អន្តរជាតិ
លោក Biden បានសន្យានៅក្នុងទិវា D-Day ថា បស្ចិមប្រទេសនឹងមិនបោះបង់ចោលអ៊ុយក្រែនឡើយ
ប្រធានាធិបតីសហរដ្ឋអាមេរិកលោក Joe Biden ថ្លែងនៅក្នុងទិវា D-Day នៅទីក្រុង Colleville-sur-Mer តំបន់ Normandy ប្រទេសបារាំង នាថ្ងៃទី៦ ខែមិថុនា ឆ្នាំ២០២៤។
×![]()
ដោយ: VOA
លោកប្រធានាធិបតីសហរដ្ឋអាមេរិក Joe Biden កាលពីថ្ងៃទី៦ មិថុនា បានកត់សម្គាល់ខួបលើទី ៨០ឆ្នាំដ៏អធិកអធម្ម នៃទិវា D-Day ក្នុងសង្គ្រាមលោកលើកទី ២ ដែលកងកម្លាំងសម្ព័ន្ធមិត្តបានធ្វើការវាយប្រហារឡើងច្រាំងនៅតំបន់ Normandy ក្នុងប្រទេសបារាំង ដោយលោកបានសន្យាថា សហរដ្ឋអាមេរិកនិងអង្គការអូតង់ នឹងមិនបោះបង់ការគាំទ្ររបស់ខ្លួនដល់ប្រទេសអ៊ុយក្រែន ក្នុងការប្រយុទ្ធប្រឆាំងនឹងអំពើឈ្លានពានរបស់រុស្ស៊ី ដែលមានរយៈពេល ២ ឆ្នាំមកហើយ។ 
ថ្លែងនៅបូជនីយដ្ឋានបញ្ចុះសព Colleville-sur-Mer ក្នុងប្រទេសបារាំង លោក Biden និយាយថា៖ «យើងនឹងមិនដើរចេញពីការការពារអ៊ុយក្រែនទេ ហើយនឹងមិនចុះចាញ់មនុស្សដែលធ្វើបាបគេដែរ»។
មេដឹកនាំអាមេរិករូបនេះនិយាយថា អ៊ុយក្រែនត្រូវបានរំលោភឈ្លានពានដោយប្រធានាធិបតីរុស្ស៊ីលោក Vladimir Putin ដែល «ជាជនផ្តាច់ការដែលមានចេតនាគ្របដណ្តប់លើគេឯង» និងថា លទ្ធិប្រជាធិបតេយ្យពេលនេះកំពុងស្ថិតក្នុងហានិភ័យកាន់តែខ្លាំងជាងពេលណាៗទាំងអស់ ចាប់តាំងពីសង្គ្រាមលោកលើកទី ២ មក។
លោកថ្លែងបន្តទៀតថា៖ «សូមកុំយល់ច្រឡំឱ្យសោះ យើងមិនអោនក្បាលឡើយ។ យើងមិនអាចចុះចាញ់អ្នកដែលធ្វើបាបគេនោះទេ។ គេមិនអាចគិតដូច្នេះបានឡើយ។ ប្រសិនបើយើងធ្វើដូចនេះ នោះសេរីភាពនឹងរងការបរាជ័យ ហើយប្រទេសក្នុងអឺរ៉ុបទាំងអស់នឹងរងការគំរាមកំហែង»។
លោកបានផ្តល់ការគាំទ្រដ៏ទូលំទូលាយមួយ សម្រាប់សណ្តាប់ធ្នាប់ពិភពលោក ដែលបានកើតឡើងក្រោយពីការបញ្ចប់សង្គ្រាមលោកលើកទី ២ មក។
ទិវា D-Day គឺជាការវាប្រហារឡើងគោកដ៏ធំបផុតមួយក្នុងប្រវត្តិសាស្ត្រ ដោយលោក Biden បានហៅវាថា ជា «ការបង្ហាញដ៏មានឥទ្ធិពលមួយ ពីរបៀបដែលក្រុមសម្ព័ន្ធមិត្ត បានធ្វើឱ្យយើងរឹងមាំកាន់តែខ្លាំងឡើង»។
លោកបន្តទៀតថា៖ «វាជាមេរៀនមួយដែលខ្ញុំសង្ឃឹមថា យើងជាជនជាតិអាមេរិកាំង មិនដែលភ្លេចនោះឡើយ»។
លោក Biden បានសម្តែងគារវកិច្ចគោរពក្រុមទាហានជើងចាស់ក្នុងសង្គ្រាមលោកលើកទី ២ ដែលបានចូលរួមក្នុងទិវា D-Day នេះ ដែលក្នុងនោះពួកគេមួយចំនួនស្ថិតក្នុងរទះរុញ និងមួយចំនួនទៀតមានអាយុជាង ១០០ឆ្នាំ ទៅហើយ៕
© រក្សាសិទ្ធិដោយ thmeythmey.com
