អន្តរជាតិ
សហរដ្ឋអាមេរិកត្រូវការជំនួយពីជប៉ុនដើម្បីជំរុញផលិតកម្មការពារជាតិរបស់ខ្លួន
រូបឯកសារ៖ ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន លោក Rahm Emanuel ថ្លែងសុន្ទរកថានៅឯនាវាផ្ទុកយន្តហោះចម្បាំង USS Ronald Reagan របស់កងទ័ពជើងទឹកអាមេរិក នៅមូលដ្ឋាន Yokosuka របស់កងទ័ពជើងទឹកអាមេរិក ក្នុងទីក្រុង Yokosuka ភាគខាងត្បូងទីក្រុងតូក្យូ ថ្ងៃទី១៦ ខែឧសភា ឆ្នាំ២០២៤។
×![]()
ដោយ: VOA
សហរដ្ឋអាមេរិកត្រូវការឱ្យជប៉ុនជួយក្នុងការដោះស្រាយនឹងការប្រឈមជាយុទ្ធសាស្រ្តនៅអឺរ៉ុបនិងអាស៊ី ដែលធ្វើឱ្យឧស្សាហកម្មការពារជាតិរបស់ខ្លួនជាប់គាំង។ នេះបើតាមការបញ្ជាក់របស់ឯកអគ្គរដ្ឋទូតអាមេរិកប្រចាំប្រទេសជប៉ុន ដែលបាននិយាយកាលពីថ្ងៃចន្ទ ខណៈពេលដែលប្រទេសជាច្រើនបានចាប់ផ្តើមការពិភាក្សាលើកិច្ចសហប្រតិតបត្តិការឧស្សាហកម្មយោធា។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
លោកRahm Emanuel បានប្រាប់ក្រុមអ្នកសារព័ត៌មានថា «យុទ្ធសាស្ត្រសន្តិសុខជាតិរបស់យើងតម្រូវឱ្យយើងទទួលខុសត្រូវលើផ្នែកមួយនិងជាច្រើន នោះគឺសង្រ្គាមដ៏សំខាន់មួយនិងមួយទៀតគឺការប្រឈមមួយ ជាមួយនឹងសង្គ្រាមទាំងនៅក្នុងប្រទេសអ៊ុយក្រែននិងតំបន់មជ្ឈិមបូព៌ា។ ការរក្សានូវលទ្ធភាពទប់ស្កាត់ជាមុនដែលគួរឱ្យទុកចិត្តបានរបស់យើងក្នុងតំបន់អាស៊ីខាងកើត ដូចអ្នកដែលបានឃើញរួចហើយ គឺយើងស្ថិតក្នុងជម្រើសពីរបូក»។
កាលពីថ្ងៃអាទិត្យ ជប៉ុននិងសហរដ្ឋអាមេរិក បានចាប់ផ្តើមការពិភាក្សាជាលើកដំបូងក្នុងទីក្រុងតូក្យូ លើការបង្កើតកិច្ចសហការឧស្សាហកម្មការពារឱ្យកាន់តែស៊ីជម្រៅ នៅក្រោមវេទិកាអាមេរិកជប៉ុន ស្តីពីកិច្ចសហប្រតិបត្តិការឧស្សាហកម្មការពារជាតិ ការទទួលបាន និងស្ថិរភាព ដែលត្រូវបានបង្កើតឡើងកាលពីខែមេសាកន្លងទៅ ដោយនាយករដ្ឋមន្ត្រីជប៉ុនលោក Fumio Kishida និងប្រធានាធិបតីអាមេរិកលោក Joe Biden។
ការពិភាក្សាគ្នានៅថ្ងៃអង្គារនេះរវាងរដ្ឋលេខាធិការក្រសួងការពារជាតិអាមេរិកលោក William A. LaPlante ទទួលបន្ទុកការងារចីរភាពនិងការទិញ ជាមួយលោក Masaki Fukasawa ប្រធានទីភ្នាក់ងារផ្នែកទិញរបស់ជប៉ុន បច្ចេកវិទ្យា និងភស្តុភារ នឹងផ្តោតទៅលើការជួសជុលនាវាក្នុងប្រទេសជប៉ុន ដែលធ្វើឱ្យអាមេរិកមានកន្លែងច្រើន ក្នុងការផលិតនាវាចម្បាំងបានច្រើនថែមទៀត។
លោកបន្ថែមទៀតថា កិច្ចសហប្រតិបត្តិការលើផ្នែកដ៏សំខាន់មួយទៀតរវាងជប៉ុននិងអាមេរិក គឺការជួសជុលយន្តហោះ ការផលិតគ្រាប់មីស៊ីល និងភាពស៊ូធន់ទៅនឹងសង្វាក់ផ្គត់ផ្គង់ផ្នែកយោធា។
ជប៉ុននិងសហរដ្ឋអាមេរិកបានស្ថាបនារួចហើយនូវប្រព័ន្ធការពារគ្រាប់មីស៊ីលរួមគ្នាមួយ ហើយរដ្ឋាភិបាលក្រុងតូក្យូក៏បានឯកភាពផងដែរ ដើម្បីផ្គត់ផ្គង់ប្រព័ន្ធការពារមីស៊ីល Patriot PAC3 ទៅឱ្យសហរដ្ឋអាមេរិក៕
© រក្សាសិទ្ធិដោយ thmeythmey.com
