អន្តរជាតិ
ប្រទេសនិងអង្គការចំនួន៩០នឹងចូលរួមនៅក្នុងសន្និសីទស្តីពីសន្តិភាពសម្រាប់អ៊ុយក្រែន
×![]()
ដោយ: VOA
ប្រធានាធិបតីស្វីស អ្នកស្រី Viola Amherd ថ្លែងក្នុងសន្និសីទសារព័ត៌មានមួយមុនសន្និសីទសន្តិភាពអ៊ុយក្រែនដែលត្រូវបានរៀបចំដោយប្រទេសស្វីសនៅទីក្រុង Bern ថ្ងៃទី១០ ខែមិថុនា ឆ្នាំ២០២៤។
ប្រទេសស្វីសនិយាយថា នឹងមានប្រទេសនិងអង្គការចំនួន៩០ចូលរួមនៅក្នុងសន្និសីទរយៈពេល២ថ្ងៃ ស្តីពីសន្តិភាពសម្រាប់ប្រទេសអ៊ុយក្រែន ដែលខ្លួនកំពុងរៀបចំធ្វើ ហើយនឹងចាប់ផ្តើមនៅថ្ងៃទី១៥ មិថុនា។
រដ្ឋាភិបាលស្វីសបាននិយាយថា ចំនួនប្រទេសដែលចូលរួម មានប្រហែលពាក់កណ្តាលមកពីទ្វីបអឺរ៉ុប ហើយថា ការចូលរួមជាសាកលមានសារៈសំខាន់ ដើម្បីធ្វើឱ្យមានដំណើរការមួយ ដែលមានការគាំទ្រដ៏ទូលំទូលាយ។
សេចក្តីថ្លែងការណ៍មួយរបស់រដ្ឋាភិបាលស្វីសបាននិយាយថា សន្និសីទស្តីពីសន្តិភាពនេះ មានបំណងធ្វើជាវេទិកាមួយក្នុងការពិភាក្សារកវិធីផ្សេងៗ ដើម្បីទទួលបាននូវ «សន្តិភាពដ៏យូរអង្វែង ត្រឹមត្រូវនិងដ៏ទូលំទូលាយមួយ» សម្រាប់ប្រទេសអ៊ុយក្រែន ដោយផ្អែកទៅលើច្បាប់អន្តរជាតិ និងធម្មនុញ្ញសហប្រជាជាតិ» ក៏ដូចជាធ្វើការនៅក្នុងក្របខណ្ឌមួយ ដើម្បីអនុវត្តនូវផែនការសន្តិភាពមួយ ក៏ដូចជារបៀបដែលធ្វើឱ្យរុស្ស៊ីនិងអ៊ុយក្រែនចូលរួមពាក់ព័ន្ធជាមួយគ្នានៅក្នុងដំណើរការសន្តិភាពមួយ។
ប្រទេសស្វីសរៀបចំសន្និសីទនេះឡើង តាមសំណើរបស់ប្រធានាធិបតីអ៊ុយក្រែន លោកVolodymyr Zelenskyy ប៉ុន្តែរុស្ស៊ីនឹងមិនចូលរួមឡើយ។
ប្រទេសរុស្ស៊ីបានរិះគន់ដល់ដំណើរការរៀបចំកិច្ចប្រជុំនេះ និងបានលើកឡើងថា ខ្លួននឹងចូលរួមនៅក្នុងដំណើរការពិភាក្សាសន្តិភាពនេះ ក្នុងករណីដែលមានការពិចារណាទៅលើស្ថានភាពជាក់ស្តែងដែលកំពុងកើតឡើងក្នុងសមរភូមិតែប៉ុណ្ណោះ ដែលក្នុងនោះក៏រួមមានការរុលទៅមុខរបស់កម្លាំងរុស្ស៊ីក្នុងសមរភូមិប្រយុទ្ធ ចាប់តាំងពីការចូលឈ្លានពានក្នុងប្រទេសអ៊ុយក្រែនកាលពីខែកុម្ភៈ ឆ្នាំ២០២២មក។
លោក Zelenskyyបានទាមទារឱ្យរុស្ស៊ីដកកងទ័ពរបស់ខ្លួនចេញពីទឹកដីរបស់អ៊ុយក្រែនទាំងអស់។
ការរុលទៅមុខរបស់កងកម្លាំងរុស្ស៊ីក្នុងតំបន់Kharkiv ត្រូវបានជាប់គាំង ក្រោយពីសហរដ្ឋអាមេរិក បានអនុញ្ញាតឱ្យអ៊ុយក្រែនប្រើប្រាស់អាវុធរបស់ខ្លួន អាចបាញ់ទៅលើទីតាំងមួយចំនួននៅក្នុងប្រទេសរុស្ស៊ីនោះ។ នេះបើតាមការបញ្ជាក់របស់ទីប្រឹក្សាសន្តិសុខជាតិសេតវិមាន លោក Jake Sullivan ដែលបាននិយាយកាលពីថ្ងៃអាទិត្យ៕
© រក្សាសិទ្ធិដោយ thmeythmey.com
