ជាតិ
សមត្ថកិច្ចបង្ក្រាបគ្រឿងញៀនបានជាង២៥០គីឡូ នៅស្ទឹងត្រែង ![រថយន្តនិងគ្រឿងញៀន ដែលសមត្ថកិច្ចបង្ក្រាបបាននៅស្ទឹងត្រែង។ រូបពី GCNP](https://image.thmeythmey.com/pictures/2024/05/29/29520241716b.jpg)
រថយន្តនិងគ្រឿងញៀន ដែលសមត្ថកិច្ចបង្ក្រាបបាននៅស្ទឹងត្រែង។ រូបពី GCNP
×![]()
ភ្នំពេញ៖ មន្ទីរប្រឆាំងគ្រឿងញៀន បង្ក្រាបករណីដឹកជញ្ជូនគ្រឿងញៀនឆ្លងដែននៅខេត្តស្ទឹងត្រែង ដោយបានឃាត់ខ្លួនជនសង្ស័យ៤នាក់ និងរឹបអូសថ្នាំញៀនជាង២៥៤គីឡូក្រាម។ នេះបើតាមការចេញផ្សាយរបស់អគ្គស្នងការនគរបាលជាតិ។
កម្លាំងជំនាញនៃមន្ទីរប្រឆាំងបទល្មើសគ្រឿងញៀន បានសហការជាមួយស្នងការដ្ឋាននគរបាលខេត្តស្ទឹងត្រែង ចុះស្រាវជ្រាវស៊ើបអង្កេតករណីគ្រឿងញៀនឆ្លងដែន រហូតឈានទៅការបង្ក្រាបនៅចំណុចក្នុងភូមិវាលព្រីង ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។ ករណីនេះ កើតឡើងកាលពីថ្ងៃទី២៥ឧសភា។
ការចុះប្រតិបត្តិការនេះ សមត្ថកិច្ចឃាត់ខ្លួនជនសង្ស័យ៤នាក់ មានថៃ៣នាក់ និងខ្មែរ១នាក់។ សមត្ថកិច្ចបានអះអាងថា ការចុះបង្ក្រាបនេះ មានជនសង្ស័យប្រមាណ២ទៅ៣នាក់ទៀត បានរត់គេចខ្លួន។
រូបពី GCNP
វត្ថុតាងដែលសមត្ថកិច្ច រកឃើញលើរថយន្តឆ្លងដែននេះ មានគ្រឿងញៀនប្រភេទមេតំហ្វេតាមីន(ICE) ទម្ងន់២២២៩០០ក្រាម និងគ្រឿងញៀនប្រភេទកេតាមីន (KETAMINE) ទម្ងន់៣១៨០៨ក្រាម។ គ្រឿងញៀនសរុបទាំងនេះ ទម្ងន់២៥៤គីឡូក្រាម។
ជាមួយគ្នាដែរ សមត្ថកិច្ចបានឃាត់រថយន្ត៤គ្រឿង, ទូរស័ព្ទដៃចំនួន១២គ្រឿង, វិទ្យុទាក់ទងចំនួន ៣គ្រឿង, គ្រាប់បែកដៃ២គ្រាប់ ។ បច្ចុប្បន្នជនសង្ស័យ និងវត្ថុតាងខាងលើ ត្រូវមន្ទីរប្រឆាំងគ្រឿងញៀន សាកសួរនាំ និងកសាងសំណុំរឿងបញ្ជូន ទៅកាន់សាលាដំបូងដើម្បីចាត់វិធានការតាមផ្លូវច្បាប់៕
រូបពី GCNP
© រក្សាសិទ្ធិដោយ thmeythmey.com