យោងតាមសេចក្ដីប្រកាសព័ត៌មានរបស់ សហព័ន្ធស្រូវអង្ករកម្ពុជា នៅថ្ងៃទី២៩ ខែឧសភា អង្ករដែលបានតាំងបង្ហាញក្នុងពិព័រណ៍ «The Saudi Food Show» គឺសុទ្ធសឹងមានគុណភាពល្អ និងធ្លាប់បានឈ្នះពានរង្វាន់អង្ករល្អបំផុតលើពិភពលោក។ ការចូលរួមក្នុងព្រឹត្តិការណ៍នេះ មានគោលបំណងធ្វើពិពិធកម្មទីផ្សារនៅក្នុងតំបន់មជ្ឈឹមបូព៌ា និងពិភពលោកបន្ថែមទៀត។ 
 

សហព័ន្ធស្រូវអង្ករកម្ពុជា បានរៀបចំនូវ «ពន្លាជាតិ» មួយទំហំ៦០ម៉ែត្រការ៉េ។ «ពន្លាជាតិ» តាំងបង្ហាញអង្ករកម្ពុជា ទទួលបានការចាប់អារម្មណ៍យ៉ាងច្រើនពីភ្ញៀវ ព្រោះថា នេះគឺជាលើកទី១ ដែលឃើញបញ្ជីឈ្មោះប្រទេស និងទង់ជាតិកម្ពុជា ស្ថិតនៅក្នុងចំណោម ក្រុមហ៊ុនជាង១ពាន់ មកពី៩៧ ប្រទេសនៅលើពិភពលោក និងមានផលិតផលម្ហូបអាហារជាង ១០ម៉ឺនប្រភេទតាំងបង្ហាញ។