ភ្នំពេញ៖ លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា នឹងបំពេញទស្សនកិច្ចនៅប្រទេសចិន តួកគី និងប្រទេសម៉ារ៉ុក បន្តបន្ទាប់គ្នា ចាប់ផ្តើមពីថ្ងៃទី២៤-៣១ ខែឧសភានេះ។ បើតាមសេចក្តីប្រកាសព័ត៌មានរបស់ក្រសួងការបរទេស ទស្សនកិច្ចរបស់ឧបនាយករដ្ឋមន្ត្រីកម្ពុជា នៅចិន គឺដើម្បីរកមធ្យោបាយពង្រឹងកិច្ចសហប្រតិបត្តិការត្បូងពេជ្រ ជំរុញមិត្តភាពដែកថែប និងបង្កើនកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ។ នៅប្រទេសតួកគីវិញ ទស្សនកិច្ចរបស់ប្រមុខការទូតកម្ពុជា គឺដើម្បីរិះរកយន្តការបន្ថែមក្នុងការពង្រីកសក្តានុពលថ្មីៗ និងកិច្ចសហប្រតិបត្តិការនានា ព្រមទាំងបង្ហាញពីចំណងមិត្តភាពដ៏រឹងមាំ និងស្និទ្ធស្នាលរវាងប្រទេសទាំងពីរ។ ដោយឡែកទស្សនកិច្ចនៅប្រទេសម៉ារ៉ុក គឺដើម្បីពង្រឹងកិច្ចសហប្រតិបត្តិការរវាងកម្ពុជា និងអង្គការអន្តរជាតិហ្វ្រង់កូហ្វូនី(OIF) និងការគាំទ្របេក្ខភាពកម្ពុជាក្នុងការធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦។
ចាប់ពីថ្ងៃទី២៤-៣១ ខែឧសភានេះ លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា នឹងបំពេញទស្សនកិច្ចផ្លូវការនៅប្រទេសចិន តួកគី និងប្រទេសម៉ារ៉ុក។ បើយោងតាមសេចក្តីប្រកាសព័ត៌មានរបស់ក្រសួងការបរទេស ចុះថ្ងៃទី២២ឧសភា ទស្សនកិច្ចរបស់ឧបនាយករដ្ឋមន្ត្រី សុខ ចិន្តាសោភា នឹងផ្តើមនៅប្រទេសចិន ពីថ្ងៃទី២៤-២៥ឧសភា។
ក្នុងពេលស្នាក់នៅប្រទេសចិន លោកសុខ ចិន្តាសោភា ឧបនាយករដ្ឋមន្ត្រី លោក វ៉ាង យី រដ្ឋមន្ត្រីការបរទេសចិន នឹងមានជំនួបទ្វេភាគី ដើម្បីពិភាក្សាអំពីមធ្យោបាយពង្រឹងបន្ថែមនូវកិច្ចសហប្រតិបត្តិការត្បូងពេជ្រ និងជំរុញនូវមិត្តភាពដែកថែបដ៏រឹងមាំដែលមានស្រាប់ ព្រមទាំងបង្កើនកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។
បើតាមសេចក្តីប្រកាសព័ត៌មានដដែល លោកឧបនាយករដ្ឋមន្ត្រី ក៏គ្រោងជួបសម្តែងការគួរសមជាមួយ លោក ហាន ចឹង អនុប្រធានាធិបតីចិន និងលោក ចាង ជៀនហ័រ សមាជិកក្រុមដឹកនាំនៃបក្សកុម្មុយនីស្តចិន ប្រចាំគណៈកម្មការកំណែទម្រង់ និងអភិវឌ្ឍន៍ជាតិប្រធានរដ្ឋបាលថាមពលជាតិ។ លោក សុខ ចិន្តាសោភា ក៏នឹងជួបសំណេះសំណាលជាមួយសហគមន៍ និងនិស្សិតខ្មែរ ដែលកំពុងសិក្សា និងស្នាក់នៅទីនោះដែរ។
បញ្ចប់ទស្សនកិច្ចនៅប្រទេសចិន រដ្ឋមន្ត្រីការបរទេសកម្ពុជា នឹងបន្តទស្សនកិច្ចនៅតួកគី ពីថ្ងៃទី២៧-២៩ឧសភា។ នៅទីនោះ លោក សុខ ចិន្តាសោភា នឹងចូលរួមពិសាអាហារថ្ងៃត្រង់ធុរកិច្ច ក៏ដូចជាចូលរួមពិភាក្សាអំពីសក្តានុពល នៃកិច្ចសហប្រតិបត្តិការសេដ្ឋកិច្ច និងវិនិយោគរវាងកម្ពុជា និងតួកគី។ នៅថ្ងៃទី២៨ឧសភា លោកឧបនាយករដ្ឋមន្ត្រី នឹងជួបសម្តែងការគួរសម និងជួបពិភាក្សាការងារដាច់ដោយឡែក ជាមួយឥស្សរជនតួកគីទាំងផ្នែកនីតិប្រតិបត្តិ និងនីតិបញ្ញត្តិ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដែលបានបញ្ជាក់ទៀតថា លោក សុខ ចិន្តាសោភា និងប្រជុំទ្វេភាគី ជាមួយសមភាគី លោក ហាកាន់ ហ្វីដាន់ នៅថ្ងៃទី២៩ ខែឧសភា ដើម្បីស្វែងរកមធ្យោបាយថ្មីៗ ក្នុងការពង្រឹងយន្តការដែលមានស្រាប់លើគ្រប់វិស័យ និងរិះរកបន្ថែមទៀតនូវសក្តានុពលថ្មីៗ លើគ្រប់វិស័យ នៃកិច្ចសហប្រតិបត្តិការនាពេលអនាគត។
រដ្ឋមន្ត្រីការបរទេសទាំងពីរ ក៏នឹងផ្លាស់ប្តូរទស្សនៈគ្នា លើការវិវឌ្ឍថ្មីៗនៅក្នុងតំបន់ និងអន្តរជាតិ។ លើលពីនេះ ឯកសារនៃកិច្ចសហប្រតិបត្តិការមួយចំនួន ត្រូវបានរំពឹងថា នឹងត្រូវបានចុះហត្ថលេខា ក្នុងអំឡុងកិច្ចប្រជុំនេះ ដើម្បីពង្រឹងទំនាក់ទំនងរវាងប្រទេសទាំងពីរ។
ក្នុងពេលស្នាក់នៅប្រទេសតួកគី ឧបនាយករដ្ឋមន្ត្រី សុខ ចិន្តាសោភា ក៏នឹងមានជំនួប ជាមួយសហគមន៍ខ្មែរ និងនិស្សិតផងដែរ។ សម្រាប់ក្រសួងការបរទេសកម្ពុជា ដំណើរទស្សនកិច្ចនេះ នឹងផ្តល់ជាសក្ខីភាពនៃចំណងមិត្តភាពដ៏រឹងមាំ និងប្រកបដោយភាពស្និទ្ធស្នាល ព្រមទាំងលើកកម្ពស់ទំនាក់ទំនងរីកចម្រើន រវាងប្រទេសទាំងពីរ ខណៈកម្ពុជា និងតួកគីកំពុងប្រារព្ធខួបលើកទី៦៥ នៃការបង្កើតទំនាក់ទំនងការទូត។
ចេញពីតួកគេ លោក សុខ ចិន្តាសោភា នឹងធ្វើទស្សនកិច្ច នៅប្រទេសម៉ារ៉ុក ពីថ្ងៃទី៣០ ដល់៣១ ខែឧសភា។ លោកឧបនាយករដ្ឋមន្ត្រី នឹងធ្វើបទអន្តរាគមន៍ ក្នុងពិធីបើកសម័យប្រជុំពេញអង្គ នៃកិច្ចប្រជុំសហគ្រិនហ្វ្រង់កូហ្វូនលើកទី៤ ក្រោមមូលបទ«ការពង្រឹងសមត្ថភាពប្រកួតប្រជែង និងភាពធន់នៃសហគ្រាសហ្វ្រង់កូហ្វូន៖ តើគេរំពឹងចង់បានការ គាំទ្រអ្វីខ្លះពីរដ្ឋាភិបាល?»។
នៅតួកគី លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា នឹងមានជំនួបជាមួយ លោកស្រី ល្វីស មូស៊ីគីវ៉ាបូ អគ្គលេខាធិការអង្គការអន្តរជាតិហ្វ្រង់កូហ្វូនី (OIF) ដើម្បីពិភាក្សាអំពីការពង្រឹងកិច្ចសហប្រតិបត្តិការ រវាងកម្ពុជា និងអង្គការOIF ពិសេសបេក្ខភាពកម្ពុជា ក្នុងការធ្វើជាម្ចាស់ផ្ទះ កិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦៕