លោក ហ៊ុន ម៉ានី បានប្រាប់​ដល់​ថ្នាក់ដឹកនាំក្រសួង-ស្ថាប័ន ត្រូវរៀបចំពិនិត្យឡើងវិញ ដោយវិភាគមុខងារ និងរចនាសម្ព័ន្ធ ជាពិសេសការធ្វើបច្ចុប្បន្នភាពរចនាសម្ព័ន្ធ ទិន្នន័យមន្ត្រីរាជការស៊ីវិល ដើម្បីឆ្លើយតបឱ្យទាន់ពេលវេលាកំណត់។ ​«ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន ត្រូវអនុវត្តដោយឈរលើអភិក្រម ផ្តោតលើការរៀបចំផ្ទះរបស់យើង ដោយត្រូវពង្រឹងរចនាសម្ព័ន្ធ ជាជាងការពង្រីករចនាសម្ព័ន្ធ»។ នេះ​ជា​លើកឡើងរបស់​លោក ហ៊ុន ម៉ានី។
 

រដ្ឋមន្រ្តី​ក្រសួង​មុខងារ​សាធារណៈ​ បានបន្ត​ថា​ ការវិភាគមុខងារ ត្រូវឈរលើភាពជាម្ចាស់ការ និងការទទួលខុសត្រូវតាមបន្ទាត់ គណនេយ្យភាព និងរក្សាផលប្រយោជន៍របស់មន្ត្រី។ លើសពី​នេះ​ ត្រូវគិតគូរដល់ប្រសិទ្ធភាព និងសមិទ្ធកម្មការងារ តាមរយៈការប្រើប្រាស់ធនធានថវិកា ធនធានមនុស្សឱ្យកាន់តែមានប្រសិទ្ធភាព ចំគោលដៅ និងទីកន្លែង ស្របតាមតួនាទីភារកិច្ចរបស់ក្រសួង ស្ថាប័ននីមួយៗ។ 
  

ក្រសួងមុខងារសាធារណៈ បានរៀបចំក្រុមការងារបច្ចេកទេសគាំទ្រតាមវិស័យ ដើម្បីសម្របសម្រួល និងផ្តល់ការគាំទ្រផ្នែកបច្ចេកទេសលើការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន។ នេះបើតាម​លោក ហ៊ុន ម៉ានី ។
 

ក្នុងពិធីបើកវគ្គបណ្តុះបណ្តាលនេះ លោក​ ហ៊ុន ម៉ានី ​បានស្នើ​ឱ្យ​ក្រសួង-ស្ថាប័ន ត្រូវរៀបចំរបាយការណ៍វឌ្ឍនភាពជាប្រចាំ ផ្ញើមកក្រសួង ពាក់ព័ន្ធការងារពិនិត្យឡើងវិញ ការវិភាគមុខងារ និងរចនាសម្ព័ន្ធ និងការធ្វើបច្ចុប្បន្នភាពរចនាសម្ព័ន្ធ ទិន្នន័យមន្ត្រីរាជការស៊ីវិល ។ ការផ្ដល់របាយការណ៍នេះ ដើម្បីឱ្យក្រសួង អាចមានលទ្ធភាពជួយផ្តល់ការសម្របសម្រួល និងគាំទ្រផ្នែកបច្ចេកទេសបន្ថែមឱ្យបានទាន់ពេលវេលា៕​