែ លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា៖«សិស្សពូកែទាំងអស់នៅថ្ងៃនេះ នឹងក្លាយជាធនធានបញ្ញវន្ត សម្រាប់ពេលអនាគតរបស់កម្ពុជា ស្របពេលដែលប្រទេសយើងកំពុងត្រូវការនូវមូលធនមនុស្សជាចាំបាច់ ដើម្បីអភិវឌ្ឍន៍ប្រទេសឱ្យកាន់តែរីកចម្រើន ជាពិសេសស្របតាមការរីកចម្រើននៃបច្ចេកវិទ្យា បដិវត្តឧស្សាហកម្មជំនាន់ទី៤ និងសេដ្ឋកិច្ចឌីជីថល ដែលកំពុងផ្តោតលើបញ្ញាសិប្បនិមិត្ត។ល»។

រដ្ឋមន្រ្តីអប់រំ ក៏បានរំឭកឱ្យសិស្សពូកែទាំងអស់ បន្តត្រៀមខ្លួនប្រឡងសញ្ញាបត្រមធ្យមសិក្សាបឋមភូមិ និងមធ្យមសិក្សាទុតិយភូមិថ្នាក់ជាតិ នាពេលខាងមុខ ។ នេះជាលើកទី២៨ ដែលក្រសួងអប់រំ យុវជន និងកីឡា បានរៀបចំការប្រឡងសិស្សពូកែទូទាំងប្រទេស និងជាលើកទី៧ ដែលរាជធានីភ្នំពេញធ្វើជាម្ចាស់ផ្ទះសម្រាប់ការប្រឡង។

ការប្រឡងសិស្សពូកែក្នុងឆ្នាំនេះ មានបេក្ខជនចូលរួមចំនួន ២៤០នាក់ មកពី២៥រាជធានី-ខេត្ត។ ក្នុងឆ្នាំនេះ ការប្រឡងសិស្សពូកែ មានការកំណែទម្រង់ ដោយជ្រើសរើសជាជ័យលាភីសរុប៣០នាក់ប៉ុណ្ណោះ ថ្នាក់ទី៩ចំនួន១៥នាក់ និងថ្នាក់ទី១២ ចំនួន១៥នាក់។ ឆ្នាំមុនៗ ការប្រឡងសិស្សពូកែ ត្រូវបានជ្រើសរើស៦០នាក់។

សូមបញ្ជាក់ថា សិស្សពូកែថ្នាក់ទី៩ និងថ្នាក់ទី១២ ទាំង៣០នាក់ ទទួលបានរង្វាន់ និងការលើកទឹកចិត្តពីរាជរដ្ឋាភិបាល ក្នុងនោះមានប្រកាសស្តីពីការទទួលស្គាល់សិស្សពូកែទូទាំងប្រទេស ១ច្បាប់, មេដាយ ១គ្រឿងសម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣, វិញ្ញាបនបត្របញ្ជាក់សិស្សពូកែទូទាំងប្រទេស ១ច្បាប់ និងប្រាក់រង្វាន់តាមចំណាត់ថ្នាក់។ ជ័យលាភីលេខ១ ទទួលបានប្រាក់រង្វាន់ចំនួន ៣លាន៥០ម៉ឺនរៀល, លេខ២ បាន ៣លាន២០ម៉ឺនរៀល, លេខ៣ បាន ២លាន៩០ម៉ឺនរៀល, លេខ៤ បាន ២លាន៦០ម៉ឺនរៀល និងលេខ ៥ បាន ២លាន៣០ម៉ឺនរៀល៕