អន្តរជាតិ
UNថា សកម្មភាពការទូតលើបញ្ហាបរិយាកាស បានបញ្ជៀសស្ថានភាពដ៏អាក្រក់បំផុត
×![]()
ដោយ: VOA
មនុស្សជាតិបានព្យាយាមដោះស្រាយបញ្ហាឡើងកម្តៅជាសាកល ប៉ុន្តែកម្តៅនៅតែស្ថិតក្នុងកម្រិតសីតុណ្ហភាពខ្ពស់ដ៏គ្រោះថ្នាក់មួយនៅលើភពផែនដី។ នេះបើតាមការបញ្ជាក់របស់ប្រធានបរិយាកាសអង្គការសហប្រជាជាតិ ខណៈការចរចាដ៏សំខាន់បានចាប់ផ្តើមធ្វើឡើងកាលពីថ្ងៃទី៣ ខែមិថុនាកន្លងទៅ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AFP ។
ក្រុមអ្នកការទូតជួបប្រជុំគ្នាជារៀងរាល់ខែមិថុនាក្នុងទីក្រុង Bonn ប្រទេសអាល្លឺម៉ង់ ដើម្បីព្យាយាមដោះស្រាយនូវចំណុចជាប់គាំងសំខាន់ៗ នៅក្នុងការចរចាអាកាសធាតុ ដែលធ្វើឱ្យមេដឹកនាំនយោបាយអាចសម្រេចជាចុងក្រោយនូវកិច្ចព្រមព្រៀងនានា ក្នុងកិច្ចប្រជុំកំពូលអង្គការសហប្រជាជាតិស្តីពីអាកាសធាតុឬ COP នៅដំណាច់ឆ្នាំ២០២៤នេះ។
ក្នុងការពិភាក្សាក្នុងទីក្រុង Bonn នៅឆ្នាំនេះ ដែលដំណើរការរហូតដល់ថ្ងៃទី១៣ ខែមិថុនាខាងមុខនេះ បញ្ហាសំខាន់គឺរឿងថវិកា ដែលថាតើប្រទេសអ្នកមានត្រូវបង់ថវិកាប៉ុន្មាន ដើម្បីជួយដល់ប្រទេស ដែលមានប្រាក់ចំណូលតិច ក្នុងការដោះស្រាយការប្រែប្រួលអាកាសធាតុ។
គោលបំណងថ្មីនិងយូរអង្វែងមួយសម្រាប់ជំនួយលើវិស័យបរិយាកាស គឺត្រូវមានការឯកភាពគ្នាដោយប្រទេសជិត២០០ នៅក្នុងកិច្ចប្រជុំកំពូលCOP29 ក្នុងរដ្ឋធានី Baku នៃប្រទេសអាស៊ែបៃហ្សង់ ក្នុងខែវិច្ឆិកាខាងមុខនេះ។
លោកSimon Stiell ប្រធានលេខាប្រតិបត្តិនៃអនុសញ្ញាក្របខណ្ឌអង្គការសហប្រជាជាតិ ស្តីពីការប្រែប្រួលអាកាសធាតុ បានជំរុញដល់អ្នកចូលរួមក្នុងកិច្ចពិភាក្សាក្នុងទីក្រុង Bonn នៅពាក់កណ្តាលឆ្នាំនេះ ត្រូវគិតពីការរត់ប្រណាំងជាមួយ«ពេលវេលាដែលមានសារៈសំខាន់»។
លោកបានប្រាប់ក្រុមអ្នកចរចានៅក្នុងទីក្រុង Bonn ប្រទេសអាល្លឺម៉ង់ថា៖ «យើងមិនអាចធ្វើឱ្យសម្រេចបានលទ្ធផលនៅក្នុងកិច្ចប្រជុំកំពូលក្នុងទីក្រុង Baku នោះឡើយ បើសិននៅមានការងារជាច្រើនដែលត្រូវធ្វើទៀតនោះ»។
លោក Stiell បន្តទៀតថា សកម្មភាពការទូតអន្តរជាតិបានបញ្ជៀសនូវស្ថានភាពមួយ មិនឱ្យកម្តៅភពផែនដីឡើងដល់៥អង្សា ដែល«ធ្វើឱ្យមនុស្សជាតិភាគច្រើនបំផុតទំនងជាមិនអាចរស់នៅបាននោះឡើយ»។
លោកបន្ថែមទៀតថា «ពេលនេះយើងកំពុងឆ្ពោះទៅរកកម្តៅក្នុងកម្រិតប្រមាណ២,៧អង្សា។ កម្រិតនេះនៅតែខ្ពស់ប្រកបដោយគ្រោះថ្នាក់មួយ ហើយបញ្ហាខាងមុខនៅវែងឆ្ងាយនិងពិបាកនៅឡើយ»។
នៅក្រោមកិច្ចព្រមព្រៀងទីក្រុងប៉ារីសឆ្នាំ២០១៥ ប្រទេសនានាបានឯកភាពកម្រិតការឡើងកម្តៅជាសាកលឱ្យនៅត្រឹមក្រោម២អង្សាសេ ដែលលើសកម្រិតមុនសម័យឧស្សាហកម្ម ដើម្បីបញ្ជៀសការប៉ះពាល់ដ៏ធ្ងន់ធ្ងរបំផុតលើការប្រែប្រួលអាកាសធាតុ និងព្យាយាមកម្រិតកំណើន១,៥អង្សាដែលមានសុវត្ថិភាព។
លោក Mukhtar Babayev ដែលនឹងក្លាយជាប្រធាន COP29 បាននិយាយថា ការចម្រើនទៅមុខក្នុងកិច្ចប្រជុំទីក្រុង Bonn ប្រទេសអាល្លឺម៉ង់ នឹងក្លាយជាផ្ទាំងគ្រឹះនៃលទ្ធផលជាក់ស្តែងនៅក្នុងសន្និសីទកំពូលស្តីពីអាកាសធាតុអង្គការសហប្រជាជាតិ COP29 ខាងមុខ»។
ក្នុងឆ្នាំ២០០៩ ក្រុមប្រទេសអ្នកមានដែលទទួលខុសត្រូវខ្ពស់ភាគច្រើនបំផុត លើបម្រែបម្រួលអាកាសធាតុបានឯកភាពរហូតមកដល់ពេលនេះ ដើម្បីបង្កើនទឹកប្រាក់១០០ពាន់លានដុល្លារក្នុងមួយឆ្នាំនៅត្រឹមឆ្នាំ២០២០ សម្រាប់ប្រទេសនានាដែលគ្មានមធ្យោបាយក្នុងការវិនិយោគថាមពលស្អាតនិងសម្របខ្លួនទៅនឹងអាកាសធាតុដែលគ្រោះថ្នាក់ខ្លាំងនោះ។
ក្រុមប្រទេសទាំងនេះបានឆ្លើយតបទៅនឹងគោលដៅនេះជាលើកដំបូងក្នុងឆ្នាំ២០២២ គឺ២ឆ្នាំបន្ទាប់ពីហួសកាលបរិច្ឆេទដែលបានកំណត់នោះ។ ក្រុមប្រទេសអ្នកផ្តល់ជំនួយក៏ត្រូវបានរិះគន់ផងដែរថាបានផ្តល់ប្រាក់កម្ចីជំនួសឱ្យការផ្តល់ប្រាក់ជំនួយទៅវិញ។
ការប្រឹងប្រែងរកថវិកាសម្រាប់រយៈពេលបន្ទាប់គឺសំដៅហួសពីឆ្នាំ២០២៥ ប៉ុន្តែនៅមិនទាន់មានការយល់ព្រមជាឯកច្ឆ័ននៅឡើយទេថា តើត្រូវធ្វើការរៃអង្គាសប្រាក់ក្នុងចំនួនប៉ុន្មាននោះទេ ហើយប្រទេសណាខ្លះត្រូវបង់លុយ ហើយប្រទេសណាជាអ្នកបង់លុយដំបូងគេនោះ។
គេឃើញមានការជំទាស់ដែរ ពីការស្នើសុំដល់ប្រទេសដែលមានសេដ្ឋកិច្ចទើបងើបរីកចម្រើន ដូចជាប្រទេសចិននិងប្រទេសក្នុងតំបន់ឈូងសមុទ្រមួយចំនួន ដើម្បីជួយបង់វិភាគទានជាថវិកា។
ប្រទេសមួយចំនួនចង់ឃើញសកម្មភាពការងារបរិយាកាសរបស់គេ មានកម្រិតប្រហាក់ប្រហែលទៅនឹងចំនួនថវិកាដែលមានផងដែរ។ ប្រទេសនានាត្រូវបញ្ជូនគម្រោងផែនការដែលធ្វើបច្ចុប្បន្នភាពរបស់គេនៅត្រឹមដើមឆ្នាំ២០២៥៕
© រក្សាសិទ្ធិដោយ thmeythmey.com
