លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានបញ្ជាក់ថា គម្រោងសាងសង់អាងស្តុកទឹកស្វាហាប់ និងអាងទឹកឃ្លៀច គឺដើម្បីពង្រឹងការគ្រប់គ្រងទឹកនៅភ្នំពេញ និងខេត្តជុំវិញ ពិសេសទប់ស្កាត់បញ្ហាទឹកជំនន់នារដូវវស្សា និងស្តុកទឹកសម្រាប់ប្រើប្រាស់នារដូវប្រាំង។ លោកអះអាងថា គម្រោងសាងសង់អាងស្តុកទឹកបន្ថែមនេះ គឺស្ថិតក្នុងគម្រោងរៀបចំស្តារឡើងវិញ ហេដ្ឋារចនាសម្ព័ន្ធប្រព័ន្ធធារាសាស្រ្ត និងការគ្រប់គ្រងទឹកនៅកម្ពុជាឱ្យកាន់តែប្រសើរ ដែលជាគោលនយោបាយរបស់ក្រសួងធនធានទឹកអាណត្តិថ្មីនេះ។
 

លោករដ្ឋមន្រ្តី​ បានលើកឡើងដូច្នេះថា៖«សម្រាប់ទីក្រុងភ្នំពេញ យើងនឹងមានគម្រោងកសាងអាងទឹក២ទៀត នៅខាងកំពង់ស្ពឺ។ សព្វថ្ងៃទីក្រុងភ្នំពេញទទួលឥទ្ធិពលទឹក មកពីស្ទឹងព្រែកត្នោត ហើយស្ទឹងព្រែកត្នោត ទទួលទឹកមកពីជួរភ្នំក្រវាញ ហើយលើភ្នំនោះមានអាងទឹក៣ ប៉ុន្តែអត់គ្រប់គ្រាន់ទេសម្រាប់បញ្ចៀស និងទុកទឹក ដូច្នេះរដ្ឋាភិបាលថ្មីបានឯកភាពរួចហើយឱ្យកសាងអាងទឹក២ទៀត»។ 
 

យ៉ាងណាក៏ដោយ ការសាងសង់អាងទឹកចំនួន២បន្ថែមទៀតនេះ គឺស្ថិតក្នុងគម្រោងនៅឡើយ ដោយមិនទាន់បើកការដ្ឋានសាងសង់នោះទេ។
 

ក្រៅពីគម្រោងសាងសង់អាងទឹក២បន្ថែម ក្រសួងធនធានទឹក ក៏កំពុងមមាញឹកស្តារប្រព័ន្ធគ្រប់គ្រងទឹកទូទាំងរាជធានី ដើម្បីបញ្ចៀសទប់ស្កាត់បញ្ហាទឹកជំនន់ជន់លិចនារដូវវស្សា។ បើគិតមកដល់បច្ចុប្បន្ន គម្រោងស្ដារប្រព័ន្ធធារាសាស្រ្តក្នុងរាជធានី សម្រេចបានជាង៧០ភាគរយហើយ។ លោករដ្ឋមន្រ្តីបានបញ្ជាក់ថា គម្រោងស្តារប្រព័ន្ធធារាសាស្រ្តក្នុងក្រុងភ្នំពេញ ក្នុងដំណាក់កាលទី១ នឹងបញ្ចប់ត្រឹមចុងឆ្នាំ២០២៤នេះ ដើម្បីបន្តអនុវត្តដំណាក់ទី២ និងបន្តបន្ទាប់ទៀត៕